貓牙痛慘過大病！主子流口水、唔食嘢？口腔發炎徵兆與舒緩法

你屋企隻貓貓係咪突然唔食嘢？身為剷屎官，我哋最驚就係見到原本為食嘅主子，突然對住個碗發呆。

好多人第一時間以為佢係「揀飲擇食」或者扭計，但其實，拒食背後可能收埋咗健康警號，特別係貓牙痛！無論係口腔發炎、有壓力，定係單純轉季冇胃口，貓貓一旦超過兩日冇食嘢，後果可大可小。

呢篇文章幫你整理出 6 大常見嘅「拒食原因」，重點拆解貓牙痛特徵同解決方法，等你唔使再亂估，把握黃金時間幫主子止痛！

貓貓同人類一樣，感冒嗰陣會冇胃口。尤其係貓感冒（上呼吸道感染），鼻塞塞聞唔到食物陣味，自然就唔想開口食嘢。

點樣令貓貓肯食返嘢？
可以轉食味道比較濃郁嘅罐罐（例如三文魚、吞拿魚口味），或者將罐罐隔水座暖（大約 35-40 度），等香氣飄出嚟，就可以引誘到佢開金口。

不過，如果你發現貓貓係咁打乞嗤、流鼻水、眼仔流晒分泌物，咁就唔只係單純唔想食嘢，建議快啲帶去畀獸醫 Check 下。

貓貓忍痛能力好高，但貓牙痛真係慘過大病！常見嘅牙石、牙周病（牙肉紅腫發炎），甚至係口腔生痱滋（口炎）或腫瘤，都會令貓貓痛到「想食又唔敢食」。

點樣 Check 主子有無貓牙痛？
你可以觀察有無以下徵兆：

• 口臭嚴重：一開口有陣腐爛味。
• 流口水：口水多到整濕個下巴，甚至滴落地。
• 怪異食相：衝埋去個碗度想食，但咬一啖就跌返出嚟，或者發出怪叫跑走。
• 外觀異常：嘴角有血絲，或者牙肉紅腫。

如果中咗以上幾點，好大機會係口腔發炎，唔好拖，即刻睇醫生！平時定期幫佢刷牙同做口腔檢查，先可以慳返將來剝牙嘅辛苦同醫藥費。

貓貓吞咗唔應該吞嘅嘢（如膠袋、繩、橡筋），又或者有慢性腸胃炎、胰臟炎、嚴重便秘，甚至係腎病，都會令佢哋反胃。

呢啲內傷用肉眼睇唔出。如果你見到貓貓好似有啲肚餓，但行到埋個兜前面又猶豫不決，聞兩聞就走開，呢個其實係佢「覺得唔舒服但又講唔出口」嘅求救訊號。

如果排除咗感冒同貓牙痛，建議要做個詳細身體檢查（驗血/照超聲波）先知發生咩事～

貓唔食嘢，其中一個常見原因係心臟病，特別係年紀大嘅貓貓。只要發現佢變得冇胃口、長期懶洋洋、行幾步就喘氣（開口呼吸），就要盡快帶去獸醫檢查。

另外，有時轉食心臟病處方糧，貓貓可能會因為唔鍾意陣味而拒食。貓對口感同氣味非常執著，夾硬餵只會令佢更抗拒。應該同獸醫商量，調整成貓貓肯食、又兼顧到病情嘅配方，咁樣治療先至有效。

這叫「食物厭惡」：貓貓喺病緊或住院期間，可能會對某啲食物產生「陰影」。因為佢哋會將「身體唔舒服」同「嗰隻罐罐嘅味」連結埋一齊。

如果你發現佢一聞到熟悉嘅味道就擰轉面走，唔使急住逼佢食，可以轉下口味、轉下質地（例如將肉泥狀轉成肉絲款，或者試下有湯汁嘅）。貓貓有時唔係唔肚餓，只係「個心過唔到去」。

貓貓嘅心情會直接影響食慾。有時只係屋企多咗啲噪音、搬過傢俬，或者有新成員（人/貓/狗）加入，都會令佢壓力爆煲，連飯都唔想食。

常見壓力來源：

• 裝修施工聲（佢哋超級驚電鑽聲！）
• 突然多咗個「室友」，地盤被侵佔
• 食兜、貓砂盆位置大兜亂
• 同其他動物不和，搞到佢唔敢行近食物區

解決方法：畀佢一個安靜、安心嘅食飯空間。將個兜放喺固定、唔會受騷擾嘅角落，等佢覺得安全，先會慢慢搵返個胃口。

幼貓（BB 貓）比大貓更脆弱，尤其係啱啱戒奶、適應新屋企嘅階段。如果發現佢超過 24 小時唔食嘢，就要即刻去睇醫生，唔好等！

• 口味偏好未建立：仲適應緊乾糧/濕糧嘅質地
• 感冒鼻塞，食唔落又聞唔到
• 誤食異物（毛線、橡筋）塞住腸胃
• 嚇親：食飯嗰陣畀其他大貓大狗騷擾

你可以嘗試用湯匙餵少少加熱過嘅濕糧（或肉泥）、加啲水浸軟乾糧、或者用針筒輕輕灌食，最緊要係確保佢有獨立嘅食飯空間，無人騷擾先肯安心食。