狗狗嘔係常見嘅生理現象之一，亦係判斷健康狀況嘅標準。
而狗嘔類型會區分做「反芻」同「嘔吐」，嘔出嚟嘅嘢嘅顏色、形狀同內容物都好唔同：
狗狗嘔吐類型1｜反芻
反芻係食物由食道或胃部未經消化就輕鬆、被動咁嘔返出嚟。狗狗反芻時通常唔會有肚谷谷、乾嘔等痛苦表現，而且嘔出嚟嘅多數係未消化嘅食物，狗狗有時仲會將嘔出嚟嘅嘢食返落肚。
呢個情況常見於腸胃仲未發育好嘅幼犬（BB狗）身上，多數會喺狗狗大個咗之後消失。有時亦會喺狗狗食得太快、做完劇烈運動之後出現，只要多加注意通常都會改善。
狗狗嘔吐類型2｜真正嘅嘔吐
一般嘔吐可能會見到狗狗劇烈、主動咁嘔返啲嘢或液體出嚟，通常伴隨明顯嘅腹部收縮、流口水、舔嘴唇、痛苦乾嘔等前兆。
狗狗嘔嘅原因好多，亦好複雜。只要狗狗嘔嘅次數增加、持續時間變長，或出現任何伴隨嘅異常行為，都應該視為警號，並開始觀察同記錄。
我哋會深入分析各種狗狗嘔嘅原因、嘔吐物代表嘅健康訊號，同埋正確嘅緊急處理流程，一齊睇落去啦！
狗狗嘔吐代表咩？8大常見原因必知
由單純嘅飲食習慣到複雜嘅消化系統疾病，都可能係狗狗嘔嘅因素。作為主人，了解常見原因有助快速排除風險：
狗狗嘔吐原因1｜食得太快
呢個係最常見嘅狗狗嘔吐原因之一。
當狗狗狼吞虎嚥嗰陣，會吞咗好多空氣落肚，食物未經充分咬碎或混合胃液就落到胃，導致消化不良或胃脹，進而引發嘔吐反射。
狗狗嘔吐原因2｜轉糧太快
如果突然轉狗糧牌子、加咗新嘅食物或零食，都可能令狗狗腸胃唔適應而嘔。
狗狗嘔吐原因3｜空肚太耐
當狗狗太耐冇食嘢，會令胃酸分泌過多刺激胃黏膜，導致狗狗嘔出黃色膽汁。
狗狗嘔吐原因4｜食錯異物
如果狗狗唔小心吞咗玩具碎片、骨頭、布料等消化唔到嘅嘢，呢啲異物會塞住腸胃道，引起持續性或劇烈嘔吐。
狗狗嘔吐原因5｜食錯有毒食物或植物
如果狗狗食咗例如朱古力、提子、洋蔥、木糖醇等有毒嘅人類食物，或有毒嘅家居植物，會引起嘔吐反應，呢個情況非常危險，必須立即送院！
狗狗嘔吐原因6｜潛在疾病
例如胃炎、腸炎、胰臟炎、肝腎功能異常等，都可能令狗狗持續或反覆嘔吐。
狗狗嘔吐原因7｜寄生蟲
腸道寄生蟲（例如蛔蟲）太多，亦可能刺激腸胃道引起狗狗嘔。
狗狗嘔吐原因8｜壓力同焦慮
狗狗嘔吐物顏色代表咩？5大情境辨別狀況
除咗分辨嘔吐類型同原因，嘔吐物嘅顏色同內容物更係診斷嘅重要線索！
以下由 5 種情境，帶你初步判斷狗狗嘔出嚟嘅嘢代表咩：
狗狗嘔吐情境1｜狗狗嘔糧 (未消化食物)
狗嘔食物係最常見嘅狀況，通常發生喺食完嘢冇耐，嘔吐物仲清楚睇到狗糧顆粒或形狀。
⚠️可能原因： 主要係狗狗食得太快、食得太多、食飽飯即刻劇烈運動，或者食物刺激到消化系統。
狗狗嘔吐情境2｜狗嘔黃色 (黃膽水/黃泡)
狗狗嘔黃色液體或黃色泡泡，通常係膽汁或胃液，呢個意味住狗狗個胃係空嘅。
⚠️可能原因：最常見嘅原因係空肚時間太長（例如清晨、深夜），胃酸同膽汁倒流刺激到胃黏膜。
延伸閱讀：狗狗嘔黃色代表餓太耐？由 3 種嘔吐物形態、症狀判斷使唔使送院！
狗狗嘔吐情境3｜狗嘔白泡
狗狗嘔白色黏稠嘅泡泡或口水，好多時代表胃部受到刺激。
⚠️可能原因：可能係胃部唔舒服、輕微胃炎、食道反流，或者係乾嘔 / 持續嘔吐嘅結果（嘔到淨返胃液同空氣）。
狗狗嘔吐情境4｜狗嘔啡色
