狂犬病 (Rabies)，俗稱「瘋狗症」，係一種由病毒引起、可傳染畀人嘅致命疾病。
瘋狗症病毒主要經由已受感染動物嘅口水傳播，最常見嘅方式包括被咬傷、抓傷，或傷口直接接觸到帶病毒嘅口水。感染後可能會出現以下症狀：
瘋狗症病毒主要經由已受感染動物嘅口水傳播，最常見嘅方式包括被咬傷、抓傷，或傷口直接接觸到帶病毒嘅口水。感染後可能會出現以下症狀：
- 恐水、怕水（因喉嚨肌肉痙攣導致無法吞嚥）
- 肌肉不自主抽搐
- 意識混亂、出現攻擊性
- 昏迷甚至死亡
一旦瘋狗症病發，基本上係無法醫治，致死率高達 100%。
因此，注射狂犬病疫苗係預防呢個病唯一而且最有效嘅方法！
香港法例點規定？
- 香港現況： 香港自 1987 年起已無本地動物感染個案，屬於「狂犬病受控制地區」。
- 法律規定： 根據香港法例第 421 章《狂犬病規例》，所有超過 5 個月大嘅狗隻，必須注射狂犬病疫苗、植入晶片及領取狗隻牌照。如果違反規定，最高可被罰款港幣 10,000 元。
無論你係新手定資深狗主，為愛犬定期打瘋狗症針，既係法律責任，亦係保護社區健康嘅重要防線。
💡各區狗隻牌照及疫苗注射資訊請參閱：香港漁農自然護理署 (AFCD) 官網
狗狗打瘋狗症疫苗須知
（一）接種時間表及費用
| 項目 | 說明 |
|---|---|
| 首次接種及領牌 | 狗狗滿 5 個月大時，必須注射第一針並申領狗牌 |
| 續牌及補強針 | 之後每 3 年必須打補強針，並為狗牌續期 |
| 接種地點 | 漁護署轄下嘅動物管理中心、授權私人獸醫診所 |
| 漁護署收費 | 港幣 80 元（已包括晶片、疫苗及狗牌費用） |
| 私人診所收費 | 費用各異，詳情請向各診所查詢 |
瘋狗症疫苗產生嘅抗體會隨時間下降，因此每 3 年都必須打補強針，先可以符合法例要求並確保持續有效保護。
（二）常見與罕見副作用
狗狗打完瘋狗症針後嘅副作用可分為兩類：
常見嘅輕微反應 (通常喺注射後 24～48 小時內出現)
- 輕微發燒
- 疲倦、渴睡
- 冇胃口
- 打針位置紅腫、有局部硬塊、短暫甩毛
想知【狗狗唔食嘢嘅其他原因】？可以睇呢篇：狗狗唔食嘢但精神好好？2 大「狗不吃飯」情境可能係疾病前兆！
罕見但須立即求醫嘅嚴重反應
- 出風赧（蕁麻疹）等皮膚過敏反應
- 嘔吐、肚瀉
- 呼吸急速或困難
- 虛脫、抽搐、昏迷
若狗狗出現嚴重或持續性嘅唔舒服，應立即聯絡獸醫進行評估同治療！
（三）如何紓緩狗狗打針後嘅副作用？
狗狗打完針後如果出現輕微不適，可以咁做：
- 為狗狗提供一個安靜、溫暖嘅空間好好休息
- 持續觀察精神同食慾狀況 2～3 日
- 如果打針位置紅腫，可以用毛巾包住冰袋輕輕冷敷
- 若症狀加劇或出現任何嚴重反應，應立即求醫
貓貓需要打瘋狗症疫苗嗎？
（一）接種時間同對象
喺香港，法例並無強制要求所有貓貓都要打瘋狗症針。但基於健康安全考慮，獸醫普遍建議以下貓貓接種：
- 半戶外貓、會出街散步嘅貓貓
- 需要移民或往返香港及外地嘅貓貓（呢個係出入境檢疫嘅強制要求）
💡貓隻出入境檢疫詳情請參閱：漁農自然護理署 貓隻進口許可證
