相信大家睇卡通片或者喺印象入面，都見過「狗狗食骨頭」嘅畫面，搞到好多人以為狗狗天生就鍾意食，甚至要當正餐咁食，但現實中絕對唔建議畀狗狗食任何種類嘅骨頭㗎！
雖然狗狗對住骨頭流晒口水，但與其話係鍾意「食」，不如話狗狗係因為天性使然鍾意「咬」，呢個動作亦都可以幫佢哋釋放壓力同減輕焦慮，同時消耗精力，係一種放鬆同安撫自己嘅方式。
但獸醫普遍認為畀狗狗食骨頭「風險極高」，如果想畀狗狗咬嘢，其實有好多更安全嘅替代品，今日就帶大家睇吓！
狗狗唔食得骨頭嘅 4 大致命風險
狗狗食骨頭風險 1. 𠝹傷消化道與排便困難
煮熟咗嘅骨頭會變到好乾好脆，咬碎之後好似刀片咁利，好容易𠝹傷狗狗嘅口腔、喉嚨或者腸道。
碎骨如果卡住喺大腸，亦會搞到佢屙屎好辛苦、便秘或者肚痛。部份骨髓嘅脂肪仲會引起肚屙或者腸胃炎。
狗狗食骨頭風險 2. 抖氣困難甚至窒息
碎骨或者圓形嘅骨頭如果卡住喺喉嚨同氣管，可能會搞到狗狗抖唔到氣，甚至窒息，隨時無命！
狗狗食骨頭風險 3. 腸道阻塞與穿孔
如果吞咗太大嚿骨，可能會塞住腸道；尖銳嘅碎骨更加可能刺穿胃壁或者腸壁，造成穿孔性腹膜炎，呢個情況係需要緊急做手術救命㗎。
狗狗食骨頭風險 4. 胰臟炎
好似豬肋骨呢類脂肪含量高嘅骨頭，長期食好容易加重胰臟負擔，引發急性胰臟炎。
常見症狀包括嘔吐、肚屙、無晒精神同無胃口。
由上面可見，狗狗食骨頭如果搞到嚴重胰臟炎、腸塞或者胃穿孔，甚至可能會引發敗血症死亡，所以絕對唔建議畀狗狗食任何骨頭！
狗狗唔小心吞咗骨頭點算好？
當狗狗誤吞骨頭嗰陣，主人一定要保持冷靜，並即刻觀察佢嘅狀況。
就算無即時危險，都係建議帶佢睇獸醫，同醫生講清楚狗狗食咗咩骨、食咗幾耐等詳細資料，等專業人士去評估點樣處理。
如果狗狗食完骨頭之後出現嘔吐（特別係嘔血）、抖氣急促、屙屎困難或者有任何唔妥，代表可能已經受咗傷，需要即刻送去急症。
特別係狗狗食骨頭啃親嗰陣，千祈唔好自己伸手入去挖或者幫佢扣喉，最啱嘅做法係即刻送院，等獸醫用內視鏡將異物攞出嚟，避免自己亂搞造成更嚴重嘅傷害！
唔畀狗狗食骨頭，有咩可以代替？
如果你想滿足狗狗想咬嘢嘅慾望，但又驚骨頭太危險。以下推介幾種相對真骨頭安全嘅替代品，既可以令狗狗咬得過癮，又可以減低受傷風險：
| 類型 | 特點 |
|---|---|
| 潔齒骨／潔齒棒 | 模擬𡁻嘢嘅動作、減少牙菌膜 |
| 天然肉條或無骨零食 | 提供蛋白質同咬口 |
| 磨牙玩具 | 夠硬淨唔易爛、可以用嚟訓練 |
其實想滿足狗狗咬嘢嘅心願，都可以透過食零食嚟達成㗎！
好似 Heromama 阿嬤養的 香烤燒肉零食 咁，三種口味軟硬度唔同，由出緊牙仔嘅狗 B、成犬到老狗都可以一邊享受咬骨頭嘅樂趣，亦可以食到肉肉嘅健康美味，一舉兩得呀～
狗狗食骨頭常見問題 Q&A
Q1：狗狗食咗骨頭會自己消化到嗎？
少少細骨喺胃酸入面可能會變軟，但大部份骨頭依然會碎開並𠝹傷腸道。
特別係尖銳嘅雞骨或者中空嘅骨頭，更加容易造成腸穿孔同阻塞，所以就算有部份消化到，都唔代表安全㗎！
Q2：狗食太多骨頭會點樣？
狗狗食得太多骨頭可能會導致便秘、腸道阻塞、牙齒受損、胰臟炎同埋腸胃炎等問題。
如果想畀狗狗磨牙，都係建議揀天然零食，或者轉用安全嘅磨牙玩具會穩陣啲！