好多主人為咗改善狗狗皮膚敏感或腸胃問題，都會考慮轉食羊肉。究竟「狗狗可唔可以食羊肉？」
答案係：得！而且羊肉對好多狗狗嚟講，係一種營養豐富又低致敏嘅優質肉類選擇。 不過點樣餵、揀邊個部位，當中都有唔少學問！
羊肉嘅營養價值
煮熟嘅瘦羊肉含有狗狗需要嘅多種重要營養，包括：
- 高蛋白質：提供完整必需氨基酸，係肌肉同身體組織嘅重要基礎。
- 鐵質同鋅：比雞肉、魚肉更豐富，有助預防貧血同增強免疫力。
- 維他命B群：特別係維他命B12，對維持神經系統健康好重要。
羊肉同牛肉、雞肉有咩唔同？
同牛肉一樣，羊肉屬於「紅肉」，鐵質含量高。但最大嘅分別係，羊肉對於絕大多數狗狗嚟講係一種「新穎蛋白質」(Novel Protein)，因為一般狗糧較少用羊肉做主要成分。正因為狗狗較少接觸，所以引發過敏嘅機率相對較低。另外，喺傳統中醫角度，羊肉屬性溫補，適合體質偏寒嘅狗狗。
狗狗食羊肉嘅好處
■ 常見於低敏／處方糧，適合腸胃及皮膚敏感狗狗
呢個係羊肉最大嘅優點。如果狗狗對雞肉、牛肉等常見蛋白質過敏，搞到皮膚痕癢、腸胃不適，轉食以羊肉為單一蛋白質來源嘅低敏糧或處方糧，好多時都可以有效改善問題。
■ 高蛋白質，有助維持肌肉同免疫系統健康
羊肉提供嘅高質量蛋白質，容易被消化吸收，能夠為狗狗提供充足能量，對維持肌肉量同健康嘅免疫系統好重要。
■ 羊肉脂肪酸有助皮膚同毛髮亮麗
羊肉含有均衡嘅 Omega-3 同 Omega-6 脂肪酸，有天然抗炎作用，可以幫助紓緩皮膚敏感、痕癢問題，令狗狗毛髮更健康、更靚更有光澤。
狗狗食羊肉嘅風險 (主人必讀！)
■ 羊肉屬於紅肉，脂肪含量較高
雖然羊肉嘅脂肪酸有益，但整體脂肪含量比雞胸肉等白肉高。如果餵食過量，容易令狗狗肥胖，甚至急性引發可大可小嘅「胰臟炎」。所以一定要揀瘦肉部位，並切走多餘肥膏。
■ 生羊肉有寄生蟲風險
同其他肉類一樣，未經煮熟嘅羊肉可能帶有細菌（如沙門氏菌）同寄生蟲。為安全起見，畀狗狗食嘅羊肉必須徹底煮熟。
■ 烤羊架／調味羊肉唔適合狗狗
千祈唔好貪方便，將自己食淨嘅燒羊架、羊腩煲或者其他用人類調味料煮過嘅羊肉畀狗狗食！呢啲餸菜對狗狗嚟講鹽分同油份都嚴重超標，當中嘅洋蔥、蒜頭等香料更加係對狗狗有毒嘅。
狗狗可以食邊啲羊肉部位？
■ 羊肩、羊扒（去骨去油）
呢啲係最好嘅選擇。揀選脂肪較少嘅羊肩肉（羊上髀）或羊扒，將所有可見嘅肥膏同骨頭切走後，徹底煮熟再切細粒就得。
■ 羊肝等內臟
羊肝等內臟營養極之豐富，但維他命A含量非常高，只可以極少量餵食（唔應該超過總膳食嘅5%），過量會引致維他命A中毒。
■ 羊骨
極度高風險！記住一個原則：「生骨OK，熟骨No Way！」 煮熟後嘅羊骨會變脆，容易裂開成尖刺，會拮穿狗狗嘅喉嚨或腸道。生嘅羊骨可以作為潔齒骨，但必須喺主人監督下啃咬。為安全起見，好多獸醫都建議完全避免餵食骨頭。
狗狗食羊肉嘅正確方法
■ 建議煮熟再餵，唔好生食
最安全嘅方法係將羊肉徹底煮熟，例如白烚或清蒸，可以殺死所有潛在嘅細菌同寄生蟲。
■ 唔加鹽、油、調味料
必須保持原汁原味，唔好落任何人類用嘅調味料，確保狗狗食得健康。
■ 作為副食／零食，唔好取代主食
除非你係跟住寵物營養師嘅餐單去自製鮮食，否則單一嘅羊肉並唔能夠提供均衡營養。佢只可以作為獎勵小食或正餐以外嘅「加餸」。
狗狗食羊肉 FAQ
■ 幼犬可唔可以食羊肉？
可以。當幼犬戒奶後，羊肉係好好嘅蛋白質來源。同樣，要由極少量完全煮熟、切碎嘅瘦羊肉開始試，確保佢哋腸胃適應到。
■ 狗狗食羊肉會唔會過敏？
雖然羊肉出名低致敏，但任何蛋白質都有機會引起過敏。第一次餵食時一定要由極少量開始，並觀察有冇皮膚痕癢、出紅疹或肚痾等過敏反應。
■ 羊肉狗糧／鮮食配方點揀？
揀選商業食品時，要睇清楚成分表，揀啲以「羊肉」而唔係「肉類副產品」為主要成分嘅產品。對敏感狗狗嚟講，揀「單一蛋白質」（即只有羊肉）嘅低敏配方狗糧會係最理想嘅選擇。