狗狗結膜炎（Conjunctivitis）俗稱「紅眼症（Pink Eye）」，係指覆蓋眼球前部同眼瞼內側嘅結膜組織發炎或受刺激所引起。
結膜係一層保護眼睛嘅黏膜，負責抵抗感染、維持淚液分泌同埋保護角膜。當細菌、敏感原或異物造成刺激時，就可能引起紅腫、分泌物同埋疼痛等症狀。
呢係狗狗最常見嘅眼部疾病之一，幾乎任何年齡、品種嘅狗狗都可能發生。以下係 3 大主要成因分類：
狗狗結膜炎成因1. 感染性因素
- 細菌感染：好似葡萄球菌咁，會引起濃稠嘅黃綠色分泌物。
- 病毒感染：狗瘟病毒、狗疱疹病毒、狗腺病毒等亦都可能會引起眼睛發炎。
- 寄生蟲或真菌感染：例如眼蟲或狗艾利希體病（canine ehrlichiosis）。
狗狗結膜炎成因2. 非感染性因素
狗狗結膜炎最常見嘅成因其實係呢類：
- 敏感反應：花粉、塵埃、香水或霉菌等環境敏感原。
- 異物或刺激物：沙粒、草籽、煙霧、清潔劑或化學物品。
- 眼瞼同眼睫毛異常：眼睫毛倒生、眼瞼內翻等摩擦到眼球。
- 創傷：玩耍或R損造成嘅外傷。
狗狗結膜炎成因3. 繼發性因素
狗狗結膜炎有時亦都係其他疾病引起嘅跡象：
- 眼部疾病：好似角膜潰瘍、青光眼、葡萄膜炎或鞏膜炎。
- 全身性疾病：例如呼吸道感染、蜱傳病或免疫系統疾病。
狗狗結膜炎有咩症狀？
狗狗結膜炎嘅症狀視乎嚴重程度而定，可以由眼睛輕微紅腫到大量膿狀分泌物。當主人留意到以下情況，就應該提高警覺：
- 眼睛發紅、充血：狗狗結膜炎最典型嘅症狀，呢係因為結膜血管擴張引起嘅。
- 眼睛腫脹：結膜水腫，引致內眼角隆起或眼白腫脹。
- 分泌物增多：透明分泌物多數係敏感引起；綠色、黃色分泌物就常見於細菌感染。
- 頻繁眨眼或瞇眼：因為疼痛或異物感引起唔舒服。
- 用爪R眼睛或喺地上摩擦：顯示眼部痕癢或疼痛。
- 怕光、流眼水：對光敏感或角膜受刺激。
⚠️ 注意：狗狗結膜炎同其他眼病好似角膜潰瘍、乾眼症、青光眼症狀相似，應該由獸醫檢查先可以確定病因。
狗狗結膜炎點樣診斷同治療？
診斷嘅首要目標係確認狗狗結膜炎嘅成因，獸醫會進行全面身體檢查同詳細嘅眼科檢查，包括檢查面部結構、眼瞼、眼睫毛等周邊組織，先可以根據確切嘅原因去治療。
唔同病因嘅治療方向可能如下：
狗狗結膜炎治療1. 藥物治療
- 抗生素眼藥水／藥膏：用嚟醫治細菌感染或預防二次感染。
- 非類固醇抗發炎眼藥水：紓緩紅腫、刺激同埋唔舒服。
- 類固醇眼藥水：針對敏感性或免疫性結膜炎使用（如果角膜潰瘍就唔可以用）。
- 人工淚液或促淚劑：用嚟醫治乾眼症或慢性刺激引起嘅炎症。
- 口服藥物：喺嚴重或全身感染嗰陣輔助使用。
狗狗結膜炎治療2. 物理同輔助治療
- 冷敷或生理鹽水沖洗：減輕紅腫同埋清除分泌物。
- 異物移除：如果沙粒或草籽，需要由獸醫喺鎮靜下拎走。
- 戴伊莉莎白頸圈：防止狗狗R眼引致病情惡化。
- 外科手術：矯正眼睫毛倒生、眼瞼內翻或切除腫瘤。
⚠️ 注意：狗狗嘅結膜炎唔一定會自己好返，需要醫治根本原因，先可以有效改善！
主人一定要依照獸醫指示餵藥，就算症狀改善都唔可以自己停藥，唔係嘅話可能會引致復發或惡化。
狗狗結膜炎點樣預防？
