「獒犬」（Mastiff）並唔係單一狗種，而係對一班體型龐大、肌肉結實、兼備力量同守護本能嘅大型犬嘅統稱。
獒犬嘅歷史可以追溯到古老嘅 Molossus 血統，喺歐亞大陸上廣泛用嚟打獵、鬥狗同做護衛。隨住演化同改良，唔同地區繁衍出多種獒犬品種，例如藏獒源自西藏高原、土佐犬融合咗日本同歐美狗種、阿根廷杜告犬就集多種獵犬血統於一身。
想深入了解各種獒犬嘅外表同性格分別？接落嚟，我哋會逐一介紹具代表性嘅獒犬品種，帶你睇吓呢啲狗狗嘅獨特魅力！
獒犬品種 1. 藏獒
藏獒，又叫藏獒犬、松藩狗、雪山獅子犬，係世界級珍稀狗種之一，被譽為「東方神犬」。佢哋體型強壯、個樣好有威嚴，可以喺高原極端天氣入面生存，係守護家園嘅絕佳狗種。
外觀特徵
| 特徵 | 說明 |
|---|---|
| 體型 | 大型犬，肩高 65–85 cm，體重約 40–55 kg（高原型可能仲重啲） |
| 體態 | 肌肉飽滿，肚腩平住收起 |
| 毛髮 | 又厚又長，外表好有威勢 |
個性特質
- 野性尚存：性格強悍獨立，唔容易馴服。
- 忠心守護：對主人極度忠心，護衛本能極強。
- 服從性低：訓練難度大，需要極大耐性同經驗。
獒犬品種 2. 沙皮狗
沙皮狗源自中國廣東省，歷史悠久，早期主要用嚟做看門狗同鬥犬。而家因為獨特嘅「起摺」外表同埋溫和性格，成為咗好受歡迎嘅家庭犬。
外觀特徵
| 特徵 | 說明 |
|---|---|
| 體型 | 中型犬，肩高 46–51 cm，體重 18–25 kg |
| 外觀 | 皮膚鬆弛多摺，耳仔細細，嘴部短而闊 |
| 毛髮 | 短毛嚡烚烚，毛色多樣（紅啡、黑、忌廉色、黃啡等） |
| 分型 | 骨嘴型：輕巧靈活；肉嘴型：厚重多摺，嘴部皮肉豐厚 |
個性特質
- 忠誠深情：對主人親近，感情濃厚。
- 保護本能：對陌生人冷淡，有做看門狗嘅潛力。
- 獨立自主：唔需要過度依賴主人，可以自己搞掂自己。
- 頑固倔強：硬頸，訓練上需要耐性同堅持。
獒犬品種 3. 大丹犬
大丹犬，又被稱為「溫柔巨人」，係世界上體型最大嘅狗種之一。原產於德國，曾經用嚟捉野豬同守護莊園，而家就憑住溫和親人嘅特質廣受喜愛。
外觀特徵
| 特徵 | 說明 |
|---|---|
| 體型 | 大型犬，肩高 76–84 cm，體重 45–77 kg |
| 體態 | 骨架輕盈，身形修長優雅 |
| 毛髮 | 短毛，顏色多樣（黑、藍、虎斑、小丑斑等） |
| 頭部 | 線條分明，表情莊重 |
個性特質
- 溫柔安靜：天生淡定，唔鍾意亂吠。
- 忠心親人：對屋企人充滿愛，樂於陪伴。
- 保守內斂：對陌生人比較保守，要由細做社會化訓練。
- 聰明適中：肯學嘢，但反應無敏捷型狗種咁快。
獒犬品種 4. 洛威拿
洛威拿（Rottweiler，又譯羅威納犬），源自德國，係工作犬嘅代表。外表威嚴，但實際上係對主人忠心又溫情嘅伴侶犬。
外觀特徵
| 特徵 | 說明 |
|---|---|
| 體型 | 大型犬，肩高 61–69 cm，體重 45–60 kg |
| 體態 | 肌肉結實，骨架粗壯 |
| 外觀 | 頭闊、下巴結實、短垂耳，黑色配啡紅斑紋 |
| 毛髮 | 短毛濃密 |
個性特質
- 冷靜自信：沉穩可靠，面對挑戰唔會慌張。
- 忠誠親近：對主人好黐身，鍾意陪住主人。
- 警戒保守：面對陌生人有保留，需要好好嘅社會化訓練。
- 高智商：服從性高，可以好快學識指令。
獒犬品種 5. 土佐犬（日本獒犬）