狗狗嘔啡色或深褐色嘅物質，必須高度警惕！
⚠️可能原因：
- 危險： 可能係「血」經過胃酸作用後嘅顏色，形狀好似咖啡渣。呢個通常係胃部、食道或小腸上段出血嘅跡象，屬於緊急狀況！
- 非危險： 可能係啱啱食落肚嘅啡色狗糧、泥土、或者糞便（如果狗狗有食屎習慣或腸道阻塞）。
如果唔肯定係咪食物殘渣，請即刻求醫！
狗狗嘔吐情境5｜狗嘔血絲 (鮮紅或粉紅)
當狗狗嘔吐物中有血絲或少量鮮血時，通常代表上消化道有新鮮嘅損傷或發炎。
⚠️可能原因：
- 輕微： 劇烈或反覆乾嘔造成嘅食道、喉嚨或口腔黏膜撕裂。
- 嚴重： 嚴重胃炎、胃潰瘍，或食錯尖銳異物拮傷胃壁。
狗狗嘔點算好？咩情況要即刻睇醫生？
如果狗狗發生以下情況，請唔好猶豫，立即帶狗狗睇醫生，爭取黃金救援時間：
| 緊急情況 | 症狀描述 | 可能問題 (緊急) |
|---|---|---|
| 嘔吐物 | 狗狗嘔血絲或大量鮮血、狗嘔啡色（咖啡渣狀）。 | 胃潰瘍、嚴重出血、腫瘤。 |
| 嘔吐頻率 | 反覆、持續性劇烈嘔吐（例如幾小時內嘔超過 3-4 次），停唔到。 | 腸道阻塞、胰臟炎、急性腎衰竭。 |
| 精神活力 | 精神活力明顯下降、極度虛弱、昏睡、行路唔穩、發燒、嚴重脫水。 | 嚴重感染、中毒、器官衰竭。 |
| 伴隨症狀 | 劇烈肚痾（尤其係血便）、肚仔明顯脹起、掂個肚就痛、持續乾嘔但嘔唔出嘢。 | 嚴重腸胃病、胃扭轉（要即刻做手術）。 |
| 誤食毒物 | 確定或高度懷疑食錯異物或有毒食物（例如提子、朱古力）。 | 異物塞住、急性中毒。 |
狗狗嘔吐，睇醫生前要準備咩？記錄 5 大重點
為咗幫獸醫盡快診斷，請務必記錄低以下資訊：
- 時間同頻率： 第一次嘔係幾時？總共嘔咗幾多次？隔幾耐嘔一次？
- 內容同顏色： 狗狗嘔出嚟嘅係未消化食物、白泡？顏色係黃色定啡色？
- 飲食變化： 最近 24 小時內食過啲咩？有冇轉糧？
- 誤食可能： 有冇機會接觸或食錯異物、玩具、毒物？
- 其他症狀： 有冇同時肚痾、發燒、咳、冇精神？
狗狗嘔完可以食咩？飲食相關 Q&A
Q1：狗狗嘔完幾耐可以食嘢？ 要唔要禁食？
狗狗嘔完會建議先暫時禁食，禁食係畀發炎嘅胃黏膜休息同修復嘅重要步驟。
建議成犬暫停所有食物 12 – 24 小時（幼犬可縮短至 6 – 8 小時，避免低血糖）。
禁食期間，密切觀察有冇停止嘔吐，如果禁食同飲水期間都冇再嘔，就可以開始恢復飲食。
Q2：狗狗嘔完可唔可以即刻食嘢？
唔可以，但可以逐少畀水飲，確保補充水份防止脫水。
畀嘅水量應「少量多次」（每小時 1-2 湯羹），避免一次過飲太多水又刺激個胃再嘔過。
不過如果狗狗一飲水就即刻嘔返，呢個時候就唔好再畀佢飲水，盡快送院畀獸醫檢查。
Q3：狗狗嘔完，康復期可以食咩？
應由極少量、易消化、低脂嘅「流質或軟身食物」開始。
喺獸醫評估許可下，可以將少量低脂食物（例如白烚雞柳）或浸軟嘅狗糧慢慢餵畀狗狗，亦可以先餵狗狗食專用嘅腸胃處方罐頭。
Q4：狗狗嘔吐可唔可以食益生菌？
一般嚟講，喺狗狗停止嘔吐、開始恢復飲食嘅階段，可以適當添加寵物專用益生菌，幫助穩定腸胃狀況。
但請勿喺狗狗劇烈嘔吐期間強行餵食，應喺禁食期完結後，確認腸胃道穩定時再少量添加。