心絲蟲可以活幾耐？了解狗心絲蟲病徵，2招全面預防感染

心絲蟲（Heartworm）係一種令狗狗主人都聞之色變嘅寄生蟲感染病，唔單止會損害狗狗健康，嚴重起上嚟甚至可能危及性命！

一旦感染咗心絲蟲，就會寄生喺狗狗身上，當佢哋體內積聚大量心絲蟲成蟲嘅時候，就會搞到心臟負荷過重、血管閉塞同肺部發炎，引致呼吸困難甚至死亡！

尤其香港氣候又濕又熱、蚊蟲又多，都係心絲蟲嘅高危地區，所以了解心絲蟲嘅特徵同預防方法就非常重要。我哋會由感染途徑、症狀，講到預防方法，一步步幫你好好保護狗狗嘅健康。

心絲蟲嘅傳播媒介就係「蚊子」，佢係心絲蟲生命週期中不可缺少嘅中間宿主。而要了解傳染途徑，就一定要先認識心絲蟲嘅「生命週期」：

1. 蚊子咬咗受心絲蟲感染嘅動物之後，心絲蟲幼蟲就會由血液進入蚊子體內。
2. 心絲蟲幼蟲喺蚊子體內發育約 10～14 日，變成有感染力嘅第三期幼蟲。
3. 當蚊子再次咬健康狗狗嘅時候，幼蟲就會經狗狗皮膚進入體內。
4. 幼蟲喺體內經 6～7 個月發育成為成蟲，寄生喺心臟同肺動脈入面。
5. 成蟲喺狗狗體內可以生存長達 5～7 年，繼續繁殖同破壞組織。

有啲主人會以為狗狗養喺室內，或者毛髮比較多就唔會感染到心絲蟲，但係呢個諗法係錯㗎！

因為心絲蟲會經蚊子咬嚟傳染，所以無論狗狗係室內狗定室外狗，都或多或少有感染心絲蟲嘅風險，都要特別留意呀。

延伸閱讀：狗狗心臟病可以活幾耐？病發症狀、預期壽命、日常護理指引！

心絲蟲感染初期通常無乜明顯症狀，但隨住心絲蟲變成成蟲，仲走入心臟同肺部之後，症狀就會越嚟越明顯。

而心絲蟲症狀嘅嚴重程度會取決於感染數量、感染時間同埋狗狗嘅體質。建議如果狗狗有以下任何異常，就要盡快帶佢睇獸醫喇：

• 輕微或者持續性咳
• 冇晒精神
• 活動能力下降
• 運動耐受力降低，郁兩吓就喘氣
• 食慾不振
• 體重減輕

• 呼吸急速或困難
• 虛弱冇力
• 嘔吐兼咳血
• 血尿
• 黃疸
• 腹部腫脹（即係腹水）

喺嚴重嘅情況下，狗狗可能會出現「腔靜脈症候群（Caval Syndrome）」，呢個係大量心絲蟲塞住心臟主要血管，引致嘅急性心臟衰竭。

狗狗可能會呼吸困難、牙肉變到蒼白，甚至出現深色血尿等症狀。呢個係非常危險嘅緊急情況，必須即刻由獸醫做手術移除蟲體，如果唔係會有生命危險㗎！

延伸閱讀：狗狗肺積水點算好？狗狗心臟病肺積水症狀、原因及護理指引！

除咗睇吓狗狗有冇心絲蟲病徵，最準確嘅方法都係帶狗狗去獸醫診所做檢查。

獸醫通常會先抽少少血嚟做檢測，包括抗原快測同埋顯微鏡檢查，去確定狗狗體內有冇成蟲。

有需要嘅時候，佢哋亦會安排照X光或者做超聲波檢查，睇吓狗狗心臟同肺部嘅健康狀況。另外，都建議主人每年帶狗狗做一次快測，提早發現，及早治療，咁先可以令狗狗遠離心絲蟲嘅風險。

心絲蟲嘅治療通常會透過打針驅蟲藥嚟殺死成蟲，並會按狗狗嘅情況，配合口服藥、抗生素或者手術等方法，幫助穩定病情。如果照顧得好，大部分狗狗喺療程完成之後都可以康復。

如果狗狗確診感染咗心絲蟲，其實唔需要太過擔心，而家嘅獸醫治療已經好成熟，同時亦會盡量減少治療帶嚟嘅唔舒服同埋副作用。

• 完成心絲蟲療程後 8～12 個月，需要再次檢測，確保體內冇殘留嘅蟲體。
• 如果狗狗感染心絲蟲引致肺部、心臟受損，即使成功治療，損害仍可能長期存在，部分狗狗甚至可能需要終身治療心臟衰竭。

