狗仔係咪傷風呀？分清8種狗仔傷風症狀，4個護理貼士幫手康復

當屋企嘅毛孩突然係咁打乞嗤、流鼻水，甚至冇晒精神，好多主人第一個反應都係：「狗狗係咪傷風呀？」

我哋首先要搞清楚，狗狗傷風同人類傷風係唔同嘅，狗狗亦唔會直接俾人傳染到傷風，但佢哋確實會感染一啲病原體，導致出現「類似」人類傷風嘅病徵。

而且，當狗狗冷親或者身處溫差大嘅環境，確實會減弱佢哋嘅免疫系統功能，令佢哋更容易俾病毒或細菌攻擊，跟住出現病徵。所以，做足保暖對預防呼吸道感染係非常重要！

狗狗傷風嘅病徵同人類傷風好似，而主人認得以下病徵係首要任務：

• 打乞嗤：呢個係常見嘅初期反應，可能係因為敏感或者傷風病毒引起。
• 流鼻水：初期多數係清水鼻涕，後期可能會變濃稠或者呈黃綠色嘅膿。
• 咳嗽：狗狗傷風咳嘅聲好多變，可能係粗糙嘅乾咳，亦可能係濕咳。
• 鼻塞：可能會見到狗狗呼吸淺咗，或者呼吸時有濕嗒嗒嘅聲。
• 食慾不振：狗狗對平時鍾意嘅嘢食或零食反應冷淡，甚至完全唔食嘢。
• 精神不佳/嗜睡：狗狗比平時更顯得懶散、冇力，唔願郁動。
• 發燒：體溫如果高過 39.5°C 就當係發燒。主人可以留意狗狗個鼻頭會唔會乾熱。
• 眼睛發炎、分泌物增多：流眼水、眼仔多咗分泌物，眼紅腫或者發炎都係常見病徵。

如果屋企有幼犬、老犬或短鼻狗（好似法虎、八哥），因為佢哋嘅免疫系統比較弱，或者呼吸道構造特別，感染之後更容易惡化成肺炎呢啲嚴重病，主人要特別留意！

延伸閱讀：狗房咳係咩嚟？狗狗狂咳元兇就係佢！認識病徵同預防方法

如果狗狗只係輕微打乞嗤、流透明鼻水、精神正常，主人可以先留喺屋企觀察一兩日，好多狗狗如果免疫力足夠，通常會自己好返。

但只要出現以下任何一種情況，就一定要盡快睇獸醫：

• 嚴重嗜睡、唔食唔飲：代表身體負荷大咗，可能唔只係單純傷風咁簡單。
• 持續高燒唔退：體溫持續偏高（>39.5°C），需要獸醫評估原因。
• 呼吸困難：包括張開口呼吸、喘氣明顯快咗，呢啲係緊急情況。
• 病徵持續惡化：例如咳得更嚴重、鼻涕變濃、開始嘔，拖咗超過兩三日等。

