狗狗肺積水即係肺部組織入面積聚咗異常嘅液體，特別係原本應該充滿空氣嘅肺泡。當肺部俾水霸佔咗，氧氣交換就會受阻，導致狗狗呼吸急促、缺氧，甚至可能有生命危險。
呢種情況多數係由其他疾病引起，例如心臟病、肺炎等，所以係需要即刻送去急症處理嘅嚴重病症。
根據病因唔同，狗狗肺積水主要分為兩大類——心因性（Cardiogenic）同非心因性（Noncardiogenic）：
狗狗肺積水種類 1：心因性肺積水
心因性肺積水主要係由「心臟功能退化」導致嘅心臟病引起，心臟衰竭令肺部血管壓力升高，液體就會滲出嚟進入肺泡。常見心臟疾病包括：
- 二尖瓣退化性疾病（DMVD）
- 擴張型心肌病變（DCM）
- 心瓣膜功能異常
呢類病喺熟齡犬（7 歲以上）身上好常見，容易出現心臟問題嘅高風險品種有：
- 小型犬：查理士王小獵犬、芝娃娃、松鼠狗、迷你史納莎、臘腸狗、魔天使、可卡犬
- 大型犬：杜賓犬、大丹犬、聖伯納犬、紐芬蘭犬
狗狗肺積水種類 2：非心因性肺積水
非心因性肺積水就唔係由心臟病引起，成因好多而且通常發病好快，常見原因可能如下：
- 肺炎
- 氣道阻塞（腫瘤、異物）
- 低血蛋白
- 觸電（電擊）
- 遇溺（浸親）
- 中毒
- 癲癇
- 腎臟病
- 心絲蟲感染
狗狗肺積水症狀：呼吸異常係最大警號
狗狗肺積水初期症狀未必好明顯，但如果大量液體進入肺泡，狗狗會有好似遇溺咁無法呼吸嘅狀況，相當嚴重！所以如果見到以下異狀要即刻睇獸醫：
狗狗肺積水症狀 1. 呼吸相關症狀
- 呼吸急促、喘氣或擘大口抖氣
- 胸腹起伏明顯、好用力咁呼吸
- 呼吸時有「爆裂聲」或喘鳴聲（雜音）
- 濕咳（有痰聲），夜晚或運動後咳得更勁
狗狗肺積水症狀 2. 緊急症狀
- 條脷、嘴唇變藍或灰紫（發紺，即係缺氧）
- 虛弱、暈低、休克
狗狗肺積水症狀 3. 其他全身變化症狀
- 食慾差、嗜睡、唔願郁
- 體重減輕
- 頸靜脈腫脹或姿勢異常（伸長條頸嚟抖氣）
狗狗肺積水點樣治療？
狗狗肺積水嘅治療首要步驟，係喺最短時間內穩定狗狗嘅呼吸狀況、協助排走肺部或胸腔入面多餘嘅液體，急診緊急處理步驟包括：
- 氧氣治療：提高血氧濃度、減輕呼吸負擔。
- 鎮靜與休息：讓狗狗保持平靜，避免過度緊張。
- 胸腔穿刺引流：如果有胸腔積水，獸醫會用針或導管引流液體（抽肺水），改善呼吸。
之後獸醫會進行詳細檢查，再依照病因進行治療，等狗狗可以逐步恢復正常呼吸，依照狗狗肺積水種類可能會有以下治療方案：
心因性肺積水治療方案
- 利尿劑（去水丸/針）：幫手排走體內多餘水分。
- 強心藥／血管擴張劑：減輕心臟負擔。
- ACE 抑制劑：控制血壓並延緩心臟惡化。
- 長期管理：配合低鈉飲食同定期覆診。
非心因性肺積水治療方案
- 感染性原因：使用抗生素。
- 氣道阻塞或異物：需鎮靜取出或手術處理。
- 中毒或創傷性：視情況給予輸液、利尿劑或抗發炎藥物。
狗狗肺積水點樣照顧？居家護理注意事項
狗狗肺積水治療後嘅照顧極之重要，唔單止能幫狗狗維持穩定，仲可以減少再次發作嘅風險！
以下提供居家護理事項，讓狗狗逐步恢復生活質素，重新適應健康嘅日常：
狗狗肺積水照顧 1. 日常監測與用藥
喺屋企照顧嗰陣，主人可以透過觀察呼吸頻率同食藥狀況，幫手及早發現異常。
建議每日記錄狗狗喺瞓覺時嘅呼吸次數，理想狀況下應低於每分鐘 30 次；若發現呼吸急促或節奏唔規則，應即刻聯絡獸醫。
藥物方面必須嚴格遵守獸醫處方，完整服用療程先可以避免病情復發，即使狗狗肺積水已改善，都應該每 1～2 個月覆診一次，追蹤心臟同肺部功能。
狗狗肺積水照顧 2. 維持居家環境
居家環境應維持穩定嘅溫度與濕度，建議室溫約 25–28℃、濕度 55–60%，避免太凍或太熱造成呼吸負擔。
限制狗狗過於激烈嘅運動或興奮情緒，以免心跳過快導致喘氣，若發現狗狗習慣抬頭呼吸、伸長條頸瞓覺或唔肯瞓平，代表可能有呼吸窘迫，應即刻覆診。
狗狗肺積水照顧 3. 管理飲食與水份
飲食上應以低鈉（低鹽）為原則，可喺獸醫指導下選擇心臟處方糧，亦可以補充有助心臟健康嘅營養素，如牛磺酸、Omega-3 等。
至於飲水部分，由於利尿劑會增加排尿量，狗狗更容易脫水，應鼓勵多飲水；若胃口唔好，可改餵濕糧（罐罐）增加水份攝取。
亦建議所有飲食或營養補充嘅調整都應事先諮詢獸醫，以確保安全！
狗狗肺積水點樣預防？
除咗無法預測嘅非心因性肺積水，狗狗肺積水大多係由心因型引起，因此預防重點在於「及早發現潛在疾病」與「維持狗狗心肺健康」為主。
建議主人定期帶狗狗進行完整身體檢查（每年或每半年一次），協助獸醫及早檢測心臟病、肺部問題或其他慢性疾病，並喺初期介入治療。
平時都要控制狗狗體重、維持均衡飲食，避免肥胖增加心臟負擔，同時避免長期處於壓力環境，讓狗狗嘅心臟與呼吸系統都能保持穩定健康。
狗狗肺積水常見問題
Q1：狗狗肺積水飲唔飲得水？
飲得，而且更加要鼓勵狗狗多飲水！
狗狗肺積水並唔係飲水造成嘅，反而如果有食利尿劑（去水丸）嘅話，更要保持水份充足，亦可以食濕糧增加水份攝取，並避免高鹽飲食。
Q2：狗狗肺積水會唔會好返？
會唔會斷尾要睇病因。
若係中毒、遇溺等可逆原因，治療後可完全康復；若係心臟病導致，就需要長期食藥控制。
Q3：狗狗肺積水可以活幾耐？
狗狗肺積水壽命會依病因、嚴重程度與治療成效而異。
若病情穩定且長期管理得當，仍能維持良好生活質素㗎！