溫馨提示：本文用詞已根據寵物食品相關規範作審慎調整，盡可能清晰傳達資訊，感謝各位主人嘅體諒！
見到主子打乞嗤、流眼水，貓奴嘅心都離一離！究竟係咪冷氣太大凍親？定係轉天氣敏感？
貓打噴嚏、流鼻水好常見，但絕不代表「正常」。頻繁嘅症狀，可能係小問題，亦可能係嚴重疾病嘅警號。
呢篇文章會教你點樣做個精明嘅「健康偵探」，由觀察症狀開始，一步步搵出原因，並提供完整嘅解決同預防方案，等貓奴們唔再手忙腳亂。
喺判斷原因之前，請先仔細觀察同記錄以下幾個重點，呢啲會係你同獸醫溝通時最有價值嘅線索：
| 觀察重點 | 🟢 情況較輕微 | 🔴 危險警號 |
|---|---|---|
| 鼻水/鼻涕顏色 | 透明清澈 | 黃色、綠色、帶血絲 |
| 精神狀態 | 正常，跑跳玩耍如常 | 萎靡、渴睡、匿埋 |
| 食慾 | 正常 | 明顯下降或完全唔食 |
| 其他症狀 | 間唔中流眼水 | 伴隨咳嗽、呼吸困難、發燒 |
二、貓貓打乞嗤、流鼻水嘅四大可能原因
（一）環境刺激（最常見）
| 原因 | 說明 | 解決方法 |
|---|---|---|
| 空氣中嘅灰塵、貓砂粉塵 | 灰塵同粉塵走入鼻腔，造成刺激 | 轉用低粉塵貓砂、定期吸塵、保持通風 |
| 香薰、香水、清潔劑氣味 | 化學氣味或濃烈香味會刺激呼吸道 | 減少使用香味產品、改用天然清潔劑 |
| 冷氣直吹或轉季溫差大 | 溫度急速變化會令鼻腔黏膜敏感 | 保持室內恆溫、唔好畀貓貓直吹冷氣 |
📝 如果只係間唔中打乞嗤 + 鼻水透明，精神又冇問題，可以先觀察，幫貓貓改善下環境就得。
（二）貓貓壓力太大
貓貓係好敏感嘅動物，壓力大都會影響身體。你可以諗下：
- 屋企有冇新成員（人或寵物）？
- 最近有冇搬屋、大執位？
- 係咪自己太忙，少咗時間陪佢，令貓貓有分離焦慮？
📝 特徵： 貓貓容易流眼水、瞇眼，可能伴隨過度舔毛、匿埋、唔願玩等行為。
（三）過敏反應
如果打乞嗤同流鼻水嘅狀況持續發生、有季節性，或者喺轉咗某隻糧食、貓砂後出現，咁就好可能係過敏。貓貓都可能對花粉、塵蟎、霉菌等環境致敏源產生反應。過敏嘅症狀通常同環境刺激好似，但會更頻繁而且持續更耐。
（四）病毒或細菌感染（需要求醫）
| 疾病名稱 | 特徵 | 可能原因 |
|---|---|---|
| 貓感冒 (上呼吸道感染) | 頻繁打乞嗤、流黃綠色鼻涕、眼紅腫、冇胃口 | 貓疱疹病毒 (FHV)、貓卡里西病毒 (FCV)、細菌繼發性感染 |
| 鼻炎 / 鼻竇炎 | 濃稠鼻涕、頻繁打乞嗤、鼻塞 | 感冒未醫好惡化、細菌感染 |
| 牙齒問題 | 口臭、流口水、打乞嗤 | 牙肉發炎或牙根感染，有機會影響到鼻腔 |
專家貼士：貓疱疹病毒 (FHV) 係貓感冒最常見嘅元兇之一，病毒一旦感染會終身潛伏，壓力大時易復發。獸醫好多時會建議補充離胺酸 (L-Lysine) 作為輔助治療，幫助抑制病毒複製。
三、點樣分係小問題，定係真係病咗？
| 狀況 | 建議處理方式 |
|---|---|
| 鼻水透明、間唔中打乞嗤 | ✅ 可以先觀察，注意保暖同環境清潔 |
| 鼻涕變黃綠色，開始又濃又稠 | ✅ 建議盡快帶去睇獸醫 |
| 眼仔有啲濕，但精神食慾正常 | ✅ 可以觀察有冇惡化，並保持眼部清潔 |
| 成隻貓冇晒心機、唔食嘢，仲有膿狀分泌物 | ⚠️ 緊急狀況，請立即求醫！ |
只要出現黃綠色濃稠分泌物，加上活力明顯變差，就唔好再觀察喇，直接去睇獸醫最穩陣！
四、流鼻水、打乞嗤點算好？三步曲教你照顧主子
第一步：先排除環境刺激
- 轉用低粉塵貓砂，減輕呼吸道負擔
- 減少使用香味濃嘅清潔劑或香薰
- 注意空氣流通同抽濕，避免刺激鼻哥同眼仔
第二步：觀察幾日睇下點
- 有冇不停打噴嚏？記錄下頻率。
- 鼻水係透明定係黃綠色？留意顏色變化。
- 眼仔有冇紅紅哋、分泌物係咪好黏？
第三步：仲未好轉，請立即帶貓貓求醫！
如果 2-3 日內貓貓打乞嗤、流鼻水或流眼水嘅情況都冇好轉，建議尽早帶去睇獸醫，確認有冇呼吸道感染、結膜炎或其他健康問題。
五、特別提醒｜幼貓打乞嗤唔拖得！
雖然成貓間唔中打乞嗤可能只係環境影響，但幼貓嘅免疫力仲未發展好，對病毒同細菌嘅抵抗力比較弱，病情惡化嘅速度可以好快。
如果你發現幼貓持續打噴嚏、流鼻水，或伴隨眼分泌物、冇胃口、冇精神，千祈唔好諗住「再觀察下」，建議直接帶去畀獸醫檢查最安全！特別係啱啱接返屋企嘅BB貓，有時轉咗新環境、接觸到唔同嘅病毒或灰塵，都可能引發呼吸道不適，務必要多加留意。
六、常見 FAQ
Q：貓貓淨係流眼水但冇打乞嗤，係咪感冒？
A：唔一定～可能係過敏、結膜炎，或者壓力大。只要有紅腫或者開始唔食嘢，就要去睇醫生。
Q：貓打乞嗤但精神好，使唔使擔心？
A：如果貓貓打幾個乞嗤但精神、食慾都正常，可以先唔使太緊張，通常只係短暫刺激或環境變化造成嘅。
Q：間唔中打乞嗤但精神好好，可以唔理？
A：可以先觀察 1～2 日，睇下係咪灰塵太多或者空氣唔好，記得保持通風、少用香味產品。
Q：貓貓不停打乞嗤要唔要睇醫生？
A：如果貓貓狂打噴嚏，而且鼻水變得濃稠、精神都變差，咁就唔係單純環境刺激，最好盡早就醫檢查。
七、多觀察、多陪伴，有唔妥就放心去睇醫生！
面對貓貓打乞嗤、流眼水或鼻水，其實唔使太快緊張，但亦唔可以完全忽視。只要掌握「有冇濃稠分泌物＋精神食慾有冇變化」呢個判斷原則，就能夠大致分得出係小問題，定係時候要去睇醫生。
如果你屋企隻貓本身活蹦亂跳，突然變得靜晒、冇胃口，又不停打乞嗤或流眼水，就唔好再等觀察期，帶去獸醫度檢查最安心！記得，你係佢最熟悉嘅觀察者，多一分關心，就可以少一分風險。