大家都知，貓係唔會輕易表露情緒嘅動物，平時cool cool哋，獨來獨往。
但你又知唔知？其實貓咪每分每秒都透過條尾巴傳遞緊訊息！
（例如：尾巴翹高、炸毛、大力甩動等），只係呢種身體語言，你可能仲未完全睇得明！
而家就一齊嚟解讀6種貓尾巴嘅情緒語言啦！🐾
貓尾巴的秘密
貓嘅尾巴由 18 – 23 節尾椎骨組成，每一節都有肌肉控制，令到條尾可以靈活擺動。
雖然貓唔識講嘢，但佢哋經常透過耳朵、貓尾、身體姿勢嚟表達自己嘅情緒。
「貓尾巴」除咗幫助貓保持平衡，仲係表達情緒嘅重要工具！
舉例嚟講：
- 遇到敵人時：尾巴炸毛，身體壓低，瞳孔放大、鬍鬚張開
- 覺得煩躁時：尾巴大力拍打地面，發出「啪！啪！」聲
- 心情靚、充滿自信時：尾巴高高舉起，步伐輕盈
- 興奮時：瞳孔放大，貓尾巴顫抖
尾巴高舉——自信、開心
當貓尾巴高舉，代表佢而家充滿自信、心情愉快，或者對你特別親近。
呢種行為可以追溯到貓咪幼年時期，當貓媽媽舔舐小貓幫助排泄時，小貓會本能地將尾巴舉高。
雖然大個咗已經唔再需要咁做，但如果貓喺你面前仍然習慣性舉高條尾，甚至尾尖輕微勾起，就代表佢好鍾意你，向緊你撒嬌！
尾巴輕微顫抖——開心與興奮
當貓咪見到鍾意嘅人、食物，或感興趣嘅獵物時，貓尾巴顫抖，代表極度開心或興奮！
如果你發現貓喺你行近時條尾係咁震，仲用個頭輕輕蹭你，咁恭喜你！呢個係滿滿嘅愛意同期待！💖
尾巴夾緊——害怕、不安
當貓咪夾實條尾、收埋喺雙腿之間，通常表示佢感到緊張、不安或害怕。
如果你抱貓嘅方式令佢覺得唔舒服，佢都可能會夾實條尾，呢個貓尾巴意思就係：「放開我，我唔舒服！」
呢個時候建議放鬆雙手、畀佢多啲安全感，等佢主動行埋嚟！
貓炸毛——驚嚇、受威脅
當貓咪感受到威脅或嚇親時，全身毛髮會豎起，尾巴炸毛，試圖令自己睇起嚟大份啲，嚇走對方。
同時，貓可能會拱起背、齜牙、哈氣，發出低沉嘅警告聲。
喺呢種情況下，請畀貓咪足夠嘅空間，唔好強行安撫，以免佢誤會你都係威脅來源！
尾巴左右擺動——唔耐煩、準備攻擊
當貓左右大力甩尾，甚至用力拍打地面，代表佢開始唔耐煩、嬲嬲豬，或者準備攻擊！
呢個時候千祈唔好再搞佢，如果唔係可能會被「貓拳」招呼！
常見於：
- 摸貓唔鍾意嘅部位（例如肚、尾巴根部）
- 貓準備打交或捕獵時
尾巴環繞身體——緊張或唔舒服
當貓咪坐低時將條尾緊貼身體，甚至圍住自己，可能表示焦慮、害怕，或者身體唔舒服。
如果貓長時間維持呢個姿勢，並且精神不振，建議觀察係咪有其他異常，必要時帶佢去睇獸醫檢查。
最新文章
參考資料
Cat Tail Language: What Your Cat’s Tail Is Telling You
The Tales Your Cat’s Tail Tells
延伸閱讀
Sale!
Sale!
