主子抗拒新糧係唔少主人嘅煩惱，當貓狗一換新糧就選擇罷食，可能身邊有人會話「餓佢幾日自然會食」，但你係咪都咁諗？咁就要小心喇！長時間空肚唔單止會令毛孩腸胃唔舒服，仲可能引發嘔吐，甚至出現脂肪肝問題。
今日 MAMA 要同大家分享 3 個實證有效嘅小貼士，幫助主子順利適應新糧，輕鬆轉糧無煩惱！
常見原因 1：唔啱口味
有啲貓狗比較揀嘴，如果新糧味道唔啱佢心水，就會拒絕進食。如果主子長期食死同一款乾糧（例如：超過半年都冇換過），佢哋會對新糧有好大戒心，甚至唔肯試。
常見原因 2：餵食方式唔啱
習慣「放長糧」任食
「放長糧」即係任食buffet，貓狗可以隨時去食乾糧，呢種做法容易令佢哋對食物失去興趣，胃口下降。如果主子對舊糧本身已經冇乜熱情，咁你換新糧時佢自然都唔會特別興奮啦！
轉糧方法太急進
如果突然100%轉晒新糧，或者短時間內試太多唔同類型嘅糧，主子可能會因為唔適應而拒食。尤其係比較醒目同警惕嘅貓貓，對陌生食物會有戒備心，甚至完全唔肯食！
主子唔食就由佢餓？長時間空肚好危險！
貓狗如果長時間空肚，可能會嘔胃酸，嘔出嚟嘅透明、白色或黃色泡沫狀液體，好多時就代表個胃已經太空。主子唔食嘢原因好多，可能係唔啱口味、暫時冇胃口等。但如果佢同時冇晒精神，就可能係病咗，需要盡快帶去睇獸醫！
特別係體重較重嘅貓，如果超過 48 小時冇攝取到蛋白質，體內脂肪會開始分解，呢個過程可能會導致肝臟負荷過重，引發可致命嘅「脂肪肝」。 各位主人務必要確保主子唔會因為轉糧而餓親！
MAMA 推薦！3招+黃金法則，輕鬆幫主子轉糧成功
【重要】貓狗轉糧黃金法則：7日漸進式換糧法
要成功轉糧，最重要係有耐性，畀主子嘅腸胃有時間慢慢適應。最常用嘅方法係「7日漸進式換糧法」：
- 第 1-2 日： 75% 舊糧 + 25% 新糧
- 第 3-4 日： 50% 舊糧 + 50% 新糧
- 第 5-6 日： 25% 舊糧 + 75% 新糧
- 第 7 日： 100% 新糧
喺呢個過程要密切觀察主子嘅大便狀況，如果出現軟便或肚痾，可以將時間拉長啲，等佢哋完全適應為止。
實用技巧 1：定時定量餵食，減少零食
無論有冇轉糧，定時定量餵食都非常重要！如果主子習慣咗隨時有飯開，佢哋就唔會珍惜每一餐。而且，乾糧長時間擺喺空氣中，可能會變味或變質，影響健康。
實用技巧 2：避免喺短時間內頻繁換糧
唔少主人想畀主子試多啲唔同牌子或口味，但如果太頻繁轉換，主子可能會覺得「唔食呢個就有新嘢食」，結果養成揀嘴習慣，轉糧就更困難。MAMA 建議 2 個月內最多試 3 種唔同乾糧，尤其腸胃較敏感嘅毛孩，應避免過度更換糧食。
實用技巧 3：添加寵物專用益生菌
益生菌有助促進腸胃消化同吸收，能夠減少因轉糧導致嘅腸胃不適。但要注意，益生菌並唔係仙丹，需要長期食先可以發揮穩定腸道嘅作用。此外，千祈唔好畀毛孩食人類嘅益生菌！因為人同動物嘅腸道菌群唔同，亂食可能會適得其反！
延伸閱讀：
貓罐頭點樣揀？品牌推薦同常見問題全解析
幼貓糧推薦｜餵食重點與 9 款優質乾糧比較
