狗狗肺炎係指肺部深層組織發生嚴重發炎，特別係負責呼吸交換嘅「肺泡」。
當肺炎出現嗰陣，原本應該充滿空氣嘅肺泡，會被膿液或者液體霸佔咗，搞到氧氣無辦法順利進入血液，繼而造成身體缺氧。
肺炎絕對唔係單純嘅傷風或者咳，如果無及時醫治，病情可能會急速惡化，所以被視為一種有可能致命嘅急症。及早認清狗狗肺炎嘅原因、症狀同治療方式，係保住狗狗性命同康復嘅關鍵。
接落嚟我哋會帶你進一步了解狗狗肺炎常見嘅成因同高危一族，幫主人喺第一時間做出正確判斷！
狗狗肺炎症狀有邊啲？
狗狗肺炎如果可以及早發現並接受治療，治癒率會大大提高。主人平時可以留意以下幾類症狀，一發現有唔妥就應該盡快睇醫生：
- 咳聲變得又深又濕，好似卡住啲痰咁
- 抖氣速度明顯變快（抖氣急促）
- 抖氣睇落好辛苦，個肚起伏得好犀利（索晒氣）
- 發燒
- 無晒精神、成日眼眼閉想瞓覺或者唔願郁
- 胃口明顯變差，甚至完全唔肯食嘢
- 牙肉、條脷或者口腔黏膜變成偏藍或者紫色（缺氧發紺）
如果狗狗肺炎無得到適當嘅治療，病情可能會持續惡化，甚至帶嚟嚴重後果：
- 肺部後遺症：有啲狗狗就算好返，肺部都可能留低病變或者形成肺膿腫
- 死亡風險變高：特別係吸入性肺炎，死亡風險比較高，病情惡化時可能會引發敗血症或者休克
所以一旦懷疑狗狗出現任何一項肺炎症狀，請盡早送去獸醫診所檢查，越早睇醫生、越早醫，就越能夠大幅減低風險同改善病情！
狗狗肺炎成因？5 大常見類型與原因
狗狗肺炎並唔係得一種，根據引發嘅原因唔同，常見可以分為以下幾種類型：
狗狗肺炎成因 1｜細菌性肺炎
呢類肺炎係由細菌感染引起，例如常見嘅支氣管敗血性博德氏菌。
特別容易發生喺經常同其他狗狗有密切接觸嘅環境入面，好似寵物酒店、狗場或者訓練學校。當狗狗抵抗力跌嗰陣，細菌就好容易入侵肺部。
狗狗肺炎成因 2｜病毒性肺炎
病毒性肺炎多數發生喺未打齊防疫針嘅狗狗身上，因為缺乏足夠嘅免疫保護。
好似狗瘟（犬瘟熱）病毒等，都有可能引發嚴重嘅呼吸道感染，進一步影響肺部健康。
狗狗肺炎成因 3｜真菌（霉菌）性肺炎
真菌性肺炎通常同「環境」有關。
當狗狗吸入空氣入面嘅真菌孢子嗰陣，可能會導致呼吸道同肺部發炎，喺特定環境或者長期喺戶外活動嘅狗狗身上比較容易發生。
狗狗肺炎成因 4｜寄生蟲性肺炎
部份寄生蟲（例如肺線蟲）可能會游走去肺部，造成局部發炎同感染，繼而影響正常嘅呼吸功能。
狗狗肺炎成因 5｜吸入性肺炎
當狗狗唔小心吸咗嘔吐物、嘢食或者液體入氣管，可能會刺激肺部並引發發炎反應。呢種情況特別容易出現喺做過麻醉、吞嚥反射變弱或者神智唔清醒嘅狗狗身上。
狗狗肺炎嘅高危一族係邊啲？
其實任何年紀、任何品種嘅狗狗都有可能發生肺炎，並唔係得特定族群先會病，不過最需要提高警覺嘅一定係「老狗」一族啦。
因為年紀大嘅狗狗免疫力慢慢下降，身體對抗感染嘅防禦能力變弱，肺部一旦受到刺激或者感染，更加容易出現嚴重嘅發炎反應。
除咗咁，老狗亦比較常有其他慢性或者神經肌肉相關疾病，例如吞嘢功能變差嘅情況，一旦嘢食或者液體唔小心入咗呼吸道，就有可能成為吸入性肺炎或者後續細菌感染嘅誘發原因。
