你屋企隻狗狗係咪成日痾軟便或者肚痾？有啲毛孩只要天氣一轉，或者食咗啲新嘢，腸胃就會即刻唔舒服。今日我哋就教大家點樣辨別狗狗嘅健康大便形狀，並推薦適合腸胃敏感狗狗嘅糧食！你有冇仔細觀察過狗狗嘅大便？其實從 狗大便 嘅形態，就可以睇得出佢嘅腸胃健康狀況！
狗狗日日都會排便，但你有冇細心留意過佢哋嘅 狗大便 形狀？其實，透過大便嘅狀態，就可以大致判斷狗狗嘅腸胃健康！根據國際通用嘅「布里斯托大便分類法」，狗狗大便可以分為7種類型：
類型1、2｜便秘
呢兩種大便呈「一粒粒硬波狀」或「凹凸不平嘅條狀」，代表水份不足，狗狗可能有便秘問題。如果發現狗狗排便時踎咗好耐都痾唔出，建議畀佢飲多啲水，並補充膳食纖維，促進腸道蠕動，幫助排便！
類型3、4｜正常健康
呢兩種大便都係「表面平滑或有少少裂紋嘅條狀」，兩者都屬於健康嘅大便狀態。尤其係表面光滑、形狀完整嘅條狀大便，更係最理想嘅健康標準！
類型5｜軟便
如果狗狗嘅大便係「一pat pat嘅軟塊狀」，或者雖然勉強呈條狀，但一夾起就容易散開、癡住地面，呢啲就屬於「軟便」。造成狗狗軟便原因可以有好多，包括飲食轉變、腸胃敏感，甚至可能係腸胃疾病嘅徵兆。尤其係腸胃未發育好嘅幼犬軟便情況亦好常見。建議主人多啲留意狗狗嘅飲食，並觀察佢嘅食慾同精神狀況！
類型6、7｜腹瀉 (肚痾)
呢兩種大便嘅水份含量極高，第6種係濕爛嘅「糊仔狀」，第7種就係完全水狀嘅腹瀉。呢類大便嘅氣味通常會比平時濃烈好多。若狗狗同時出現食慾不振或精神萎靡嘅情況，建議立即帶佢去睇獸醫！
主人必學！4招KO狗狗軟便問題
1. 定時定量餵食，食唔晒就要收起！
腸胃敏感嘅狗狗對食物嘅新鮮度要求更高。無論係乾糧、罐頭定係鮮食，長時間接觸空氣後都容易變質，尤其喺炎熱天氣下更容易滋生細菌。因此，建議定時定量餵食，如果狗狗無食晒，亦應該即刻收起，避免佢食到變質嘅食物。
2. 持續記錄飲食同腸胃狀況
腸胃敏感嘅原因好多，除咗狗狗本身腸胃較脆弱，亦可能係對某啲食物過敏而不自知！建議主人記錄低狗狗嘅飲食同大便狀況，包括食過咩牌子嘅食物、有咩成分，以及有冇出現皮膚紅腫或搔癢等問題。常見嘅致敏源包括雞肉、牛肉、羊肉、海鮮、麩質等，每隻狗狗嘅情況都唔同，需要細心觀察！
3. 轉糧時要循序漸進
腸胃敏感嘅狗狗更需要「漸進式轉糧」，畀腸胃有足夠時間適應新食物。無論係主食定零食，第一次試食都應該先畀少量，確保腸胃同皮膚無異常反應，再慢慢增加份量。一般建議轉糧過程需要7日，腸胃特別敏感嘅狗狗可以將適應時間再延長。
4. 補充寵物專用益生菌
人類同狗狗嘅腸道菌種唔同，千祈唔好畀狗狗食人食嘅益生菌！揀選適合寵物嘅益生菌，有助維持腸道菌群平衡，改善腸胃敏感問題，但需要長期服用先會見效！
腸胃敏感狗狗糧食推薦：益生菌晶球糧
延伸閱讀：
幼犬狗糧點樣揀？推薦8款熱門選擇！
