當主人見到狗狗嘔黃色嘔吐物，第一個反應都係好心急想知「狗狗嘔黃黃哋正唔正常？」，呢個情況確實令人擔心。
無論狗狗嘔出嚟嘅係黃色水、黃色泡定係濃稠液體，呢啲多數都代表狗狗個胃已經排空，但仍然受到刺激持續收縮，將儲存喺膽囊嘅「膽汁」或「胃液」嘔返出嚟。
亦因為狗狗嘔黃色嘅嘔吐物最常見，所以我哋特別整理咗相關資訊，幫主人深入了解原因、學識判斷症狀、提供正確嘅居家處理方式，一齊睇落去啦！
狗嘔黃色泡泡代表咩？嘔吐物形態分析
雖然話狗狗嘔黃色嘔吐物，本質上幾乎都係膽汁或胃液，但其實淨係睇顏色係唔夠㗎！
嘔吐物嘅「形態」往往可以提供更多線索：
形態1｜狗狗嘔黃色泡泡／狗狗嘔黃色水
當狗狗嘔黃色水狀液體，常見原因多數係空肚時間太耐（膽汁倒流）或腸胃受到刺激發炎，令到胃酸同膽汁一齊被嘔出嚟。
黃色泡泡狀通常係因為胃液同空氣或口水溝埋，喺嘔吐過程中形成。
不過如果情況持續或好頻密，亦可能同胰臟炎、食錯嘢、肝膽功能異常等疾病有關。
形態2｜狗狗嘔黃色黏稠物
如果胃部或食道長時間受到刺激，就可能令腸胃分泌更多黏液嚟自我保護，呢個時候嘔出嚟嘅黃色嘔吐物就會帶有濃稠黏液。
所以如果見到狗狗嘔黃色濃稠物體，就未必只係空肚咁簡單，可能要留心係咪有潛在疾病。
延伸閱讀：
狗狗嘔黃色水點算好？幾時要睇醫生？
當狗狗嘔黃色液體已經唔係單純嘅空肚問題，而係反覆出現、兼且伴隨其他症狀時，就要警覺並立即帶去睇醫生，因為好有可能係腸胃道發炎或潛在嘅嚴重疾病引起！
如果狗狗已經開始緊治療，主人可以同時做以下幾樣嘢：
狗狗嘔黃色水 處理方法1｜暫時禁食觀察
建議暫停畀所有嘢食，可以畀發炎嘅腸胃休息下，並判斷嘔吐係咪會自己停。
狗狗嘔黃色水 處理方法2｜提供少量飲水
禁食期間都要確保有乾淨水供應，但要「逐少逐少畀」，避免一次過飲太多水又引發嘔吐。如果狗狗一飲水就即刻嘔返，就要諮詢獸醫。
狗狗嘔黃色水 處理方法3｜重新引入飲食
禁食期過後如果情況穩定，可以揀啲高度易消化、低脂嘅食物（例如白烚雞柳），用少量多餐嘅方式餵食，避免一次過畀太多，確保腸胃有足夠時間適應。
狗狗嘔黃色水 處理方法4｜持續監察
觀察狗狗嘅精神、大便情況同嘔吐頻率，亦要避免狗狗食飽後做劇烈活動。
狗狗嘔黃色嘔吐物常見問題
Q1：狗狗嘔黃色水可唔可以食嘢？
建議先暫停禁食，等腸胃休息下。
等到獸醫評估情況穩定之後，再由少量、低脂、易消化嘅食物開始試起，確保腸胃負荷到。如果狗狗拒絕食嘢或持續嘔吐，請即刻求醫。
Q2：狗狗嘔黃色水使唔使即刻睇醫生？
如果狗狗嘔完黃色水之後精神好好，又冇再嘔，可以先喺屋企觀察 1 日。
但如果出現以下警號或任何異常，就代表非常危險！請立即求醫：
- 反覆嘔吐（一個鐘內嘔超過三次，或持續嘔超過 24 小時）
- 嘔吐物中帶有鮮血／咖啡渣（可能代表消化道出血）
- 精神極度不振、成隻狗軟晒
- 肚仔脹起或表現疼痛（可能係胃扭轉或異物塞住）
- 超過 24 小時都唔肯食嘢飲水