貓 B 唔識去廁所點算好？4 招幼貓貓砂訓練

無貓媽媽湊大嘅小貓（貓 B），要令佢知道去貓砂盆屙殊殊同便便，係需要少少時間適應嘅。

不過貓貓天生就習慣喺沙堆上面解決，只要用少少技巧，就可以幫貓 B 喚醒呢個天性啦！

貓 B 體型比較細粒，建議揀入口比較低嘅貓砂盆，或者喺盆邊放個小斜台 / 矮櫈仔方便佢出入。

如果貓砂盆太高，貓 B 可能會因為覺得辛苦而唔想行入去，結果反而會揀喺梳化或者張床度屙尿㗎！

可以喺貓砂盆入面擺少少貓 B 嘅尿或者便便。

當小貓聞到自己排泄物嘅氣味，就會自然而然認得嗰度係去廁所嘅地方。

準備好之後就可以等貓 B 食飽，通常佢哋喺食飽之後半個鐘內就會想去廁所。

想去廁所嘅貓 B 會有周圍聞、行嚟行去嘅舉動，呢個時候可以輕手啲，快快趣將佢抱入貓砂盆入面，等佢喺貓砂盆入面屙尿屙屎。

重複做多幾次，耐咗貓 B 就會自己識得行去貓砂盆解決。

可以等貓 B 屙完之後，用手喺佢面前撥動啲貓砂埋住啲便便，示範畀佢睇點樣撥砂。

如果貓 B 表現到好抗拒咁，就唔好夾硬逼佢繼續。

如果唔係，貓 B 可能會將貓砂盆同唔舒服嘅感覺連埋一齊，到時就更加難教佢用貓砂啦。

延伸閱讀：新手養貓須知！詳細用品清單、開支預算，專屬新手貓奴嘅入門指南

當佢成功去啱地方屙屎屙尿嗰陣，記得摸吓佢、出聲讚吓佢。千祈唔好用打罵嘅方式，咁樣只會令佢對貓砂盆產生恐懼。

跟住呢幾招去做，通常一星期之內貓 B 就會學識去邊度去廁所㗎啦。

如果都係唔成功，又唔使太心急，有啲貓 B 係需要多啲時間去適應嘅，只要你肯畀心機陪佢慢慢練，好快就會見到進步㗎喇！

延伸閱讀：新手養貓須知！詳細用品清單、開支預算，專屬新手貓奴嘅入門指南