你以前有冇睇過「西莎」罐頭廣告？廣告入面嗰隻蹦蹦跳跳嘅白色狗狗，就係「西高地白爹利（West Highland White Terrier）」！
西高地白爹利常被暱稱為西高地、白爹利或 Westie，係嚟自蘇格蘭嘅小型爹利犬，最早喺 17 世紀被培育用嚟捉狐狸、老鼠等，1907 年英國犬業俱樂部正式承認呢個品種，並逐漸受到全球喜愛。
如果你想更了解西高地白爹利嘅魅力，而家就跟住我哋繼續睇落去啦！
西高地白爹利外觀特徵一覽
| 項目 | 說明 |
|---|---|
| 體型 | 小型犬 |
| 耳仔 | 細小而且直立，耳尖明顯 |
| 毛色 | 純白色為標準 |
| 毛質 | 雙層毛，外層粗硬、內層柔密 |
| 特徵 | 表情精靈、尾巴上翹（好似紅蘿蔔） |
西高地白爹利性格好唔好？5大特質一次睇
活潑開朗
西高地白爹利個性開朗、活潑好動，鍾意跑同玩遊戲，係屋企嘅開心果。
友善忠誠
西高地白爹利對屋企人特別親近，會同主人建立好深厚嘅感情，唔單止適合單身人士，亦好適合有小朋友嘅家庭。
勇敢警覺
身為爹利犬嘅一種，西高地有高度警覺性，遇到異常情況會主動吠叫提醒主人，係天生嘅小型守護犬。
略帶固執
雖然西高地聰明又學嘢快，但佢哋都有爹利犬嘅通病——就係有啲固執，有時可能會扮聽唔到你嘅指令。
好奇心強
西高地對環境充滿興趣，鍾意用個鼻去探索世界，亦可能會鍾意追貓仔、雀仔等小動物。
西高地白爹利智商高唔高？
西高地白爹利係非常聰明嘅小型犬，理解能力強，學習速度亦好快。
喺訓練方面，儘管間中會顯得有啲固執，但西高地對正向獎勵特別受落，例如用零食、讚美或遊戲作為鼓勵，可以幫佢哋更快學識指令。
西高地亦好適合參加需要用腦同郁動嘅活動，唔單止可以畀佢哋「放電」，亦能滿足佢哋嘅探索慾，令佢哋更開心、更穩定。
西高地白爹利有咩缺點？3大潛在挑戰必知
鍾意吠叫
西高地天生對聲音非常敏感，好似門鐘聲、經過嘅人聲或唔熟嘅動靜，都可能引起佢哋吠叫。
如果冇足夠運動或刺激，佢哋亦可能因為悶而不停吠，需要適當訓練同轉移注意力，先有助減少呢類情況。
有破壞行為
如果冇辦法充分「放電」，西高地好容易會出現咬鞋、咬傢俬等破壞行為。
透過每日安排遊戲時間、散步同益智玩具，可以畀佢哋精力有地方發洩，亦能減低呢啲不良行為嘅發生。
容易有分離焦慮
西高地好依賴主人嘅互動，比較唔適合長時間獨處。
如果被獨自留喺屋企太耐，佢哋可能會因為焦慮而吠叫、亂咬嘢或坐立不安，建議主人要畀足夠時間陪伴。
西高地白爹利同其他白色狗狗點樣分？
你有冇試過分唔清西高地白爹利同其他白色小型犬？
佢哋外型雖然相似，但性格同照顧需求其實好唔同。以下幫大家整理出成日同西高地搞亂嘅兩個品種：「摩天使」同「白色史納莎」，等你快速掌握點樣分！
西高地白爹利 vs 摩天使
| 項目 | 西高地白爹利 | 摩天使 |
|---|---|---|
| 毛質 | 粗硬、蓬鬆雙層毛 | 柔順、好似絲咁嘅單層毛 |
| 體型 | 稍大，肌肉結實 | 較細小，屬玩具犬 |
| 耳仔 | 細小直立 | 垂耳 |
| 性格 | 活潑好動、勇敢、有主見 | 溫馴親人、極度痴身、愛撒嬌 |
西高地白爹利 vs 白色史納莎
| 項目 | 西高地白爹利 | 白色史納莎 |
|---|---|---|
| 耳型 | 直立 | 垂耳 (V型摺耳) |
| 毛色 | 淨係得純白色 | 除咗白色，仲有椒鹽、黑銀色等 |
| 性格 | 活潑外向、友善易訓練 | 警覺敏感、忠誠但更固執 |
西高地白爹利適合新手嗎？
如果係新手主人，西高地白爹利可以係唔錯嘅選擇，佢哋聰明，而且好鍾意同主人互動。
不過要注意嘅係，佢哋雖然親人，但都有爹利犬特有嘅獨立同固執，即係話訓練時要有耐性、方法要一致。
佢哋並唔係「低維護」嘅狗狗，需要定期梳毛、剪毛，同埋每日都要有足夠嘅活動量同遊戲時間。
但如果你願意花時間陪佢、肯學習點樣正確照顧一隻活潑又有個性嘅狗，咁西高地白爹利將會非常適合你！
接下來就提供大家「西高地白爹利飼養指南」，幫各位更加了解佢哋嘅需要！
西高地白爹利好唔好養？2 大飼養需求必知
毛髮護理需求
