雖然狗狗仲保留到消化生肉蛋白嘅能力，有啲支持者覺得狗狗食生肉嘅好處包括水份高、符合「原始飲食」同埋更加天然等等嘅講法，但其實，呢個唔代表生肉對狗狗嚟講係好嘅選擇嚟㗎！
根據好多獸醫同專家嘅意見，生肉潛藏住以下風險，對狗狗健康有好大威脅：
狗狗食生肉壞處1. 細菌感染同食物中毒
未煮熟嘅肉類係寄生蟲同沙門氏菌、大腸桿菌等細菌嘅溫床，呢啲病原體唔止會搞到狗狗嘔、肚瀉，亦都可能會污染屋企環境，令主人同屋企人受到感染。
狗狗食生肉壞處2. 營養可能唔均衡
好多人會直接餵狗狗食生肉，但這好難做到營養比例啱啱好。狗狗如果長遠營養唔均衡，可能會搞到骨骼發育唔正常，腎臟負荷過重。
狗狗食生肉壞處3：容易吞到骨頭
好多生肉入面仲會有骨頭碎片，如果冇處理乾淨，好容易搞到窒息、刮傷喉嚨或者腸道阻塞。
雖然生肉真係好有風味，但風險始終遠遠大過潛在嘅好處！
所以不如唔好冒險，直接餵安全、均衡嘅狗糧，對主人嚟講唔單止唔麻煩，仲可以確保到齊全營養，係最好嘅主食選擇。
狗狗點樣安全食肉？安全餵食指南
如果想狗狗可以食到肉嘅美味，都係建議將肉類煮熟，好似水煮雞胸肉、瘦豬肉或者牛肉咁，仲要跟住以下原則：
- 攞走骨頭同皮：避免搞到窒息或者消化道塞住。
- 剪走多餘脂肪：對於有胰臟病或者過重嘅狗狗嚟講特別重要。
- 唔好加調味料：避免有鹽、蒜粉、洋蔥粉等等對狗有害嘅成分。
- 切細塊或者攪碎啲肉：方便佢哋咬同消化。
都建議你哋喺幫狗狗調整飲食或者加新食材之前，應該問咗獸醫意見先，確保整體營養比例平衡，同埋配合返狗狗嘅年齡同健康狀況！
狗狗唔小心食咗生肉點算好？
如果狗狗只係食咗少少跌落地嘅生肉，一般嚟講都唔會有咩大問題。
但如果啲肉質素唔好，或者保存得唔啱，可能搞到狗狗唔舒服，就要密切留意有冇以下呢啲症狀：
- 嘔
- 肚痾
- 肚痛
- 發燒
- 冇晒精神
- 冇胃口
- 屙屎唔正常
如果狗狗出現任何異常情況，就應該即刻帶佢去睇獸醫，獸醫會按狗狗嘅年齡、病歷同食咗幾多嚟評估，睇吓需唔需要再進一步檢查或者治療。
⚠️ 溫馨提示：生肉入面嘅寄生蟲或者細菌唔單止會危害狗狗，仲可能會透過佢哋嘅排泄物傳染俾人，所以處理完生肉之後，一定要徹底洗手同消毒，先好接觸狗狗。
狗狗食生肉常見問題
Q1：狗狗食生肉會唔會變惡？
狗狗食生肉係唔會變惡㗎。
好多狗狗食咗生肉之後，出現嘅「野性行為」，其實係因為啲嘢食太香，想「護食」啫，唔係真係激發咗佢哋嘅野性。
但呢個情況唔係淨係食生肉先會出現，只要狗狗食到好食嘅嘢，都可能會係咁。
Q2：狗仔食生肉會唔會死㗎？
雖然唔係成日見到，但如果生肉入面有好多細菌或者寄生蟲，真係有機會搞到狗仔嚴重感染，甚至會有生命危險。
所以萬一見到狗仔持續嘔、肚瀉或者冇晒力嘅情況，千祈要嗱嗱聲帶佢去睇獸醫。