帶狗狗睇獸醫，除咗可以治療傷風本身，更因為好多更嚴重嘅病初期睇落都「好似傷風咁」，獸醫可以透過檢查排除呢啲可能性，避免耽誤治療黃金時間。

延伸閱讀：狗瘟病徵易忽略？死亡率超高！預防係最好嘅治療方法

照顧傷風狗狗嘅重點係要紓緩病徵，等佢身體復元同避免進一步感染。以下係最實用嘅居家護理方法：

俾狗狗留喺溫暖、乾爽、冇冷風吹嘅地方。充足嘅休息可以令佢身體更快復元。

鼓勵狗狗飲多啲水，亦可以俾啲清淡、易消化嘅嘢食佢，咁就可以幫佢補充水份同埋提供番啲能量。

如果狗狗鼻塞得好嚴重，可以開部加濕器，或者帶狗狗去充滿蒸氣嘅浴室等一陣，咁可以幫佢呼吸暢順啲，同埋令啲鼻涕易啲流出嚟。

用濕咗溫水嘅毛巾，輕輕抹走狗狗眼同鼻嘅分泌物，咁樣可以避免細菌滋生，亦都會令狗狗舒服啲。

如果狗狗嘅感冒徵狀比較嚴重，或者有發高燒、脫水、呼吸困難等等情況，獸醫會根據檢查結果提供以下治療方案：

• 抗生素：當確認係細菌感染時會用，幫手控制病源。
• 靜脈輸液：補充水份同電解質，預防或者改善脫水，亦可以幫身體新陳代謝。
• 氧氣治療：當呼吸困難、喘氣明顯嗰陣，會提供穩定嘅氧氣幫手呼吸。

呢啲治療主要係針對中度至嚴重嘅徵狀，目的都係想狗狗快啲好番，同埋避免病情惡化。

千祈唔可以！狗狗感冒嘅藥物一定要由獸醫診斷之後先可以開，主人千祈唔好自己餵藥！

因為人食嘅感冒藥入面嘅成份（例如乙醯胺酚）對狗狗嚟講可能係劇毒，會搞到肝臟受損、呼吸有問題，甚至會致命㗎！

狗狗感冒唔只會唔舒服，作為主人都會好辛苦，所以預防永遠勝於治療。只要喺日常生活做好以下幾樣嘢，就可以大大減低狗狗感冒嘅機會喇：

根據獸醫建議，定期帶狗狗去打疫苗，尤其係預防博德特氏菌（狗房咳）等呼吸道疾病嘅疫苗，對成日出街或者會接觸其他狗狗嘅毛孩嚟講特別重要。

伸延閱讀：狗狗疫苗 2026 指南｜五合一/八合一/瘋狗症疫苗收費同時間表一覽

天氣凍或者溫差大嗰陣，要幫狗狗做好保暖功夫，亦要避免佢哋長時間留喺潮濕或者凍嘅地方。穩定嘅環境可以減低狗狗感冒嘅風險。

盡量唔好畀狗狗同病咗嘅狗仔玩，亦都唔好共用玩具、水兜等物品。如果屋企新帶隻狗仔返嚟，建議先隔離兩星期，密切留意佢嘅健康狀況。

定期清潔狗仔嘅狗竇、周圍環境，仲要每日洗乾淨水兜同食糧兜，咁做可以減少細菌滋生，令狗狗冇咁容易病。

均衡飲食、吸收到足夠營養，加埋定時做運動同足夠休息，呢啲都係維持狗狗健康、增強抵抗力嘅重要關鍵。

以下整理咗幾個主人最常遇到嘅疑問，幫你更快掌握狗狗傷風時嘅照顧方向：

有啲輕微嘅傷風症狀，狗狗確實可能靠自己免疫力康復。

但係咁唔代表可以唔理佢，喺觀察期間，如果症狀冇好轉、反而惡化，或者精神同食慾都變差，就應該盡早帶佢去睇獸醫喇！

一般嚟講，症狀會持續 1 至 2 個星期左右。

但如果超過 3 日都完全冇改善，或者症狀越嚟越明顯，就建議唔好再拖，盡快帶佢去睇醫生檢查清楚。

傷風本身唔會令狗狗突然飲好多水，但病嗰陣確實需要補充多啲水分。

足夠嘅水分可以幫助身體新陳代謝，令喉嚨保持濕潤，減輕不適，但主人只要確保狗狗有正常飲水就得，唔需要強迫佢。

• https://www.animalclinicofwoodruff.com/pet-blog/vaccinations/when-pets-get-the-sniffles-understanding-cold-symptoms-in-dogs-and-cats
• https://www.petmd.com/dog/general-health/can-dogs-catch-a-cold
• https://www.four-paws.org/our-stories/publications-guides/when-your-dog-has-a-cold-what-to-do
• https://www.four-paws.org/our-stories/publications-guides/when-your-dog-has-a-cold-what-to-do