曲架犬 (Cocker Spaniel)，又叫曲架，最初係負責獵鳥嘅獵犬，起源於西班牙，之後喺英國同美國發展出唔同嘅血統分支。佢哋憑住可愛嘅外型同溫柔嘅性格，一早就由獵犬轉型為深受歡迎嘅家庭寵物。
想知佢哋有邊啲迷人嘅特徵同飼養細節？繼續睇落去，一齊深入了解曲架犬啦！
曲架犬外型特徵一覽
| 特徵 | 說明 |
|---|---|
| 體型 | 中型犬，體重約 9-14 kg，身高約 34-38 cm |
| 耳仔 | 又長又垂，鋪住濃密嘅羽毛狀長毛 |
| 眼睛 | 圓碌碌、表情溫和，通常係深啡色 |
| 鼻 | 顏色會跟隨毛色而唔同 |
| 毛髮 | 頭部短毛，身體中等長度，四肢同肚仔有羽毛狀長毛 |
| 毛色 | 包括黑、紅、奶油、黑白、紅白、三色、花斑等20幾種 |
| 尾巴 | 傳統上會斷尾，而家多數保留自然長尾 |
延伸閱讀：中型犬完整指南：特性、常見問題與照顧建議
美國曲架 vs 英國曲架 點樣分？
英國曲架犬 vs 美國曲架犬
| 品種 | 英國曲架 | 美國曲架 (《小姐與流氓》主角) |
|---|---|---|
| 體型 | 身型較高、體態較修長 | 身型較細、頭更圓、鼻更短 |
| 毛髮 | 毛量適中、比較自然 | 毛量極之豐厚，尤其腳部 |
| 個性 | 活潑外向、保留較多獵犬本能 | 甜美順從、偏向伴侶犬 |
曲架 vs 曲架貴婦犬
曲架貴婦犬結合咗兩者嘅優點，唔單止聰明易教，仲有曲架嘅溫柔個性同貴婦狗嘅低甩毛特質。同曲架嘅分別可以由以下幾點觀察：
| 品種 | 曲架犬 | 曲架貴婦犬 |
|---|---|---|
| 性格 | 溫和、痴身、聽話 | 聰明、開朗、親人、易訓練 |
| 毛髮特性 | 雙層毛，甩毛量中等，需定期梳理 | 多為捲毛、唔易甩毛 |
| 飼養難度 | 中等 (需要花心機美容同陪伴) | 較低 (相對易照顧、適應力強) |
曲架犬性格？親人但唔鍾意孤單
開朗溫柔
佢哋對大人細路都好友善，鍾意陪喺屋企人身邊，由於依賴感強，亦成日會做「跟屁蟲」。
社交能力強
佢哋友善、有耐性，識得睇場合，唔容易惹事生非，係多寵家庭或有小朋友家庭嘅理想毛孩。
活動力適中
只要有固定散步同簡單互動，曲架犬喺香港嘅細單位都可以過得好開心。
唔鍾意孤單
如果唔係，佢哋好易會感到不安、焦慮，甚至可能出現亂吠、咬嘢等分離焦慮嘅破壞行為。
曲架犬智商高唔高？聰明好學易訓練
佢哋樂於討好主人，適合學習基本指令、嗅聞遊戲或敏捷運動，係非常適合新手訓練嘅狗狗。
曲架犬有咩缺點？養前必睇 4 大需求
甩毛與美容需求極高
尤其係曲架犬對大耳仔又長又多毛，好易焗住濕氣，導致發炎或滋生細菌，所以耳仔清潔同保持乾爽絕對唔可以懶。
體重控制需求
建議要定時定量餵食，避免畀過多零食，並揀選營養均衡、根據 AAFCO/NRC 國際標準設計嘅優質狗糧。
極高嘅陪伴需求
應由幼犬時期就開始做減敏訓練，等佢哋慢慢習慣短時間獨處。建議主人亦要盡量抽時間陪伴。
訓練需求
佢哋有時會因為悶而吠叫，可以透過畀零食、讚美等正向訓練方式引導，建立穩定行為同安全感。
曲架犬好唔好養？4 大飼養建議必知
美容護理建議
- 梳毛：每日用針梳或排梳梳理，預防打結同管理甩毛。
- 沖涼：每幾星期沖一次涼，揀溫和嘅狗狗沖涼液，沖完要徹底吹乾。
- 耳仔護理：耳道唔通風，沖涼後要抹乾，建議每星期用洗耳水清潔一次。
- 口腔清潔：每日刷牙最好，亦可配搭獸醫推薦嘅潔齒骨或口腔噴劑。
- 剪指甲：每 3-4 星期剪一次，避免太長影響行路或刮親人。
飲食與營養建議
- 揀啱狗糧：揀根據 AAFCO/NRC 國際營養標準設計嘅優質狗糧。
- 控制熱量：曲架好易肥，要嚴格控制主食同零食份量。
- 飲食敏感：有部分曲架可能對穀物、雞肉等過敏，有需要時應諮詢獸醫調整餐單。
運動與精神刺激
- 日常運動：每日散步兩次，每次約 20-30 分鐘，有助身心健康。
- 遊戲互動：拋接波、嗅聞遊戲、藏食玩具等可以刺激佢哋嘅獵犬本能同好奇心。
- 進階活動：可以參加敏捷訓練、飛球等狗狗運動，消耗精力亦促進同主人嘅互動。
訓練與社會化建議
- 適合初學者：曲架犬樂意討好主人，對正向獎勵學習反應好好。
- 早期社會化：由細個開始接觸唔同嘅人、聲音、動物，有助建立穩定個性。
- 持續訓練：可以由基本指令 (Sit, Stay, Come) 開始，再到進階嘅嗅聞工作或敏捷遊戲。
- 行為管理：如果有吠叫或分離焦慮問題，建議同專業訓練師合作輔導。
曲架犬壽命有幾長？5大健康問題需注意
如果想曲架犬更健康長久陪伴，咁以下呢啲健康問題就唔可以唔知：
耳部問題
- 建議每星期用洗耳水清潔耳道
- 沖涼後要徹底抹乾耳仔，有需要可用低溫風筒協助
- 如果出現異味、R耳仔或Fing頭，應盡快求醫
眼部問題
- 白內障：最常見眼疾，會導致視力模糊，好多時要靠手術處理
- 漸進性視網膜萎縮 (PRA)：視網膜逐漸退化，可能導致失明，目前冇得醫
- 乾眼症 (KCS)：淚水分泌唔夠，眼紅刺痛，需要長期滴眼藥水
骨骼與關節問題
- 髖關節發育不良 (HD)：多數係遺傳，過重會加速惡化，恐引發關節炎
- 膝關節異位 (Patellar Luxation)：即「菠蘿蓋移位」，有時可透過補充關節保健品維持穩定，嚴重者需做手術
皮膚問題
- 較常見皮膚病包括皮脂溢、黴菌或細菌性皮膚炎
- 建議用狗狗專用沖涼液，徹底沖淨同吹乾
- 如果出現皮屑、紅疹、R痕，應諮詢獸醫
其他潛在健康問題
- 心臟瓣膜疾病：尤其喺老年期發生率高，建議定期做心臟檢查
- 甲狀腺功能低下：可能導致活動力下降同肥胖
- 自身免疫性溶血性貧血 (AIHA)：較罕見但潛在嚴重，要及早發現
- 胰臟炎：飲食太油膩或肥胖犬隻容易發作，症狀包括嘔吐同肚痛
維持良好身型、定時做身體檢查同正確日常照顧，有助大幅減低曲架犬患病風險！