犬舍咳（Kennel Cough）嘅正式醫學名叫「犬傳染性呼吸道疾病複合症」（Canine Infectious Respiratory Disease Complex, CIRDC），臨床上好多時都會叫做「犬傳染性支氣管炎」或「犬窩咳」。呢種病就好似人類嘅傷風感冒咁，係一種傳染力好強嘅呼吸道疾病。
犬舍咳嘅傳染力好勁，主要經由飛沫傳播，或者接觸到受污染嘅嘢而感染。
之所以叫做「犬舍咳」，正正因為呢種病好容易喺多狗聚集、高風險嘅地方發生，好似寵物酒店、寵物美容院、狗公園或者收容所咁。只要有隻狗狗感染咗，周圍其他狗狗都好容易會中招。
犬舍咳點樣傳染？病原體係咩？
好多狗主誤以為犬舍咳係由單一一種細菌或者病毒引起嘅，但其實，佢係「病毒」加上「細菌」混合嘅結果，通常都係由複合感染造成。
- 常見細菌：最主要嘅細菌元兇係博德氏菌（Bordetella bronchiseptica），另外亦都好常會合併埋黴漿菌（Mycoplasma）感染。
- 常見病毒：包括副流行性感冒病毒、犬腺病毒第二型、以及犬瘟熱病毒等。
正正因為病原體又多又複雜，所以犬舍咳喺預防同控制方面，需要多方面著手處理。
犬舍咳會唔會傳染俾人？
大部分情況下都唔會，犬舍咳主要係喺狗狗之間傳播。
唯一特別嘅例外係主要嘅細菌病原「博德氏菌」，喺極少數情況下，佢可能會感染免疫系統嚴重較弱嘅人類社群（例如緊係做緊化療嘅病人），但呢類個案喺醫學上非常罕見。
所以一般健康嘅狗主唔使太過恐慌，只要做好基本嘅衛生清潔就得㗎喇。
狗狗犬舍咳有咩症狀？從聲線、行為去觀察
想知狗狗有冇感染，最明顯嘅犬舍咳症狀就係「咳嘅聲」。
- 典型聲音：狗狗會發出單聲、好乾同響亮嘅咳聲，聽落好似「鵝叫聲」咁，或者喉嚨好似哽住嘢咁，發出「卡卡」聲。
- 伴隨行為：喺劇烈咳嗽之後，狗狗好常會伴隨作嘔嘅動作，甚至嘔出白色嘅泡沫，呢啲經常俾狗主誤以為係腸胃唔舒服嘅嘔吐，但其實係呼吸道嘅問題。
- 其他症狀：輕微流鼻水、打乞嗤，同埋眼仔有分泌物。
雖然大部分症狀都係輕微，但如果發現狗狗有發燒、完全冇晒食慾、冇晒精神或者呼吸困難，呢個可能係病情惡化到變肺炎嘅警號，一定要即刻睇獸醫。
犬舍咳會唔會好？幾耐會好番？
首先，對於免疫力正常嘅成年狗狗嚟講，犬舍咳好多時都似人類普通傷風感冒咁，時間到咗就會自己好番。通常輕症嘅狗狗一般喺 7 到 10 日，或者 1 到 3 個星期內會自己好番。
但如果係幼犬、老犬或者本身有慢性病嘅狗狗，康復期可能需要長達 6 個星期先至會完全好番，而且呢類群組較容易惡化成重症。
值得留意嘅係，就算啲症狀完全消失晒，狗狗喺康復後嘅幾個星期甚至幾個月內，身體裡面仍然可能會排出病菌，都仲有傳染力，所以出街嘅時候都仲要小心啲。
犬舍咳有咩治療方法？
針對犬舍咳嘅治療，獸醫會根據病情嘅嚴重程度，決定治療方案。
狗房咳治療方法1｜支援性療法
如果狗狗嘅症狀輕微，通常都唔使食咁重藥，主力紓緩佢哋唔舒服嘅症狀。
獸醫可能會開啲止咳藥幫狗狗止咳，等佢冇咁辛苦，或者再加啲消炎藥，等狗狗瞓得舒服啲，靠佢哋自己免疫力去好返。
狗房咳治療方法2｜抗生素治療
通常係懷疑有細菌繼發感染，又或者病情惡化變咗肺炎，先至會用到抗生素。
不過唔係所有患狗房咳嘅狗狗都一定要用抗生素，而且一定要經過獸醫評估先可以開藥方。
狗房咳治療方法3｜霧化治療
霧化治療係將生理鹽水或者獸醫開嘅藥，變成好幼細嘅霧氣，等狗狗直接吸入氣管。
可以幫手滋潤乾燥嘅氣管、軟化痰液、減少刺激性嘅咳，等狗狗更容易咳出濃痰，呼吸都會舒服啲。
⚠️ 重要提示：如果你懷疑狗狗染咗狗房咳，千祈唔好俾狗狗食人用嘅感冒藥！
人用藥物嘅成份同劑量，對狗狗嚟講可能係有毒嘅，甚至可能會引致呼吸困難、休克或者中毒，好危險㗎！
狗房咳照顧貼士點做？
