貓貓嘅鬍鬚（貓鬚）唔只係得意嘅裝飾，其實係佢哋生活中非常重要嘅感覺工具。
唔只係嘴邊，貓貓嘅下巴、眼眉、耳仔側邊同前腳手腕位都有貓鬚，每一條都幫佢哋更敏銳咁感知呢個世界。
而且你知唔知執到貓鬚係好運嘅象徵？同埋貓鬚甩咗到底正唔正常？繼續睇落去，一齊認識呢啲關於「貓鬚」嘅秘密啦！
執到貓鬚代表好運？
喺日本同歐美文化入面，執到貓貓自然甩落嚟嘅貓鬚被視為一種幸運象徵，有人相信佢可以招財、避邪，甚至帶嚟好運。
台灣亦曾經有主人執到貓鬚後中獎嘅新聞，搞到好多貓奴都會特登收藏貓鬚當護身符，甚至將貓鬚放入銀包，祈求財運同平安，真係得意又充滿意義！
（圖片來源：unsplash）
貓鬚有咩用？4大神奇功能揭秘！
除咗執到貓鬚代表好運，對貓貓本身嚟講，貓鬚更加係不可或缺嘅存在：
1. 感知氣流，好似內置雷達同導航
每一條貓鬚嘅根部都連接住好多神經，可以感測到最細微嘅氣流變化、物件距離同方向。
就算喺漆黑一片嘅環境，貓貓都可以精準咁移動，唔會撞到嘢。
2. 測量空間，幫貓貓判斷「捐唔捐得過」
貓鬚嘅長度通常同貓貓身體嘅闊度差唔多，可以幫佢哋判斷係咪過得去啲狹窄嘅空間，就好似一把天生嘅「尺度」。
3. 狩獵同防禦嘅得力助手
前腳手腕後面嗰幾條貓鬚，可以感應到獵物嘅細微郁動，就算視力唔好，貓貓都可以準確出擊。
眼眉上面嘅貓鬚就好似眼睫毛咁，保護眼仔唔會畀異物整親。
4. 維持平衡同動態掌握
貓鬚提供身體同四肢嘅空間感資訊，係貓貓可以精準跳躍、穩定落地嘅關鍵。
（圖片來源：unsplash）
貓鬚係情緒指標？3種狀態睇穿主子心情
- 貓鬚自然放鬆：代表貓貓處於放鬆、安心嘅狀態。
- 貓鬚向前集中：代表好奇、興奮，或者準備攻擊。
- 貓鬚向後貼面：代表緊張、不安、驚。
觀察貓貓貓鬚嘅變化，有助我哋睇穿佢哋嘅心情，並畀予適當嘅照顧同安撫。
想準確解讀貓鬚嘅心情密碼，記得要同時觀察埋耳仔同眼神嘅變化。
（圖片來源：unsplash）
貓鬚可唔可以剪？絕對唔得！
剪貓鬚會令貓貓失去方向感同安全感，就好似蒙住人對眼、塞住人對耳一樣，唔單止影響行動能力，仲可能引發焦慮、行路東歪西倒，甚至影響捕獵能力，非常危險！
如果你真係唔小心剪到貓鬚，都唔使太驚，貓貓被剪到貓鬚係唔會痛嘅，貓鬚亦會慢慢生返出嚟，但喺呢段期間就要特別留意佢嘅安全同情緒狀態喇。
（圖片來源：unsplash）
貓貓甩鬚係咪正常現象？
貓鬚有自然生長同更換週期，間唔中甩一兩條屬於正常情況，唔使過度擔心。
但如果係大量脫落，同時有皮膚紅腫、行為異常、不停R痕，就可能係過敏、感染或慢性病，建議盡快睇醫生。
有啲貓貓嘅貓鬚亦可能因為玩得太癲、同其他貓打交，或者撞到嘢而斷咗，通常只要健康狀況良好都會自然生返出嚟。
（圖片來源：unsplash）
點樣保養貓貓嘅鬍鬚？
- 唔好剪、唔好拉扯：貓鬚會自然更換，唔需要人為修剪或拔走。夾硬拉扯會令佢哋感到好痛同不安。
- 營養均衡好重要：攝取足夠嘅蛋白質同營養素，有助貓鬚正常生長同保持強韌。
- 減少壓力來源：保持生活環境穩定，避免突如其來嘅驚嚇，可以令貓貓安心，生理狀況都會更平衡。
- 揀個闊口兜：有啲貓貓唔鍾意食飯飲水時貓鬚掂到兜邊，呢個叫「鬍鬚壓力」。轉用闊啲淺啲嘅兜，可以令佢哋食得更自在。
貓鬚係主子嘅超能力，亦係我哋守護嘅責任
每一條貓鬚，都係佢探索世界嘅重要工具。
理解並尊重佢哋嘅貓鬚，唔單止可以令貓貓生活得更自在，亦可以令我哋更貼近佢哋嘅內心。
下次執到貓鬚時，不妨好好珍藏呢份「幸運嘅祝福」啦！
你可能還想看
參考資料
- https://vcahospitals.com/know-your-pet/why-do-cats-have-whiskers
- https://www.zoetispetcare.com/blog/article/cat-whiskers-101
- https://www.treehugger.com/things-you-didnt-know-about-cat-whiskers-4864051