爹利犬（Terrier），並唔係單一犬種，而係一個包含好多種小型到中型犬嘅大家族。
爹利犬最初被培育嚟獵捕老鼠、狐狸呢啲小型害獸，憑住佢哋勇敢、靈敏同強烈嘅狩獵本能，逐漸成為人類可靠嘅工作夥伴。
爹利犬出名活潑、機警又忠誠，係好多人心目中嘅理想家庭伴侶。以下將會逐個品種介紹，帶你更深入了解呢啲個性鮮明嘅爹利狗代表！
爹利品種1. 積羅素爹利
積羅素爹利（Jack Russell Terrier）源自英國，係一種小型獵犬，最初用嚟趕洞穴入面嘅狐狸。以「狗界小鋼炮」聞名，而家多數作為伴侶犬，亦活躍於搜救領域。
外觀特徵
| 特徵 | 說明 |
|---|---|
| 體型 | 小型犬，身高 25–30 cm，體重 4–8 kg |
| 毛髮 | 雙層毛，毛質偏粗糙，甩毛量中等 |
| 毛色 | 白底配搭黑色或啡色斑點 |
| 毛長 | 分為平毛、剛毛、碎毛三種 |
個性特質
- 精力無限：需要大量運動「放電」，如果唔係容易焦躁。
- 又叻又硬頸：學習能力強，但有時好固執。
- 忠誠痴身：鍾意同主人互動，非常痴人。
- 活潑好動：如果冇嘢玩，可能會亂吠或搞破壞。
飼養建議
- 運動需求極高：需要規律運動同遊戲嚟消耗精力。
- 空間需求：適合有活動空間嘅家庭。
- 健康管理：要注意關節同眼睛疾病，定期檢查好重要。
- 需要用腦：提供益智玩具避免佢因為悶而搞事。
爹利品種2. 剛毛獵狐爹利
剛毛獵狐爹利（Wire Fox Terrier）源於 19 世紀嘅英國，最初係培育嚟狩獵狐狸，外型俐落，被稱為「著住西裝嘅小獵犬」。
外觀特徵
| 特徵 | 說明 |
|---|---|
| 體型 | 中小型犬，肩高 36–39 cm，體重 7.5–8.5 kg |
| 毛髮 | 雙層鋼絲狀毛髮，防水防污，毛質硬淨 |
| 毛色 | 白底配搭黑色或啡色斑塊，經典三色最常見 |
| 耳仔/眼睛 | V字型細耳向前摺，深色杏仁眼，靈活警覺 |
個性特質
- 活潑好動：探索慾望極強，精力充沛。
- 勇敢機警：天生有狩獵同守護本能。
- 聰明獨立：有主見，但都願意討好主人。
- 反應敏捷：運動量唔夠可能會亂吠或咬傢俬。
飼養建議
- 高運動需求：每日需要大量運動同遊戲。
- 美容需求高：需要定期梳毛同修剪。
- 訓練建議：幼犬時期就要接觸唔同環境，以正向獎勵訓練為主。
爹利品種3. 西高地白爹利 (西莎)
西高地白爹利（West Highland White Terrier），嚟自蘇格蘭，以一身純白毛色同活潑可愛嘅形象聞名，亦係狗糧品牌「西莎」嘅標誌性犬種。
外觀特徵
| 特徵 | 說明 |
|---|---|
| 體型 | 小型犬，肩高約 25-28 cm，體重約 6.8-9 kg |
| 毛髮 | 雙層毛，外層粗硬，內層柔密 |
| 毛色 | 純白色 |
| 耳仔/尾巴 | 細小直立耳，紅蘿蔔狀嘅尾巴向上翹 |
個性特質
- 開朗活潑：鍾意玩，係家庭嘅開心果。
- 忠誠守護：對屋企人特別親近。
- 聰明固執：理解力高，但有時唔聽指令。
- 警覺勇敢：會主動出聲提醒，係小型守護者。
飼養建議
- 運動需求：每日需要適量活動同遊戲。
- 美容管理：需要定期修剪、梳毛，同處理淚痕，避免皮膚問題。
- 訓練方式：以正向獎勵為主，保持耐性好重要。
- 陪伴需求：唔適合長時間獨處，容易有分離焦慮。
