狗瘟有得醫嗎？3 大階段症狀及傳染途徑

犬瘟熱（Canine Distemper）俗稱「狗瘟」或者「犬瘟」，係一種由副黏液病毒（Paramyxovirus）引起，而且傳染性極高嘅病毒性疾病。

犬瘟熱絕對唔係普通嘅感冒或者小病，而係一種致死率極高，兼且目前仲未有特效藥嘅嚴重疾病。當病毒入咗狗狗體內之後，會對呼吸道、消化道、神經系統等身體各部份發動大規模攻擊，造成無得返轉頭嘅損害。

雖然所有年紀嘅狗狗都有機會感染，但免疫系統仲未發育好、或者未打防疫針嘅狗 B（幼犬），係風險最高嘅高危一族。

犬瘟熱嘅潛伏期通常喺感染後嘅 3 至 6 日開始出現發燒症狀，但整體嘅潛伏期範圍最長可以去到 14 至 18 日，如果觀察到以下症狀，就一定要提高警覺：

犬瘟熱初期嘅表現非常似普通感冒，呢個亦係主人最容易掉以輕心嘅階段。常見症狀包括：

 
• 發燒

 

• 無晒胃口

 

• 無精神、成日瞓

 

• 眼屎同鼻涕變多（黃色杰撻撻嘅膿性分泌物）

 

• 咳

 

• 打乞嚏

隨住病毒喺體內擴散，狗瘟症狀會變得更加劇烈同多樣化：

 
• 嘔得好犀利

 

• 肚屙（可能伴隨屙血屎）

 

• 抖氣困難（甚至引發肺炎）

呢個係最危險嘅階段。當病毒入侵神經系統，就會出現典型嘅狗瘟症狀：

 
• 控制唔到咁抽筋

 

• 口吐白泡

 

• 發羊吊（癲癇）

 

• 行路唔穩、搖吓搖吓（甚至癱瘓）

除咗咁，犬瘟熱仲有一個好特別嘅病徵叫做「硬肉墊病」（Hardpad disease），即係狗狗腳板底啲肉墊同鼻頭皮膚會異常變厚、變硬。所以主人如果發現有任何唔妥，一律建議即刻帶佢去睇醫生最穩陣！

延伸閱讀：狗房咳係咩嚟？狗狗咳嘅元兇就係佢！認識症狀及預防指南

好多主人會覺得奇怪：「明明狗狗好少出街，點解仲會惹到狗瘟？」

其實犬瘟熱嘅傳染力極強，就算唔常出街，依然有機會中招。以下係主要嘅傳播方式：

 
• 空氣飛沫傳播：當病狗咳、打乞嚏嗰陣，帶有病毒嘅飛沫會散佈喺空氣入面令健康狗狗感染，呢個亦係最常見嘅感染途徑。

 

• 接觸到受污染嘅物品或體液：如果狗狗掂到病狗嘅尿、屎、鼻涕，或者用咗被污染嘅狗兜、水兜，都有可能感染。

 

• 環境帶菌：犬瘟熱病毒喺凍同乾燥嘅環境可以存活得更耐（所以秋冬季節比較容易爆發）。

所以就算無出過街，主人出完街返嚟都有可能將出面嘅病毒帶返屋企，搞到留喺屋企嘅狗狗「無啦啦中招」。

犬瘟熱喺初期好多時好似感冒或者狗房咳，單靠肉眼好難判斷。

如果你發現狗狗流黃綠色嘅膿鼻涕、精神差、無晒胃口，一定要盡快搵獸醫幫手，獸醫會透過以下方法去精準判斷病情：

犬瘟熱快測係獸醫最常用嘅初步檢測方法。

獸醫會採集眼鼻分泌物或者體液，大約等 10 分鐘就會知有無病毒抗原，幫手快速做出初步診斷。

如果快測結果係陰性，但狗狗啲症狀又非常似犬瘟熱（即係可能出現假陰性），獸醫就會安排更準確嘅檢查：

 
• PCR 核酸檢測：用嚟確認病毒係咪真係存在，係最準確嘅方法。

 

