雖然貓貓身手好軟，但呢啲 NG 抱法真係要留意呀！
千祈唔好搞到屋企嘅貓大人受傷，或者唔再畀你抱抱啦！
第一種 | 雙腳吊吊揈（懸空）
有啲人慣咗直接由貓貓嘅胳肋底抱起，由得佢雙腳吊吊揈。呢個姿勢睇落好方便，但對貓貓嚟講係超級唔舒服㗎。
原因：
- 令貓貓失去支撐感，佢會覺得唔安樂甚至掙扎。
- 長期用呢種方式抱貓，可能會令貓貓以後都抗拒被人抱。
第二種 | 扯住前腳提起
直接捉住貓貓嘅前腳將佢提起身，係另一個常見嘅錯誤。咁樣唔單止會令貓貓覺得痛，仲可能整傷佢身體添。 原因：
- 貓貓嘅前腳關節頂唔順全身嘅重量，好容易拉傷。
- 呢種方式會令貓貓覺得好無助，隨時會引發攻擊行為。
第三種 | 捉住後頸（捏後頸）
唔少人以為捉住貓貓條後頸皮就可以輕鬆控制佢，其實呢招淨係啱貓 B，對成貓嚟講係極大嘅壓力來源。 原因：
- 成貓身體比較重，後頸皮根本支撐唔到全身重量。
- 夾硬用呢種方式抱貓，會令佢覺得受威脅，嚴重破壞你哋嘅感情。
4 種正確抱貓手勢
第一種 | 托住 Pat Pat 法
呢個係最常見又簡單嘅正確抱法。一隻手輕輕托住貓貓個 Pat Pat，另一隻手扶住佢個胸口。 好處：
- 夠穩陣，畀到貓貓安全感。
- 減少壓力，令貓貓更加容易放鬆。
第二種 | 上膊法
將貓貓輕輕抱上膊頭，畀佢前腳搭住你個膊頭，同時用手托住貓貓嘅下半身。 好處：
- 視野夠高，貓貓會覺得好滿足同安心。
- 適合依賴性高或者鍾意親近主人嘅貓貓。
第三種 | 抱 BB 法
好似抱 BB 咁，將貓貓反肚訓喺你手臂灣入面，輕輕托住佢身體。 好處：
- 適合放鬆嘅貓貓，等佢享受主人嘅溫暖。
- 增加親密度，係建立信任嘅好方法。
第四種 | 欖球抱法
適合好動或者怕生保嘅貓貓。將貓貓個身貼近你條側腰，佢個頭向外，輕輕用前臂托住佢個身，好似抱欖球咁。
好處：
- 適合貓貓唔鍾意正面接觸或者驚青嘅時候。
- 夠穩陣，減少壓迫感。
- 方便移動，尤其係要快手帶貓走嘅時候（例如睇獸醫）。
點樣令貓貓習慣被人抱？
- 觀察貓貓心情：揀貓貓放鬆嗰陣先抱，唔好阻住佢瞓覺或者食嘢。
- 循序漸進：剛開始可以抱一陣就算，慢慢加長時間，等貓貓適應。
- 獎勵鼓勵：抱完之後畀零食獎勵，等貓貓建立「抱抱＝好嘢食」嘅聯想。
- 避免強迫：如果貓貓掙扎或者抗拒，請尊重佢嘅意願，放返低佢，下次再試。