狗狗分離焦慮症點算好？4 大治療方法紓緩狗狗焦慮情緒！

狗狗日日都陪住我哋生活，但當我哋出街嗰陣，有啲狗狗可能會好唔安樂，驚到震晒，呢種情緒問題，就係患咗「分離焦慮症」。

狗狗分離焦慮症係心理同行為問題，當狗狗同主人分開嗰陣，會覺得極度焦慮同驚慌。咁唔單止會影響狗狗嘅心理健康，仲可能搞到佢哋有破壞行為、健康變差，甚至影響埋主人嘅日常生活。

如果你屋企隻狗狗都受緊分離焦慮困擾，我哋會同你一齊了解狗狗分離焦慮嘅成因、症狀同埋紓緩方法，幫狗狗建立安全感，等佢可以安安心心等你返屋企！

以下係狗狗分離焦慮症嘅常見表現，當狗狗自己一個嗰陣，如果成日出現兩種或以上行為，就要提高警覺啦：

• 狂吠或者悲鳴：主人離開後吠個不停，甚至叫到聲沙。
• 破壞行為：咬爛傢俬、鞋或者有主人氣味嘅嘢。
• 周圍屙尿便便：就算訓練得幾好，都可能喺屋企亂屙。
• 行嚟行去、坐立不安：好難靜落嚟，精神好繃緊。
• 舐/咬手腳：變成自殘行為，嚴重嘅仲可能搞到發炎感染。
• 食嘢胃口變差：可能會暴飲暴食，或者完全冇晒胃口。
• 嘗試逃走：抓門、扒地，甚至想開窗走佬。
• 過度依賴同黐身：主人一有要走嘅跡象就即刻心慌慌。
• 不停流口水、震晒：出現生理性嘅焦慮反應。

可以裝部cam睇吓狗狗自己一個嗰陣嘅行為，如果兩種或以上行為持續出現，甚至影響到佢哋嘅日常生活，咁就好大機會係分離焦慮啦！

狗狗分離焦慮嘅成因可以有好多種，可能係由先天或者後天因素引起：

• 特定品種，例如貴婦狗、博美犬、芝娃娃等等，會比較容易出現焦慮傾向。
• 天生膽小怕事、對主人過份依賴嘅狗狗，會比較難自己一個。

• 環境轉變（例如搬屋、主人生活習慣有變、屋企有新成員加入）。
• 曾經俾人棄養、住過動物收容所或者俾人虐待過。
• 長期缺乏陪伴或者刺激。
• 狗狗隨住年紀大咗，變老之後，都可能會出現老狗分離焦慮症。

想了解更多【狗狗不停吠】：狗狗不停吠點樣改善？「聽得明」呢8種原因，照顧好狗狗需要！

如果唔及時處理分離焦慮，狗狗可能會長期活喺恐懼之中，導致行為問題惡化、健康變差。不過唔使擔心嘅，其實只要掌握到正確嘅方法，大部份狗狗都可以慢慢好返！

以下為大家整合咗 4 個實用方法，幫你改善狗狗分離焦慮嘅情況：

改善狗狗分離焦慮嘅第一步，就係透過行為訓練，幫狗狗慢慢習慣自己一個，仲要建立佢嘅安全感。

以下為大家準備咗「狗狗分離焦慮訓練」懶人包，幫狗狗逐步適應脫敏訓練！

1. 由模擬出門做起：每日重複做「攞鎖匙、着鞋」呢啲動作，等狗狗慢慢習慣，唔再咁敏感。
2. 短時間離開屋企：起初只係離開 1～2 分鐘，再慢慢加長獨處時間。
3. 平靜出入屋：出門口同返屋企都要保持平靜，避免太情緒化。
4. 分房練習獨處：就算喺屋企，都要俾狗狗自己留喺另一個房，慢慢加長時間。
5. 建立基本指令訓練：好似「坐低」、「等等」，增強狗狗嘅安全感同穩定性。
6. 正向鼓勵獎勵：當狗狗自己一個嗰陣表現平靜，或者達到訓練目標，就要即刻獎勵佢（好似零食或玩具）。咁樣可以幫狗狗對分離建立正面聯想。

想狗狗喺主人唔喺度嗰陣都安心，幫佢整一個覺得安全又放鬆嘅環境，係好重要㗎。

以下有幾個方法，可以有效幫狗狗提升安全感：

• 設置專屬空間：俾佢一個固定、安靜嘅角落，放啲有主人氣味嘅舊衫或者毛毯，等狗狗覺得熟習。
• 增加運動同心智刺激：每日安排散步、跑吓步呢啲活動，仲要俾啲益智玩具或者嗅聞遊戲，幫狗狗放鬆。
• 安排人陪伴：如果需要長時間外出，可以搵信任嘅屋企人，或者專業寵物保姆去陪狗狗，等佢冇咁孤單。

想知多啲【狗狗夜晚唔瞓】：狗狗夜晚唔瞓？可能係身心出問題！5大改善方法幫狗狗安心入睡

有啲狗狗嘅焦慮情況可能會比一般嚴重，呢個時候就需要專業人士介入幫手。

以下係可以考慮嘅專業做法：

• 諮詢獸醫或訓練師：專業人士可以幫你確定狗狗係咪有潛在嘅健康或心理問題，排除其他疾病可能性。
• 制定個別化訓練計劃：根據狗狗嘅性格同症狀，設計專屬嘅訓練策略。
• 安排專業訓練課程：搵有認證嘅行為訓練師進行一對一輔導，可以加快狗狗改善嘅速度。

如果狗狗嘅焦慮情況嚴重到淨係靠訓練都搞唔掂，獸醫可能會建議配合藥物治療，幫佢穩定情緒，提升訓練效果。

以下係關於狗狗分離焦慮藥物嘅注意事項：

• 要配合訓練用：藥物唔係唯一解決方法，一定要配合行為訓練先至會有效。
• 一定要經獸醫評估同處方：千祈唔好自己餵藥，要由專業獸醫根據狗狗情況，決定藥物種類同劑量。
• 要定期覆診追蹤：食藥期間要跟足獸醫指示，持續觀察有冇副作用同改善情況，有需要嘅時候就要調整劑量。

想幫狗狗舒壓食乜好？毛掌醫學好情緒保健肉泥 含足夠情緒放鬆成分，幫狗狗舒壓、保持良好睡眠，隨時隨地補充有助安撫情緒！👉即睇詳情

狗狗分離焦慮症並唔係扭計，而係源於佢哋內心嘅不安同恐懼。

主人只要有耐性，再配合正確嘅訓練同照顧方法，就可以幫到狗狗慢慢習慣獨處，回復平靜。及早發現，及時處理，就可以守護到毛孩嘅心理健康啦！

• https://www.humaneworld.org/en/resources/calm-dog-separation-anxiety-symptoms
• https://animalemergencyservice.com.au/blog/separation-anxiety-in-dogs/
• https://www.dogstrust.org.uk/dog-advice/understanding-your-dog/separation-anxiety-in-dogs
• https://bestfriends.org/pet-care-resources/separation-anxiety-dogs-causes-signs-and-solutions
• https://www.petmd.com/dog/conditions/behavioral/separation-anxiety-dogs
• https://vcahospitals.com/know-your-pet/separation-anxiety-in-dogs
• https://www.akc.org/expert-advice/training/dog-separation-anxiety/