西高地白爹利有層粗硬嘅外毛同柔軟嘅底毛，雖然甩毛量唔算多，但都要定期護理，如果唔係好易打結或引發皮膚問題。
以下整理嘅重點必睇：
- 梳毛建議：每星期至少梳毛 2–3 次，有啲主人甚至建議每日輕刷，避免打結。
- 沖涼頻率：大約每 4 星期沖一次涼就夠，避免洗得太密搞到皮膚太乾或敏感。
- 美容修剪：建議每 4–6 星期進行一次修剪或專業美容（有啲會用手拔毛方式）。
- 基本清潔：包括每日刷牙、定期清耳仔、剪指甲，可以有效預防牙石同感染。
飲食需求
要令西高地白爹利活力充沛、毛髮靚仔，營養攝取絕對唔可以馬虎！
飲食要符合以下基本營養標準：
- 揀啱主食：建議揀根據 AAFCO/NRC 國際營養標準設計嘅優質狗糧。
- 餵食次數：成犬每日分 2 餐餵食，幼犬就應每日 3 餐，避免低血糖。
- 控制熱量：避免餵食過量或任食，可能會導致肥胖同代謝問題。
- 營養補充：如果有皮膚過敏、關節問題，可以考慮添加魚油、葡萄糖胺等保健品，但要先諮詢獸醫。
西高地白爹利壽命長唔長？7 大疾病要留神
西高地白爹利平均壽命大約為 13 至 15 年，有啲甚至可以活到 16 歲以上。不過喺照顧上都要注意一啲常見健康問題，先可以令佢哋健健康康活得更耐！
以下列出西高地白爹利常見嘅健康問題：
皮膚問題
西高地嘅皮膚比較敏感，容易對環境、花粉、塵蟎或某啲食物產生過敏，導致異位性皮膚炎。
呢個病會令狗狗係咁R痕、舔毛，甚至導致皮膚紅腫、甩毛或感染，所以主人平時要特別留意佢哋有冇成日R痕或舔同一個位。
膀胱癌
膀胱癌係西高地較容易患上嘅泌尿道疾病之一。
呢種癌症初期可能表現為輕微血尿或屙尿有困難，但症狀成日被誤以為係普通尿道炎，容易延誤治療。
如果出現頻密想屙尿、屙尿時好似好痛，或尿中帶血，建議盡快帶狗狗求醫檢查。
顱骨下頜骨骨病 (C.M.O.)
呢個係一種會喺西高地BB狗身上發生嘅遺傳病，最常見於 3 到 8 個月大之間。
會導致下顎同頭骨異常增生，令狗狗出現食嘢困難、咬合唔正、流口水同疼痛等症狀。
如果幼犬食飯時表現到唔願食或咬唔到，應盡早求醫。
膝關節異位 (菠蘿蓋移位)
「菠蘿蓋移位」係好多小型犬常見嘅關節問題，指膝蓋骨由正常位置滑咗出嚟，可能導致狗狗行路時「拐下拐下」。
如果冇及時處理，可能會造成長期關節磨損同關節炎。維持適當體重同適量運動，有助減低發生風險。
乾眼症
乾眼症係因為淚水分泌唔夠，造成眼球表面乾澀、紅腫，甚至可能引發角膜受傷或潰瘍。
西高地屬於乾眼症高風險犬種，如果佢哋成日瞇眼、流眼水或用手R眼，就可能係前兆。
特發性肺纖維化
年紀比較大嘅西高地，亦可能會有特發性肺纖維化 (IPF)，又叫「西高地肺病」。
呢個病會造成呼吸困難、咳同運動耐力下降，如果你發現佢哋成日喘氣或者唔願郁，記得帶去檢查。
球狀細胞白血質障礙 (GCL)
呢個係一種比較罕見但嚴重嘅遺傳性神經疾病，會導致狗狗嘅神經系統退化。
早期症狀可能包括行路唔穩、頭部震顫或四肢無力，隨住病情發展，狗狗可能會逐漸失去行動能力，必須特別注意！
西高地白爹利健康小貼士
平時多啲觀察佢嘅日常行為，並且定期安排獸醫檢查，特別係牙齒、眼仔、耳仔同關節呢啲位嘅保養同預防。
只要由細個開始建立良好嘅照顧習慣，相信西高地白爹利將會陪你快樂咁度過好多美好時光！
參考資料
- https://www.thekennelclub.org.uk/search/breeds-a-to-z/breeds/terrier/west-highland-white-terrier/
- https://www.pdsa.org.uk/pet-help-and-advice/looking-after-your-pet/puppies-dogs/small-dogs/west-highland-white-terrier
- https://westieclubamerica.com/
- https://www.akc.org/dog-breeds/west-highland-white-terrier/
- https://www.purina.co.nz/find-a-pet/dog-breeds/west-highland-white-terrier