狗狗肚屙兼無精神？小心係急性腸胃炎！症狀、治療、康復時間全攻略

當狗狗出現嘔吐或者肚屙嗰陣，好多主人第一時間會覺得佢哋係食錯嘢，但其實亦有可能係「腸胃炎」作怪。

狗狗腸胃炎係指胃部同腸道發炎，並唔係單一疾病，而係一種常見嘅臨床症狀。嚴重程度可大可小，由短暫唔舒服到好似出血性腸胃炎（AHDS）呢類急性腸胃炎重症，如果唔及時治療，可能會引發脫水、電解質失衡，甚至有生命危險。

所以認識狗狗腸胃炎嘅常見症狀、可能成因同埋治療方式非常重要，幫我哋喺第一時間做出正確判斷，而家就一齊嚟了解下啦！

雖然有啲狗狗嘅腸胃炎屬於輕微，但主人依然要保持高度警覺，因為某啲症狀一旦出現，就代表病情可能相當嚴重，需要即刻求醫。

以下為常見嘅狗狗腸胃炎症狀，如果狗狗出現其中 1 項危險警號，建議盡快帶去獸醫診所檢查：

 
• 異常嘔吐：嘔個唔停，甚至嘔出血水或者咖啡色液體

 

• 嚴重肚屙：屙水或者啲屎變黑

 

• 明顯無精神：狗狗睇落好虛弱，甚至企唔穩

 

• 唔肯食嘢或飲水：完全無胃口、連水都唔掂

 

• 腸胃異常反應：個肚咕嚕咕嚕響、成日拱起個背脊，或者你摸佢個肚時反應好大，可能係肚痛

 

• 懷疑吞錯嘢：懷疑佢食咗膠袋、玩具碎片、藥物或有毒物品

 

• 有慢性病底：本身已經患有糖尿病、腎病等健康問題嘅狗狗

拖延治療可能會導致狗狗出現脫水、電解質失衡、營養不良等併發症，甚至有生命危險。

主人如果對狗狗嘅狀況有任何懷疑，即使無出現晒上面所有症狀，都應該盡快問下獸醫。睇醫生嗰陣帶埋新鮮嘅嘔吐物或屎嘅樣本（或者影相記錄），都可以幫到獸醫更快診斷。

狗狗腸胃炎嘅原因有好多，有時好難即刻判斷出病因，以下係常見嘅 4 大類型：

 
• 摷垃圾桶、亂食地下嘅嘢

 

• 食咗變壞或者太油膩難消化嘅食物

 

• 突然轉糧（乾糧轉濕糧、生熟肉轉換、轉牌子）

 
• 病毒感染：例如犬小病毒（狗腸炎）、犬冠狀病毒等高傳染性疾病

 

• 細菌感染：例如彎曲桿菌、梭狀芽孢桿菌等

常見嘅腸道寄生蟲包括：

 
• 蛔蟲

 

• 鉤蟲

 

• 鞭蟲

 

• 絛蟲

 

• 梨形鞭毛蟲等

 
• 吞錯異物或中毒

 

• 食物過敏或發炎性腸病（IBD）

 

• 壓力太大或者環境突然改變

 

• 其他潛在疾病：如胰臟炎、肝腎功能出現問題、癌症等

部份輕微嘅腸胃炎喺主人細心照顧下，透過休息同食得清淡啲，的確有機會自己好返。但正如上面所講：腸胃炎嘅成因好多，並唔係所有情況都可以自我恢復。

如果狗狗嘅症狀持續惡化、嘔個唔停、肚屙無改善，或者精神同胃口明顯變差，千祈唔好抱住「睇定啲先」嘅心態，拖延就醫可能會導致嚴重脫水、電解質失衡、營養不良等併發症，甚至危及生命。

即使狗狗無出現晒所有嚴重危險警號，只要主人直覺覺得「有啲唔妥」，都應該相信自己嘅判斷盡早問獸醫，只要越早介入治療，康復嘅速度同成功率通常都會越高！

呢個係治療狗狗腸胃炎最基本亦都係最關鍵嘅支持療法。

目的在於補充狗狗因為嘔吐、肚屙而流失嘅水份同電解質，預防脫水同休克。

對於症狀嚴重、無法自己飲水食嘢，或者患有出血性腸胃炎嘅狗狗，吊鹽水更加係不可或缺嘅第一線處理方法。

根據診斷結果，獸醫會根據狗狗嘅實際狀況選擇以下對症藥物：

 
• 止吐藥：幫手減少嘔吐次數，等狗狗可以慢慢恢復胃口同飲水意欲

 

• 胃藥與腸胃保護劑：保護胃黏膜、減少胃酸分泌，舒緩唔舒服

 

• 抗生素：只會喺獸醫確認有細菌感染時先用，強調唔可以濫用，避免破壞腸道益菌

 