| 階段 | 建議接種時間 |
|---|---|
| 基礎免疫 | 幼貓滿 12 週大後可注射第一針 |
| 定期補強 | 之後每年或每三年打一次補強針（視乎疫苗種類） |
想了解【幼貓其他疫苗時間表】必睇：幼貓杜蟲、打針時間表一次搞懂！新手貓奴必讀！
（二）貓貓常見副作用與安全建議
貓貓打瘋狗症針嘅副作用相對少見，但需要特別注意罕見嘅「注射部位惡性腫瘤」（FISS）風險。
安全注射建議如下：
安全注射建議如下：
- 優先選擇「無佐劑瘋狗症疫苗」，減低局部發炎反應同腫瘤風險
- 選擇後腳遠離身體嘅位置或尾巴末端等易於觀察、方便處理嘅位置打針
（三）貓貓瘋狗症疫苗費用參考
| 疫苗類型 | 每針費用（大概） |
|---|---|
| 含佐劑疫苗 | 約港幣 200～400 元 |
| 無佐劑疫苗 | 約港幣 500～800 元 |
雖然無佐劑疫苗價錢較貴，但對體質敏感或長壽嘅貓貓嚟講，係更安全嘅選擇。
預防瘋狗症 4 大守則
- 依法為狗狗打針續牌：呢個係最有效嘅防範方式。
- 做個盡責主人，絕不棄養：棄養會增加流浪動物數量，擴散疾病風險。
- 避免接觸野生動物：唔好接觸或餵食野生動物，如蝙蝠、馬騮及來歷不明嘅流浪貓狗。
- 遵守出入境檢疫規定：帶寵物出入境必須嚴格遵守漁護署嘅檢疫規定。
瘋狗症疫苗常見 Q&A
Q1：係咪一定要打瘋狗症針，先可以幫狗狗入晶片？
A：對狗隻嚟講，係。根據香港法例，狗狗滿 5 個月大時，植入晶片、注射疫苗同申領狗牌係必須一次過完成嘅三件事。
Q2：唔幫狗狗打瘋狗症針會有咩後果？
A：除咗增加感染風險，仲可能會因為違反《狂犬病規例》而被罰款最高港幣 10,000 元。
Q3：瘋狗症針過期幾耐唔打會被罰錢？
A：狗隻牌照有效期係 3 年。牌照到期後無續領（即係無喺限期內重新打針），就已經算係違法。
Q4：如果中咗瘋狗症有冇得醫？
A：一旦病發，就冇得醫。唯一嘅方法係喺被懷疑帶病毒嘅動物咬傷後，立即用大量清水同梘液清洗傷口並馬上求醫，由醫生評估係咪需要注射人用疫苗，先可以有效防止病發！
Q5：被抓傷都會感染瘋狗症嗎？
A：有機會。如果傷口接觸到帶病毒嘅口水，就有可能造成感染。
Q6：人需唔需要打瘋狗症預防針？
A：一般市民無需例行接種。但獸醫、動物護理員、野生動物研究員等高風險職業，就建議進行預防性接種。
瘋狗症係致命疾病，但亦係可以完全預防嘅。主人只要做到以下三件事：
瘋狗症係致命疾病，但亦係可以完全預防嘅。主人只要做到以下三件事：
- 依法為愛犬打針續牌
- 做個盡責嘅主人，切勿棄養
- 正確認識瘋狗症傳播同預防方法
就能為寵物、家人同社區營造一個更健康、安全嘅生活環境。守護社區健康，由為愛犬打針做起！
參考資料
- https://www.afcd.gov.hk/tc_chi/quarantine/qua_rabies/qua_rabies.html
- https://www.info.gov.hk/gia/general/202209/27/P2022092700329.htm