當狗狗染咗狗房咳喺屋企休養嗰陣，除咗要配合治療，做足下面呢啲照顧貼士，都可以令佢哋舒服好多，加快好返：
- 做好隔離：最緊要係將病咗嘅狗狗，同屋企其他狗狗完全分開，防止交叉感染。
- 減少刺激氣管：帶狗狗出街去廁所嗰陣，請改用胸帶代替傳統狗帶，避免狗帶勒住氣管，搞到佢哋咳得仲勁。
- 環境管理：保持居住環境通風，但要避免溫差太大。建議用加濕機，或者帶狗狗入浴室，吸番沖涼水留低嘅水蒸氣，濕潤嘅空氣有助於舒緩乾燥發炎嘅呼吸道。
- 作息調整：限制劇烈運動，盡量都唔好俾狗狗太興奮，同埋要確保俾足夠水分同營養，補充體力。
狗房咳疫苗打唔打得？
可以，狗房咳疫苗係目前最有效嘅預防方法，雖然唔可以百分百阻止感染，但係可以大大減低發病嘅機會，同埋令到感染後嘅症狀更輕微，冇咁易惡化。
以下呢幾類屬於高風險嘅狗狗，建議優先打針：
- 經常去寵物公園、狗狗聚會、訓練班嘅狗狗
- 會住寵物酒店或者去日托中心
- 多狗家庭、狗房、收容所
- 日常生活中經常接觸其他狗狗嘅毛孩
如果唔肯定自己隻狗狗需唔需要打，建議同獸醫傾下狗狗嘅生活模式同接觸風險，如果係一般家庭狗狗，亦請同獸醫討論番合適嘅接種計劃。
狗房咳疫苗打針前注意事項
狗房咳疫苗注意事項1｜屬於非核心疫苗
狗房咳疫苗唔似狗瘟、狗腸炎（犬小病毒）咁係必須要打嘅核心疫苗，但只要有外出同社交需要嘅狗狗，打咗針都可以大大減低感染風險。
犬房咳疫苗重點2｜保護力有限，但大大減低惡化風險
現時疫苗主要係針對博德氏桿菌（Bordetella bronchiseptica）。
不過犬房咳有時會係多種病原體共同引起，包括：
- 狗副流感病毒
- 狗腺病毒第二型
- 其他細菌同病毒
所以疫苗唔能夠百分百阻止感染，但可以令病徵輕微啲，仲可以減低惡化成肺炎嘅機會。
犬房咳疫苗重點3｜疫苗形式有兩種
點樣預防犬房咳？
除咗打犬房咳疫苗，日常護理都可以有效減低感染風險，以下係我哋建議嘅犬房咳預防方法：
- 保持通風清潔：定期消毒屋企環境，令病原體唔容易留低。
- 外出後清潔：抹乾淨狗狗嘅腳、心口同口鼻周圍，減少帶病原體返屋企。
- 避免去人多擠迫嘅地方：盡量唔好帶狗狗入密閉、人多擠迫嘅室內地方。
- 避開生病狗狗：見到有咳、流鼻水嘅狗狗就應該保持距離。
- 飲食均衡：提供優質蛋白質同均衡營養，保持抵抗力。
參考資料
- https://www.akc.org/expert-advice/health/kennel-cough-in-dogs/
- https://www.petmd.com/dog/conditions/respiratory/kennel-cough-dogs-what-are-symptoms-and-how-kennel-cough-treated
- https://www.bluecross.org.uk/advice/dog/health-and-injuries/kennel-cough
- https://www.avma.org/resources-tools/pet-owners/petcare/canine-infectious-respiratory-disease-complex-kennel-cough
- https://www.msdvetmanual.com/respiratory-system/respiratory-diseases-of-small-animals/kennel-cough
- https://www.vet.cornell.edu/departments-centers-and-institutes/riney-canine-health-center/canine-health-topics/risks-kennel-cough