狗狗心絲蟲嘅收費唔一定，通常會按狗狗嘅體重、感染狀況同埋治療方法而有所唔同。

如果需要再做X光、超聲波或者手術，收費會再高啲。因為治療過程時間比較長，步驟亦比較複雜，如果狗狗同時有其他疾病，收費仲可能會再貴啲。

所以，定期預防心絲蟲，遠比事後治療嚟得輕鬆又化算！

心絲蟲病係可以預防嘅，而且預防絕對勝於治療，可以避免狗狗承受疾病帶嚟嘅痛苦。最有效嘅方法係定期用預防藥＋做好環境防蚊措施：

由於香港蚊蟲都幾活躍，全年都有機會感染心絲蟲，所以應該定期用預防藥嚟阻斷心絲蟲幼蟲嘅生長。

而家市面上有好多種心絲蟲預防藥，劑型包括口服咀嚼片、滴劑同埋針劑，以下係唔同類型嘅介紹：

心絲蟲藥物使用貼士：

• 用任何預防藥之前，應先做心絲蟲快速測試，確保狗仔體內無成蟲。
• 用任何心絲蟲藥之前，請務必諮詢你嘅獸醫，揀選最啱嘅產品同正確劑量。
• 就算全年用預防藥，都應該每年做一次心絲蟲檢測。

要留意周圍環境同狗仔身上有冇做足防蚊措施，例如：

• 定期清理容器同水管入面嘅積水，避免成為蚊蟲滋生地
• 安裝蚊網、蚊門，阻擋蚊蟲飛入屋
• 外出時亦可以用寵物防蚊噴霧

只要做足呢啲簡單嘢，就可以有效減低狗仔感染心絲蟲嘅風險！

大部份感染心絲蟲嘅狗仔，經過治療後都可以恢復健康，不過治療過程需要時間同耐性。

如果心臟或肺部因為感染而受到永久損害，可能仍然需要長期跟進同護理，等狗仔逐步恢復體力同生活質素。

心絲蟲病如果唔醫，係唔會自己好返㗎，反而啲成蟲會喺狗狗體內不斷繁殖，破壞心臟、肺部同血管。

咁會搞到狗狗呼吸困難、體力變差，最嚴重仲會引起心臟衰竭甚至死亡。如果主人掉以輕心，會令狗狗身處險境，千祈唔好輕視啊！

雖然好少見，但心絲蟲的確有機會寄生喺人體入面，仲可能會引起結節等病變。

不過心絲蟲唔會經由狗狗傳染開，而係透過蚊子叮咬人類嚟傳播。就算人感染咗，體內嘅心絲蟲幼蟲都冇辦法長大繁殖，所以唔會人傳人。

狗狗俾蚊咬咗，唔一定會即刻感染心絲蟲，但整體風險其實都幾高。

只有當咬狗狗嗰隻蚊體內帶有「心絲蟲第 3 期感染性幼蟲」，同埋喺狗狗體內經過大約 6 至 7 個月嘅發育期，先會真正形成感染。

但由於香港氣候溫暖潮濕，好適合蚊子生存，如果冇做好預防措施，一旦發病，死亡率會好高，治療風險亦都好大，所以定期做預防性用藥，先係保護狗狗健康最安全、亦都最有效嘅方法。

👉 狗狗皮膚病有咩種類？痕癢甩毛元兇係佢！6 個方法改善皮膚問題

👉 狗狗耳仔發炎會唔會自己好返？出現呢啲症狀就唔好再拖啦！原因、治療全指南

👉 狗狗癱瘓有咩先兆？突然企唔到起身點算好？治療、照顧全指南

👉 狗狗腸胃炎會唔會自己好返？食啲咩好？治療、飲食建議一文睇晒

👉 狗狗趾間炎會唔會自己好返？4 大治療方法改善狗狗腳板發炎！

• 獸醫手冊：狗狗心絲蟲病預防及治療
• VCA醫院：認識狗狗心絲蟲病徵狀
• PetMD：狗隻心絲蟲感染與寄生蟲疾病資訊
• 美國心絲蟲協會：犬隻心絲蟲病指南