爹利品種4. 約瑟爹利
約瑟爹利（Yorkshire Terrier），起源於 19 世紀英國約克郡，係爹利犬中體型最細嘅品種之一，以華麗長毛同勇敢個性出名。
外觀特徵
| 特徵 | 說明 |
|---|---|
| 體型 | 小型犬，肩高 15-25 cm，體重 2–3.5 kg |
| 毛髮 | 絲質長毛，好似頭髮咁直順光滑 |
| 毛色 | 鋼藍色同金黃色係標準配色 |
| 耳仔/眼睛 | 細小直立耳，圓碌碌嘅深啡色眼睛 |
個性特質
- 精力充沛：體型細但勇敢活潑。
- 忠誠痴身：鍾意同主人互動。
- 警覺性高：容易吠叫，適合作為警戒犬。
- 地盤意識強：可能會對大狗挑釁，要及早訓練。
飼養建議
- 美容需求極高：每日都要梳毛，並需定期美容。
- 健康注意：骨骼脆弱，要避免同幼童粗暴玩耍。
- 適合環境：適合城市飼養，但需要長時間陪伴。
- 訓練方式：耐性同一致性係關鍵，建議早期社會化。
爹利品種5. 波士頓爹利
波士頓爹利（Boston Terrier），源於美國，被譽為「美國紳士」，以其黑白相間、好似著住禮服嘅花紋同友善性格而聞名。
外觀特徵
| 特徵 | 說明 |
|---|---|
| 體型 | 中小型犬，肩高 23–38 cm，體重約 7–11 kg |
| 毛髮 | 短而光滑，甩毛量輕微 |
| 毛色 | 黑色、海豹色，常配搭白色斑紋 |
| 頭部特徵 | 方正頭型，大眼圓碌碌，耳仔直立 |
個性特質
- 聰明溫和：樂意討好主人，學習能力高。
- 友善親人：可以同細路、老人家同其他動物和睦相處。
- 比較安靜：唔算好嘈，適合公寓生活。
飼養建議
- 運動需求適中：短鼻犬，避免太熱或太凍時劇烈活動。
- 美容簡單：毛髮短，每星期梳理就夠。
- 健康注意：眼睛大易受傷，呼吸道問題都要特別留意。
- 適合環境：安靜嘅個性令佢哋非常適合都市居住。
爹利品種6. 帕森羅素爹利
帕森羅素爹利（Parson Russell Terrier），由牧師約翰羅素培育，最初用嚟獵狐狸同水獺，以活力同敏捷出名。（註：同積羅素爹利係近親，但體型比例唔同）
外觀特徵
| 特徵 | 說明 |
|---|---|
| 體型 | 中小型犬，肩高 25–30 cm，體重 5–8 kg |
| 毛髮 | 雙層毛，外層短硬，內層柔密 |
| 毛色 | 以白色為主，帶黑色或啡色斑紋 |
個性特質
- 活力充沛：需要長時間活動。
- 忠誠親人：對主人感情深厚。
- 聰明伶俐：學指令快，但間中固執。
- 警覺獨立：對生保人會比較警惕。
飼養建議
- 高運動需求：每日至少 1 鐘頭運動。
- 社交訓練：要由細個開始接觸唔同環境，避免行為問題。
- 美容需求低：毛髮易打理，轉季時要定期梳毛。
- 適合環境：可以適應公寓，但需要大量戶外活動。
爹利品種7. 史丹福郡鬥牛爹利
史丹福郡鬥牛爹利（Staffordshire Bull Terrier），源於英國，原本係鬥犬，但而家以忠誠、溫柔聞名，喺英國被譽為「保姆犬」。
外觀特徵
| 特徵 | 說明 |
|---|---|
| 體型 | 中型犬，肩高 36-41 cm，體重 11–17 kg |
| 毛髮 | 短毛緊密，毛質光滑 |
| 毛色 | 多樣，包括紅、黃啡、白、黑或藍色 |
個性特質
- 活力旺盛：永遠都精力充沛。
- 忠誠親人：同屋企人感情深厚。