• 杜蟲藥：如果驗到有寄生蟲感染，會配合適當嘅杜蟲藥物進行治療

⚠️ 提醒：千祈唔好自己亂畀藥狗狗食！ 錯誤嘅藥物或份量可能會令病情惡化，一定要聽獸醫指示。

如果狗狗嘅腸胃炎係由吞錯異物（例如膠袋、玩具碎片）或者腸胃道腫瘤引起，可能需要開刀拎返出嚟，並安排留院進行後續觀察同密集治療。

喺獸醫指導下，建議餵食單一蛋白質、低脂而且易消化嘅清淡飲食，例如水煮雞胸肉、白飯、番薯蓉，或者獸醫推薦嘅處方糧。

採取少食多餐嘅方式餵食，避免一次過食太多，加重腸胃負擔。

鼓勵狗狗飲多啲水，幫手預防脫水。如果狗狗飲完水之後又嘔，請即刻停止畀水並聯絡獸醫。

喺獸醫建議下，可以揀寵物專用益生菌幫手維持腸道健康，部份產品仲含有幫手固化便便、舒緩腸道嘅成分。

需唔需要禁食應該由獸醫根據狗狗個別狀況評估，唔建議自己決定。有研究指出，早期適當提供營養有助於腸道修復。

畀狗狗休息多啲，限制活動空間同活動量，避免消耗太多體力。保持生活環境清潔，定期洗乾淨狗碗、水兜同狗床，避免細菌滋生。

雖然狗狗腸胃炎無法完全避免，但透過日常嘅細心照顧同管理，可以大幅降低狗狗患上腸胃炎嘅風險。

以下係主人喺日常生活中可以做足嘅 5 大預防步驟：

1. 定期打針同杜蟲：特別係預防犬小病毒等感染源。
2. 避免亂食嘢：出街一定要拖好狗帶、避免接觸垃圾，有需要時戴口罩。
3. 漸進式轉糧：轉換食物嗰陣，建議最少用一個星期慢慢混合替換。
4. 保持環境清潔：狗碗、水兜、生活空間要定期洗乾淨。
5. 日常補充益生菌：維持腸道菌群平衡，保持抵抗力。

當狗狗患上腸胃炎嗰陣，胃口可能會明顯變差，呢個係腸胃唔舒服嘅常見表現。

呢個時候可以嘗試提供氣味比較香、適口性高又清淡嘅食物，例如少少微暖嘅水煮雞肉或者獸醫推薦嘅處方罐頭，有時可以幫狗狗恢復進食意欲。

但如果狗狗持續唔食嘢超過 24 小時，或者同時伴隨無精神、行路腳軟、成日瞓等狀況，就應該即刻睇醫生。

呢個可能代表病情惡化，需要透過留院觀察同吊鹽水等方式補充營養同水份，避免脫水同體力流失。

有啲腸胃炎嘅狗狗會喺飲水之後即刻嘔，呢個通常係腸胃發炎嚴重嘅表現。如果你發現狗狗一飲水就嘔，請即刻收起水兜，並馬上聯絡獸醫。

特別係如果狗狗原本已經嘔得好密，飲水之後更加嚴重，呢個有可能是急性脫水、出血性腸胃炎或者腸道阻塞等危急情況嘅警號。

拖延治療可能會導致病情快速惡化，一定要第一時間睇醫生，由專業獸醫評估後續處理方式。

狗狗腸胃炎嗰陣唔建議飲寶礦力或者舒跑呢類人類運動飲品，因為入面含有較多嘅糖份，對狗狗嚟講反而可能會加重腸胃負擔。

如果擔心佢脫水，建議改用專為寵物設計嘅電解質補充液，或者請獸醫建議更合適嘅補水方式啦。

狗狗腸胃炎嘅康復時間會因為病因、病情嚴重程度等而有所唔同：

 
• 輕微個案：可能喺 1～2 日內就會明顯好轉（如果係單純嘅飲食問題或短暫唔舒服，喺休息同清淡飲食照顧下）

 

• 一般個案：大部份狗狗會喺幾日至 1 個星期內逐步恢復正常（經獸醫診斷同食藥之後）

 

• 慢性或感染型腸胃炎：可能需要幾個星期甚至幾個月時間調理（例如由犬小病毒、寄生蟲或發炎性腸病引起，而且可能會反覆發作，需要配合長期醫療同護理計劃）
  

無論病情輕重，主人喺照顧過程中都應該密切觀察狗狗嘅精神狀態、食嘢同飲水情況、便便形態以及整體活力。

如果有任何異常變化，一定要同獸醫保持聯絡並覆診跟進！

狗狗腸胃炎雖然常見，但都有可能演變成危及生命嘅急症。

作為主人，我哋唔單止要了解症狀同病因，仲要及時求醫、配合治療，並喺日常生活中做好預防措施。善用專業資源、同獸醫保持良好溝通，先係畀毛孩最安心嘅守護！

狗狗軟便點算好？7 種便便形態教你判斷腸胃狀況，一篇搞懂改善方法！

狗狗食物過敏點算？3 種判斷方法、常見過敏食材一次睇清！

狗狗食咩肉最營養？6 大肉類優缺點：狗狗可以日日食雞胸肉嗎？

狗狗肚屙但精神好？5 情境解析腹瀉原因，改善腸胃靠呢招

狗狗濕疹反覆發作？教你 5 招舒緩狗狗皮膚痕癢！

 
• https://www.pdsa.org.uk/pet-help-and-advice/pet-health-hub/conditions/gastroenteritis-stomach-upset-in-dogs

 

• https://hopperscrossingvet.com.au/gastroenteritis-in-dogs/

 

• https://vcacanada.com/know-your-pet/pet-health-articles/hemorrhagic-gastroenteritis-in-dogs

 

• https://www.vets4pets.com/pet-health-advice/dog-advice/dog-gastroenteritis/

 

• https://www.petmd.com/dog/conditions/digestive/gastroenteritis-dogs-symptoms-recovery-and-more

 

• https://www.poochandmutt.co.uk/blogs/health/gastroenteritis-in-dogs-causes-symptoms-treatments?srsltid=AfmBOopFW540z1vYwmUdrIoFmGC302MNEgR-icYRggAysiP2bz11lelw