貓貓突然唔食嘢？由感冒、牙痛到壓力，獸醫拆解6大常見原因及解決方案

你屋企隻貓貓係咪突然唔食嘢？身為剷屎官，我哋最驚就係呢種情況： 原本生生猛猛嘅主子，突然對食物失去興趣。好多人第一時間會以為佢「揀飲擇食」，但其實，拒食背後可能收埋咗健康警號。 無論係病咗、有壓力，定係單純嘅胃口轉變，貓貓一旦超過兩日冇食嘢，就必須要特別小心。 呢篇文章幫你整理出常見嘅「拒食原因」，並提供具體解決方法，等你唔使再亂估，可以安心面對、及時處理。

貓貓同我哋一樣，感冒嗰陣會冇胃口。尤其係貓感冒（上呼吸道感染），鼻塞塞聞唔到食物陣味，就好難想食嘢。

點樣令貓貓肯食返嘢？

可以轉食味道比較濃郁嘅罐罐（例如三文魚、吞拿魚口味），或者將罐罐隔水座暖（大約 35-40 度），等香氣飄出嚟，就可以引到佢開金口。

不過，如果你發現貓貓係咁打乞嗤、流鼻水、眼仔流晒分泌物，咁就唔只係單純唔想食嘢，建議快啲帶去畀獸醫睇睇。

貓貓都可能會有牙石、牙肉發炎（牙周病），甚至口腔生痱滋或腫瘤。 呢啲都可能係令貓貓「想食又唔敢食」嘅原因。

點樣知道貓貓有冇牙齒或口腔問題？

你可以觀察貓貓有冇以下呢啲跡象：

• 最近個口係咪好臭？
• 食嘢嗰陣係咪流到成地下口水？
• 咬兩啖就唔想繼續食？
• 嘴角有啲血絲或者腫起，睇落明顯唔妥。

呢種情況唔一定要等到佢真係唔食嘢先處理， 平時定期做口腔檢查，幫佢清潔牙齒，可以慳返好多手尾。

最常見嘅原因包括：

• 吞咗唔應該吞嘅嘢（膠袋、繩、橡筋…呢啲佢哋都可能咬咬下就吞落肚）
• 慢性腸胃炎、胰臟發炎
• 便秘得太耐
• 腎功能下降等等。

呢啲都唔係用肉眼可以睇得出。你可能會觀察到貓貓好似有啲肚餓，但行到埋個兜前面又猶豫不決，食兩啖就走開，呢個其實係佢「覺得唔舒服但又講唔出口」嘅徵兆。

如果貓貓冇感冒，又冇牙齒問題，但都仲係食唔落，建議去搵獸醫做個身體檢查，先知貓貓發生咩事～

貓唔食嘢，常見原因之一就係心臟病，特別係老貓。只要發現佢變得冇胃口、懶洋洋、行幾步就喘氣，就有可能係心臟問題，盡快帶去獸醫檢查，先可以搵到正確嘅解決方法。

貓唔食嘢，可能係心臟病本身令佢感到不適，亦可能係新轉嘅處方糧陣味佢唔鍾意而拒食。

貓對口感同氣味非常揀擇，夾硬餵只會令情況更差。

發現呢種狀況，應該馬上同獸醫商量，調整成貓貓肯食、又可以兼顧到病情嘅配方，咁樣治療先至有效。

食物厭惡： 貓貓喺病緊或住院期間，會對某啲食物產生「陰影」。

喺唔舒服嗰陣食過某隻牌子嘅罐罐，到身體好返之後，就會討厭嗰隻罐罐嘅味道。

如果你發現佢一聞到熟悉嘅味道就擰轉面走，唔使急住逼佢食，可以轉下口味、轉下質地，將肉泥狀嘅罐罐轉成肉絲款，或者試下有湯汁嘅都得。

貓貓有時唔係唔肚餓，只係「個心過唔到去」。

貓貓其實係好敏感嘅小動物，佢哋嘅心情會默默影響食慾。有時只係屋企多咗啲噪音、搬過傢俬，或者有新成員（人或貓狗）突然加入，就會令佢變得悶悶不樂，連飯都唔想食。

常見壓力來源有啲咩？

• 裝修施工嘅聲音（佢哋真係超級怕電鑽聲）
• 突然多咗個「室友」，例如新貓新狗嘅出現
• 食兜、貓砂盆位置大兜亂
• 同其他動物有啲小磨擦，搞到佢唔敢行近食物區

關鍵係： 畀佢一個安靜、安心嘅食飯空間。將個兜放喺固定、唔會受騷擾嘅角落，等佢覺得「呢度係我地盤」，先有可能慢慢搵返個胃口。

幼貓（BB貓）比大貓更容易出狀況，尤其係啱啱戒奶、啱啱適應新屋企嘅階段。如果發現佢超過 24 小時唔食嘢，就要即刻去睇醫生。

• 仲適應緊乾糧/濕糧嘅質地同味道（口味偏好仲未建立）
• 感冒鼻塞，食唔落又聞唔到
• 唔小心食錯毛線、橡筋等異物，塞住腸胃
• 食飯嗰陣畀其他貓貓或狗狗嚇親，驚到唔敢行埋個兜度

可以用湯匙餵少少加熱過嘅濕糧、加啲水浸軟乾糧、或者用針筒輕輕餵，亦要確保佢有獨立嘅食飯空間，唔會受到其他動物騷擾，幫BB貓安心食飯。

如果確定唔係病，而係佢單純「食厭咗」或者有啲揀嘴，不妨試下調整方式，令食物變得更吸引：

• 轉個花款試下： 肉泥、肉絲、肉塊，各種口感輪流上陣。
• 罐罐加熱更香： 聞起嚟先有吸引力。可以將罐罐隔水座暖，或者加少少熱水，整到微溫（約 35-40 度），等罐罐嘅香氣飄出嚟。
• 乾糧「加料」： 喺乾糧上面灑啲凍乾碎、肉鬆，增加食物香氣同變換口感！
• 保持乾糧新鮮： 每次開封後，唔好擺超過一個月，乾糧好易「走味」。

以下情況，務必盡快帶去睇醫生：

• 成貓連續兩日冇食嘢
• 幼貓一日內冇食嘢
• 有明顯嘔吐、肚Row、渴睡、冇精神
• 呼吸急速、眼白或皮膚變黃

肝脂肪病變（脂肪肝）： 當貓長時間冇食嘢、熱量唔夠，身體會由肝臟調動脂肪嚟維持能量，結果導致肝臟負荷過重，嚴重時甚至會威脅生命。

如果你正為屋企主子唔食嘢而焦急，其實你並唔孤單。

有時，只係味道唔啱；有時，係佢唔舒服講唔出口。你可以試下將食物整香啲、轉下口感，或者畀佢一個獨處食飯嘅安全感。

亦可以考慮試下我哋推薦嘅高適口性、營養密度高嘅全鮮肉配方，好多康復中、揀嘴、或者壓力大嘅貓貓，轉咗呢種配方後，終於都肯重新開金口食飯。

關心貓貓，其實就係由每日觀察佢有冇乖乖食飯開始。