• 驗血（血液檢查）：觀察白血球（淋巴球）有無下跌等典型變化。

呢啲檢查可以協助獸醫判斷病情，並度身訂造最適合狗狗嘅治療方案。

延伸閱讀：心絲蟲會致命！認識狗狗心絲蟲症狀，2 招全面預防感染

雖然目前醫學上無可以直接殺死犬瘟熱病毒嘅特效藥，但犬瘟熱唔係無得救，關鍵在於「抵抗力（免疫力）」同「治療時機」。

如果喺初期就開始治療，存活率相對比較高；一旦進入咗神經症狀期，康復機會通常比較微，治療嘅目標往往會轉為減輕狗狗嘅痛苦同支援身體機能。

犬瘟熱嘅治療重點係「支援性療法」，會透過以下方法幫狗狗維持身體機能，直到免疫系統可以自己打低隻病毒：

 
• 輸液治療（吊鹽水）：補充水份同電解質，避免因為嘔同肚屙搞到脫水。

 

• 抗生素：雖然殺唔死病毒，但可以預防或者控制細菌感染，例如細菌性肺炎。

 

• 症狀控制：如果出現抽筋或者神經症狀，會用抗抽筋（抗癲癇）藥；亦會補充營養、幫佢維持體力。

雖然具體金額會因為唔同獸醫診所同病情而有分別，但主人要有心理準備，醫治犬瘟熱嘅費用通常都好昂貴，原因包括：

 
• 需要隔離留醫：避免傳染畀診所入面其他狗狗。

 

• 重症護理費用高：可能需要瞓氧氣箱、加強吊鹽水、用神經科藥物、24 小時深切治療等。

 

• 治療時間長：病程拖得耐，住得院耐，累積嘅醫藥費自然就高。

就算狗狗成功捱過急性期並且順利好返，犬瘟熱病毒帶嚟嘅傷害往往已經深入神經系統，好可能會留低無得復原嘅後遺症，影響狗狗一世。

常見嘅後遺症包括：

 
• 神經症狀：例如成世都會出現局部肌肉抽搐（舞蹈症）、發羊吊、歪頭、行路唔穩等。

 

• 發育異常：如果喺狗 B 換牙期感染，可能會造成琺瑯質發育不全，令到啲牙好易碎、變色。

正因為犬瘟熱唔單止醫藥費貴、病程長，後遺症仲可能會影響狗狗成世嘅生活質素，所以「預防永遠勝於治療」，呢個亦係各位狗主最需要重視嘅重點！

要預防犬瘟熱，打犬瘟熱疫苗絕對係最關鍵、最有效嘅預防方法！

犬瘟熱疫苗屬於「核心疫苗」，所有狗狗都應該要打，以下係打狗瘟針嘅相關事項：

狗 B 會喺 6–8 個禮拜大開始打第一針，之後每 3–4 個禮拜打一次加強針，直到滿 16 個禮拜大。

呢段時間係建立免疫力嘅黃金時期，準時打針先可以令狗 B 得到完整保護。

成犬（大狗）並唔係細個打完一次就可以成世免疫。

獸醫會根據狗狗嘅健康狀況同生活習慣，安排每年或者每三年打 1 次加強針，幫手維持足夠嘅抗體。

喺狗 B 啲疫苗仲未打齊之前，盡量避免去人多、狗多嘅地方（例如狗公園），亦都唔好同陌生嘅狗狗接觸。

因為呢段時間狗 B 嘅抵抗力比較弱，少少掂到病原都有可能被感染。

延伸閱讀：狗狗疫苗 2026 指南｜五合一/八合一/瘋狗症疫苗費用與時間表一覽

犬瘟熱嘅死亡率非常之高，一般平均大約喺 50% 左右，而如果無及時治療、或者病情已經進入神經階段，死亡率甚至可能會飆升到 80–90%。

呢個亦係點解犬瘟熱被視為最危險嘅狗隻傳染病之一嘅原因。

會。

雖然犬瘟熱最常見於狗 B，但只要係無打齊疫苗或者抵抗力比較差嘅老狗，一樣有機會感染。

老狗嘅抵抗力本身就比較弱，一旦感染更加唔可以掉以輕心，需要盡快接受治療。

 
• https://www.msdvetmanual.com/infectious-diseases/canine-distemper/canine-distemper

 

• https://www.vet.cornell.edu/departments-centers-and-institutes/riney-canine-health-center/canine-health-topics/canine-distemper-virus

 

• https://www.akc.org/expert-advice/health/distemper-in-dogs/

 

• https://www.petmd.com/dog/conditions/respiratory/distemper-in-dogs

 

• https://pmc.ncbi.nlm.nih.gov/articles/PMC12197679/