- 溫柔貪玩：就算大個咗都好似BB狗咁熱情。
- 敏感細膩：對主人情緒特別敏感。
飼養建議
- 高運動需求：每日需要規律運動同遊戲。
- 訓練重點：提供耐咬玩具，避免傢俬受損。
- 健康注意：控制體重，避免肥胖。
- 適合飼主：建議有經驗嘅主人飼養。
爹利品種8. 萬能爹利
萬能爹利（Airedale Terrier），又叫「爹利犬之王」，源於英國約克郡艾爾谷，係體型最大嘅爹利犬。曾經喺世界大戰中擔任信差同救護犬，被譽為「戰爭英雄」。
外觀特徵
| 特徵 | 說明 |
|---|---|
| 體型 | 中型犬，肩高約 58 cm，體重 22–32 kg |
| 毛髮 | 雙層毛，粗硬濃密，具防水功能 |
| 毛色 | 黑色、灰啡色同棕啡色 |
個性特質
- 聰明果敢：忠誠勇敢，守護本能強烈。
- 活潑好動：鍾意戶外跑跳同探索。
- 狩獵本能：容易出現掘地或亂咬嘢嘅行為。
- 獨立固執：需要有耐性嘅正向訓練。
飼養建議
- 高運動需求：每日需要大量活動同遊戲。
- 美容管理：建議每星期梳毛2–3次，定期修剪。
- 社交訓練：避免因護衛本能太強而表現攻擊性。
- 適合環境：唔建議香港嘅細單位飼養，需要寬敞空間。
爹利品種9. 凱恩爹利
凱恩爹利（Cairn Terrier），係最古老嘅蘇格蘭爹利犬之一，曾經喺經典電影《綠野仙蹤》入面扮演主角嗰隻狗狗托托 (Toto)。
外觀特徵
| 特徵 | 說明 |
|---|---|
| 體型 | 小型犬，肩高約 25-31 cm，體重約 6-8 kg |
| 毛髮 | 防風雨嘅粗硬雙層毛，禦寒能力強 |
| 四肢 | 前腳直立有力，後腳強壯 |
個性特質
- 敏捷靈活：動作俐落。
- 勇敢自信：個性堅定果敢。
- 親人友善：同屋企人相處融洽。
飼養建議
- 美容需求：需要定期梳理同修剪毛髮。
- 訓練需求：採用正面鼓勵並及早進行社會化訓練。
- 適合環境：可以適應多種居住空間。
爹利品種10. 羅威士爹利
羅威士爹利（Norwich Terrier），嚟自英國，係爹利家族中體型最細嘅品種之一，以活潑同親人出名。
外觀特徵
| 特徵 | 說明 |
|---|---|
| 體型 | 小型犬，肩高約 25 cm，體重約 5–6 kg |
| 毛髮 | 粗硬雙層毛，禦寒能力佳 |
| 毛色 | 紅色、小麥色、黑啡色或斑駁色 |
| 耳仔特徵 | 細小直立耳，表情機警 |
個性特質
- 活潑外向：鍾意社交同互動。
- 忠誠自信：同主人感情深厚。
- 獨立聰明：訓練需要結合遊戲同獎勵。
- 狩獵本能：可能會亂吠或掘地。
飼養建議
- 運動需求：每日需要規律散步同遊戲。
- 美容管理：需要定期梳毛同手拔毛去維持毛質。
- 訓練方式：短而多變嘅訓練最有效。
- 適合飼主：新手喺正確引導下都可以飼養。
爹利犬啱唔啱你？搵個最夾嘅夥伴！
爹利犬唔單止活潑聰明，仲有強烈嘅忠誠同警覺特質。
無論你係鍾意細細粒痴身嘅狗狗，定係想要一位精力充沛嘅戶外夥伴，爹利家族中總有一個品種能夠滿足你嘅需求。
揀爹利犬之前，請先諗下自己嘅生活模式：你可唔可以每日安排運動同互動時間？願唔願意投入心機去美容同訓練？
只要畀到正確嘅陪伴同照顧，爹利犬將會成為屋企最開心、最忠誠又最值得信賴嘅好夥伴！
延伸閱讀：【新手養狗】養狗入門準備懶人包：由洗費、用品到照顧全攻略！