雖然有啲疾病難以完全避免，但以下方法可以大大降低狗狗患上結膜炎嘅風險：
- 環境控制：避免俾狗狗接觸煙霧、塵埃、化學氣體同埋花粉敏感原。
- 保持清潔：定期清洗狗狗嘅床墊、玩具同埋食具。
- 修剪眼周毛髮：特別係長毛狗種，避免毛髮拮到眼睛。
- 外出防護：帶狗狗出街活動嗰陣，可以用護目鏡或避免強風環境。
- 接種疫苗：定期接種狗病毒性疾病疫苗，降低患上潛在疾病嘅風險。
- 定期眼部檢查：特別係淚腺分泌異常或有敏感體質嘅狗狗，需要定期安排檢查確保眼睛健康。
狗狗結膜炎常見問答
Q1：狗狗可唔可以用人用嘅眼藥水？
唔可以。
人用眼藥水成分同濃度唔同，可能會對狗狗造成毒性或損害角膜。如果狗狗有眼睛紅、流膿等情況，應該由獸醫診斷同開適合嘅藥物。
Q2：狗狗眼睛可唔可以用生理鹽水？
唔建議貿然用生理鹽水清洗狗狗眼睛。
某啲情況下，獸醫可能會使用無菌生理鹽水作為暫時性清潔用，但生理鹽水並冇治療效果，如果懷疑有眼部問題，都應該首先諮詢獸醫。
Q3：狗狗結膜炎治療費用幾多錢？
費用視乎診斷檢查項目同病情嘅嚴重程度。
如果結膜炎係由敏感或乾眼症等慢性潛在問題引起嘅，可能需要頻繁或長期嘅藥物管理，咁樣會令到總體治療成本增加。
Q4：狗狗結膜炎幾耐會好返？
狗狗結膜炎好返嘅時間唔一定。
- 輕微病例：大部份病例喺接受適當治療之後，通常喺一個星期左右會明顯改善同好返。
- 病毒性病例：如果由病毒感染引起，可能需要長達兩至三個星期先可以完全康復。
- 嚴重/慢性病例：嚴重嘅病例可能需要幾個星期先可以解決，如果係由慢性潛在疾病引起，可能需要終身治療。
Q5：狗狗結膜炎會唔會傳染㗎？
部份會。
如果係由病毒或細菌感染引起，就有可能喺狗狗之間傳播；如果係外傷、敏感、異物引起就唔會傳染，建議喺狗狗結膜炎好返之前，應該避免俾患病狗狗同其他動物接觸。
而狗狗結膜炎傳染俾人嘅機會極之罕見，但亦都建議處理患病狗狗嘅時候，一定要徹底洗手，避免用手掂自己嘅眼睛或塊面。
睇多啲【狗狗疾病】護理指南
參考資料
- https://www.animaleyecare.com.au/advice-sheet/canine-conjunctivitis/
- https://www.smalldoorvet.com/learning-center/medical/pink-eye-in-dogs
- https://www.charlotte.carolinavet.com/site/charlotte-emergency-vet-blog/2020/07/03/conjunctivitis-in-dogs
- https://vcahospitals.com/know-your-pet/conjunctivitis-in-dogs
- https://www.petmd.com/dog/condition/eyes/conjunctivitis-in-dogs
- https://www.vettimes.com/news/vets/small-animal-vets/conjunctivitis-in-dogs-and-cats-species-differences