所以及早留意抖氣變化、咳或者精神變差等微細症狀，係預防老狗肺炎惡化嘅重要關鍵！
狗狗肺炎點樣醫？
當狗狗被診斷出有肺炎嗰陣，獸醫會根據病情嘅嚴重程度，採取唔同嘅治療方式，主要目標係幫手令呼吸變順、控制感染，同埋畀身體有足夠時間復原。
常見嘅治療方式包括：
- 吊鹽水（靜脈輸液）補充水份：透過吊鹽水維持體內水份，有助令杰撻撻嘅痰變稀。
- 抗生素治療：如果肺炎同細菌感染有關，獸醫會用合適嘅抗生素嚟控制感染。
- 氧氣治療：透過瞓氧氣箱或者戴氧氣罩，減輕缺氧對心臟同其他器官造成嘅負擔。
- 霧化治療（聞氣）：用霧化機將水份或者藥物變成超細霧氣，令肺部深處保持濕潤。
- 留醫觀察與照顧：比較嚴重嘅狗狗需要留醫，接受 24 小時氧氣支援同靜脈打藥，留醫時間會視乎康復進度而定。
狗狗肺炎出院點照顧？
狗狗喺肺炎治療之後可唔可以順利康復，出院後嘅居家照顧其實非常關鍵。呢段時間嘅護理質素，會直接影響復原速度同埋會唔會再次惡化。
狗狗肺炎照顧 1｜保持溫暖、乾爽又乾淨嘅環境
當狗狗肺部慢慢復原緊嘅時候，最怕受到寒冷或者潮濕刺激。
建議畀狗狗留喺通風但唔會食正風嘅室內空間，避免溫差太大。亦要定期清潔環境，減少灰塵同刺激物，減低再次感染嘅風險。
狗狗肺炎照顧 2｜確保飲夠水
飲多啲水有助保持狗狗呼吸道濕潤，令痰液唔會太杰，狗狗比較容易咳返啲分泌物出嚟。
如果狗狗唔係好肯飲水，可以喺獸醫建議下配搭濕糧（罐罐），或者少食多餐咁補充水份。
狗狗肺炎照顧 3｜千祈唔好亂用止咳藥或者人類藥物
好多主人見到狗狗咳會好心痛，想幫佢「止咳」，但呢個其實係非常危險嘅行為！
咳對狗狗嚟講，係身體自然用嚟排走病菌同膿液嘅重要機制，如果夾硬止咳，反而會令到啲分泌物積聚喺肺部，搞到發炎加重，甚至拖慢復原時間。
如果用人類嘅藥物，亦可能會因為劑量太高搞到狗狗中毒，所以任何藥物嘅使用，都一定要跟足獸醫嘅指示。
狗狗肺炎照顧 4｜密切留意狗狗狀況
喺護理期間，主人亦應該密切觀察狗狗嘅抖氣情況、精神同胃口變化。如果發現抖氣變得更加辛苦、精神持續低落或者症狀反反覆覆，應該即刻帶返去覆診評估。
狗狗肺炎常見問題 FAQ
Q1：狗狗肺炎會好返嗎？
大多數狗狗只要及早發現並接受完整治療，康復情況通常都係理想嘅。
不過肺部修復係需要時間嘅，就算症狀有改善，都必須要有耐性完成成個療程，咁先可以避免復發或者留低後遺症。
Q2：狗狗肺炎要醫幾耐先會好？
肺炎通常需要持續幾個星期嘅治療，特別係抗生素療程。
就算狗狗睇落已經唔咳、唔喘氣，都建議跟從獸醫指示繼續食藥最少一段時間，同埋覆診照 X 光確認肺部已經完全清晒，先可以安心停藥。
Q3：狗狗肺炎會唔會惹畀其他狗？
有無傳染性，主要睇肺炎嘅成因係咩。
由細菌或者病毒引起嘅肺炎，的確有可能透過飛沫喺狗同狗之間傳播，所以需要特別注意隔離同環境消毒。
但因為唔小心濁親（吸入嘢食或液體）造成嘅吸入性肺炎，以及同環境因素有關嘅肺炎，就唔會傳染畀其他狗狗。