呢篇文章嘅用字已按照寵物糧相關規例審慎調整，務求盡量清晰表達資訊，同時避免使用可能引起誤解嘅字眼，多謝各位主人嘅體諒同明白！
你岩岩做貓主？仲為咗點湊幼貓頭都大晒？
唔使驚！MAMA 預備咗全方位幼貓攻略大全，涵蓋晒「開支」、「醫療」、「飲食」、「照料」、「訓練」等實用貼士，跟住做，你都可以變身滿分貓奴！
你可能想睇：
「喂，我屋企隻幼貓頭先嘔咗，咁係咪正常㗎？」相信好多新手貓奴都試過咁問啦？
其實，幼貓間中嘔吓都算正常，但如果係不斷咁嘔、嘔到好辛苦，甚至連精神都麻麻地，咁就要小心留意啦。
不如一齊睇吓有邊幾個常見原因啦！
（一）食得太快或者食太多
有啲貓仔食嘢速度簡直餓鬼投胎咁，
三扒兩撥就將成碗貓糧食晒，然後冇幾耐就見到佢將頭先食落肚嘅嘢原封不動咁嘔返出嚟。
尤其係幼貓，完全唔識節制，食到個胃裝唔落，先發現——呀，嘔返出嚟好似快啲喎。
如果呢種情況唔係成日發生，咁都唔使太擔心，
但如果成日都係咁，可能就要轉吓方法，等佢慢慢食，例如換個慢食碗，或者一次分少少、分多幾餐餵，唔好俾佢一口氣食太多。
（二）轉糧轉得太急
如果前一日仲食緊罐頭，今日就直接轉食乾糧，或者突然轉咗新牌子，
幼貓嘅腸胃可能一時適應唔到，咁就會開始「示威」啦。
結果你就會望住地下灘嘔吐物，然後就諗自己係咪搞錯咗啲咩。
轉糧呢件事，真係唔可以心急，一定要慢慢嚟，要先將新舊糧溝埋，
由七成舊糧、三成新糧開始，隔幾日再變五五波，再慢慢過渡到全新嘅糧。
咁樣貓仔個胃就冇咁易受刺激，適應起嚟都會舒服啲。
（三）吞咗毛球
貓仔好鍾意乾乾淨淨，日日都舔毛，將自己執到乾乾淨淨，
但問題嚟啦，呢啲毛會俾佢吞咗落肚，日子有功就變咗一嚿喺個胃度消化唔到嘅毛球。
之後，有一日，你就會見到佢開始乾嘔，然後嘔返一團好似地氈邊甩出嚟嘅毛線團。
長毛貓就更加容易有呢個問題，所以平時可以多啲幫貓仔梳毛，減少佢吞落肚嘅毛髮量。
有啲貓仔會自己將毛球排出嚟，但如果發現佢成日乾嘔，
或者睇落好似想嘔但又嘔唔出，咁可能就要俾啲化毛膏佢食，
或者轉餵有助排毛嘅貓糧，等啲毛球順利咁排出嚟。
（四）食咗唔應該食嘅嘢
貓仔真係好曳，見到乜都想咬吓，
特別係啲閃閃哋、會郁嘅、睇落好好玩嘅嘢，
譬如橡筋、線頭、膠片仔，甚至廁紙。
有時，佢哋吞咗落肚嘅嘢其實消化唔到，
哽咗喺胃度或者腸道度，就會開始嘔，嚴重起上嚟，甚至可能會腸塞。
更衰嘅係，有啲嘢對貓貓嚟講係毒藥，
例如朱古力、提子、百合花、洋蔥等等。
千祈唔好以為「少少哋啫，應該唔會事啩」，呢啲嘢對貓貓嚟講真係會出大事。
如果你懷疑貓貓吞咗唔應該食嘅嘢，或者已經持續咁嘔、冇晒精神，
最好都係嗱嗱聲帶佢去獸醫度檢查吓。
（五）腸胃有寄生蟲
有啲貓仔可能由貓媽媽度帶咗寄生蟲嚟，
例如蛔蟲、絛蟲，呢啲蟲喺貓貓嘅腸道度住咗落嚟，
會搞到佢消化不良、肚屙，甚至瘦到皮包骨。
最常見嘅情況係，貓貓嘔出嚟嘅嘢竟然有白色小蟲，
呢個時候真係唔使懷疑，嗱嗱聲帶佢去獸醫度杜蟲啦。
獸醫通常會建議貓仔由兩週大開始杜蟲，之後每隔幾個月定期杜一次，咁先可以確保佢嘅腸胃乾乾淨淨，
冇啲乞人憎嘅小蟲喺入面搞搞震。
（六）病咗
如果貓貓唔單止嘔，仲變得冇乜精神、開始發燒、唔食唔飲，甚至肚痾，咁可能就唔只係單純嘅腸胃唔舒服，而係一啲嚴重嘅病。
例如腸胃炎、胰臟炎，甚至係腎臟問題。
呢種情況就千祈唔好拖，嗱嗱聲帶佢去睇獸醫先係正確做法。
貓仔嘔吐，幾時要睇獸醫？
有時貓貓偶然嘔吓，未必係咩大問題，
但如果出現呢幾種情況，就唔好再睇定啲喇，嗱嗱聲帶佢去獸醫診所。
- 一日嘔好多次，或者持續嘔咗廿四個鐘，呢個可能就唔係單純嘅腸胃問題喇。
- 嘔出嚟嘅嘢有血，或者顏色好怪，譬如黑色或者深啡色，呢個可能係胃出血嘅徵兆。
- 貓貓變得冇晒精神、開始發燒、唔肯食嘢，可能身體真係出咗事。
- 貓仔嚴重肚屙，或者睇落脫水（好似皮膚扯起之後唔會即刻彈返轉頭），呢個就更加唔拖得喇。
- 如果你懷疑貓貓吞咗異物，或者食咗有毒嘅嘢，唔好等佢開始出現嚴重病徵，直接帶去睇醫生先穩陣。
總結：貓仔嘔吐點算好？
如果只係偶然嘔一次，但精神仲好好，
咁可能只係食得太快、吞咗毛球，或者腸胃少少唔舒服，
呢個時候可以觀察吓，調節吓飲食或者生活習慣。
但如果嘔吐變得密咗，或者開始出現其他異常病徵，咁就唔好再齋睇喇，嗱嗱聲帶佢去獸醫診所檢查吓，比起自己估估吓，都係等專業嘅獸醫嚟判斷先至最準繩。
希望呢篇文章可以俾你對貓仔嘔吐嘅情況有更清楚嘅了解，
養貓嘅路上一路都會遇到各式各樣嘅突發情況，
但唔使擔心，慢慢學，你一定會越嚟越熟手㗎喇！