幼貓係咁「煲水」係咪開心？拆解5大貓煲水原因 (附生病警號)

Table of Contents

幼貓係咁煲水？拆解背後 5 大原因

幼貓發出「咕嚕咕嚕」嘅煲水聲，係一種低頻振動嘅聲音，聽落好治癒又得意，好易令人誤以為佢哋只係喺度表達開心。但事實上，貓煲水背後有好多原因，甚至有可能代表貓貓身體唔舒服！

如果你想透過煲水聲判斷幼貓嘅需求同狀態，而家就跟住我哋一齊睇落去啦！

當貓貓感到放鬆、舒服，例如被你摸、伏喺你大髀、食緊嘢或曬太陽嗰陣，就會發出柔和而穩定嘅煲水聲。

呢個代表佢哋非常信任你，覺得好有安全感！

當貓貓覺得孤單、肚餓或者想你陪嗰陣，都可能透過煲水嚟吸引你嘅注意力。

呢種煲水聲可能會更大聲、頻率快啲，甚至夾雜住「喵喵」叫，好似喺度同你講：「快啲理我啦！」，呢個時候就要好好觀察下主子有咩需要喇！

如果貓貓瞓覺嗰陣發出煲水聲，咁好大機會係因為佢發緊夢。

呢個就好似我哋人類講夢話一樣，通常屬於正常現象，唔需要太過擔心。

貓貓係咁煲水唔一定係開心㗎，感到緊張恐懼嗰陣都會。

如果貓貓喺啱啱到新屋企、或者睇獸醫呢啲令佢哋覺得有壓力嘅情境下煲水，佢哋可能係透過呢個聲音嚟安撫自己，嘗試令自己冷靜落嚟。

呢個係主人最需要注意嘅一點！當貓貓身體唔舒服或受傷時，都可能發出煲水聲！

有研究指煲水嘅低頻振動有助於減緩疼痛同自我療癒。所以主人要留意貓貓係咪長期煲水，同時伴隨冇精神、冇胃口、渴睡、咳、打乞嗤等症狀，如果觀察到就應立即求醫。

如果想由煲水聲判斷幼貓想表達咩，建議一定要配合觀察貓貓嘅表情、身體語言同煲水頻率，咁先可以更準確判斷佢嘅狀態：

貓貓狀態	煲水頻率	表情	身體語言
開心、放鬆	規律而且穩定	五官放鬆、眼神柔和、瞇瞇眼	行埋嚟會豎直條尾、肯畀你摸、用頭蹭你
緊張、唔舒服	唔規律、急促，甚至好大聲	飛機耳（耳仔向後貼）、瞳孔放大	身體蜷縮、保持低姿態、尾巴捲住身體

提醒：如果發現貓貓嘅煲水聲可能暗藏壓力或身體警訊，主人應畀予更多關心，有需要時諮詢獸醫意見。

你知唔知？貓貓發出嘅煲水聲，其實唔只係佢哋自我安撫或傳遞情緒嘅方式，甚至對我哋人類都有正面影響！

因為呢種穩定又低頻率嘅煲水聲好似白噪音，對人類嚟講有助於舒緩壓力、穩定情緒，甚至仲可能幫助提升睡眠質素，令身心進入更深層嘅放鬆狀態。

透過呢種聲音，唔單止可以更了解主子嘅身心狀態，亦可以令人同貓嘅關係更親密同信任。下次不妨好好聆聽主子嘅煲水聲，從中獲得療癒嘅力量啦！