土佐鬥犬，又叫日本獒犬、土佐犬，發源於日本四國高知縣。體格壯碩，性格忠誠，以前曾經被培養為鬥犬，係日本最大嘅狗種之一。
外觀特徵
| 特徵 | 說明 |
|---|---|
| 體型 | 大型犬，肩高 60–82 cm，體重 30–90 kg 以上 |
| 體態 | 威風凜凜，肌肉發達，大頭骨，皮膚鬆弛 |
| 毛髮 | 短硬毛，毛色有紅、虎斑、黑等 |
| 特徵 | 流口水比較少，長垂尾同垂耳 |
個性特質
- 警惕無畏：保護性極強，唔會輕易退縮。
- 忠心溫馴：對主人順從，感情深厚。
- 領域意識：狗公有強烈地盤觀念，可能會有攻擊性。
- 聰明靈敏：狗 B 時期已經可以掌握基本指令，適合及早訓練。
獒犬品種 6. 拳師狗
拳師狗（Boxer）源自德國，活潑愛玩，被稱為「狗界彼得潘」。心智成熟得比較慢，但充滿活力同親和力，係好多家庭嘅好夥伴。
外觀特徵
| 特徵 | 說明 |
|---|---|
| 體型 | 中型犬，肩高 57–63 cm，體重約 30–31 kg |
| 體態 | 呈正方形比例，肌肉發達 |
| 毛髮 | 短毛光滑，顏色為鹿黃或虎斑，通常有白斑 |
| 頭部 | 短頭顱，鈍口鼻，額頭有摺紋 |
個性特質
- 友善服從：性格友善，肯配合主人。
- 忠誠親近：對主人同小朋友好深情，鍾意陪住屋企人。
- 精力旺盛：活潑好動，對周圍環境充滿熱情。
- 頑皮固執：間中會硬頸，但會勇敢守護屋企。
獒犬品種 7. 阿根廷杜告犬
阿根廷杜告犬（Dogo Argentino），又叫阿根廷獒犬，全身白毛，兼具高貴同力量。佢哋警覺性高，忠心耿耿，喺香港比較少見。
外觀特徵
| 特徵 | 說明 |
|---|---|
| 體型 | 大型犬，肩高 60–70 cm，體重 25–45 kg |
| 毛髮 | 短毛平滑，全白，間中有黑斑或黃毛 |
| 頭部 | 方形頭，耳仔位置高而且耷落嚟 |
| 身體 | 肌肉發達，尾長而粗壯 |
個性特質
- 高貴沉穩：優雅得嚟有力量，唔會心急。
- 忠誠守護：對主人同家庭極度忠心。
- 警覺敏銳：打獵本能同嗅覺都好強。
- 聰明服從：容易訓練，學指令好快。
獒犬品種 8. 加納利犬
加納利犬（Presa Canario）原產於西班牙加納利群島，係傳統嘅牧牛同護衛犬。外型淡定健壯，特徵鮮明。
外觀特徵
| 特徵 | 說明 |
|---|---|
| 體型 | 中大型犬，肩高 60–66 cm，體重 40–65 kg |
| 體態 | 健壯結實，身長略大於肩高 |
| 臉部 | 黑色面罩，表情嚴肅 |
| 特徵 | 體型勻稱，動作沉穩 |
個性特質
- 自信穩重：淡定冷靜，面對威脅唔會慌張。
- 忠誠服從：同主人親近，依賴度高。
- 警戒明顯：對陌生人保持警惕，吠聲低沉有阻嚇力。
獒犬香港可以養嗎？
喺香港，並唔係所有獒犬都可以隨便養！根據香港法例第 167D 章《危險狗隻規例》，有部分獒犬品種被列為「格鬥狗隻」，包括：日本土佐犬、阿根廷杜告犬、巴西非拉狗（Fila Brasileiro）以及佢哋嘅混種。
呢類「格鬥狗隻」喺香港係嚴禁入口、繁殖同售賣嘅。已經登記咗嘅現有狗隻，出街一定要由成年人拖住、用唔超過 1.5 米嘅狗帶，仲要戴上專用狗口罩！
至於其他獒犬品種，好似藏獒、大丹犬、洛威拿、沙皮狗等，香港並冇明文禁養。不過，因為佢哋體重通常超過 20 公斤，出入公眾地方必須受「大型狗隻」規例管制，要用唔超過 2 米嘅狗帶拖實。加上佢哋體型龐大，飼養前一定要考慮清楚屋企空間、開支同埋訓練難度呀！