狗狗食咗乾糧咁耐，想畀佢哋試吓新口味？咁狗狗鮮食絕對係一個好選擇！
鮮食係用新鮮、最少加工嘅食材製作嘅寵物食品，主打「真材實料、睇得見嘅營養」，唔會落人工防腐劑或者添加劑，等毛孩可以食到同人類一樣等級嘅新鮮食物。
不過鮮食唔係就咁煮熟咁簡單，如果想狗狗食得滋味又夠營養，以下關於狗狗鮮食嘅細節一定要特別留意，快啲跟住我哋一齊嚟了解吓啦！
狗狗鮮食嘅好處與壞處？
畀狗狗食鮮食之前，等我哋先睇吓鮮食對狗狗身體有咩好處同壞處，等大家可以全面啲去評估：
狗狗食鮮食嘅好處
- 補充水份：鮮食水份高，比乾糧更能幫狗狗補水，亦都可以幫狗狗維持腸胃暢通。
- 可以度身訂造：主人可以根據狗狗嘅年紀、體重、健康狀況（好似腎病、敏感），調整鮮食入面蛋白質、碳水化合物同脂肪嘅比例，令營養更易控制。
- 適口性極佳：鮮食氣味同口感都好自然，能刺激胃口，特別適合嘴刁或者無乜胃口嘅老狗。
狗狗食鮮食嘅壞處
- 營養可能唔均衡：鮮食如果無經過專業營養師設計，好容易出現營養比例失衡、缺乏維他命等問題，長期食可能會搞到營養不良。
- 可能有細菌風險：因為鮮食加工溫度較低，如果製作過程衛生環境唔好，可能會有沙門氏菌、大腸桿菌等病菌，抵抗力差嘅狗狗（如老狗或狗 B）要特別小心。
- 保存期短、處理麻煩：鮮食通常要擺雪櫃冷藏或冰格冷凍，開咗之後要盡快食完，保存起上嚟比一般狗糧麻煩。
- 轉返食乾糧比較難：因為鮮食太香太好味，如果日後想轉返食乾糧，狗狗可能需要更長時間去適應。
想長期餵狗狗食鮮食？3 大注意事項必知
狗狗鮮食注意事項 1｜計準營養比例
呢個係最重要嘅一步！
整鮮食之前一定要先問下獸醫或者寵物營養師，等佢哋根據狗狗嘅體重、活動量同健康狀況去計準鮮食份量，再決定最適合嘅鮮食比例。
如果無經過專業設計或者適當補充維他命同礦物質，狗狗可能會缺乏關鍵營養，特別係患有慢性疾病（例如腎病）嘅狗狗，更加需要額外留神！
狗狗鮮食注意事項 2｜揀選安全食材
安全嘅鮮食食材通常包括：
- 蛋白質：雞肉、牛肉、魚肉、蛋等
- 碳水化合物：番薯、薯仔等
- 蔬菜水果：紅蘿蔔、菠菜、西蘭花等
⚠️絕對禁止食材：朱古力、提子、洋蔥、蒜頭、牛油果、堅果、生肉、生雞蛋同埋任何加工食品。
狗狗鮮食注意事項 3｜留意煮食過程
食材要洗得乾乾淨淨，切細粒之後用水煮或者蒸，而且一定要完全煮熟。
千祈唔好落鹽或者任何調味料。煮好嘅鮮食最好趁新鮮食晒佢。
想幫狗狗加餸？簡易狗狗鮮食食譜教學
想狗狗間中加吓餸或者試吓新口味？我哋精選咗以下簡單易整嘅狗狗鮮食食譜，適合用嚟做日常小獎勵或者輕食補充。
不過要提醒大家，呢啲食譜只適合間中餵食，唔建議長期當正餐。如果想長期餵鮮食，一定要先問獸醫或寵物營養師，確保營養比例啱數呀！
狗狗鮮食食譜 1｜狗狗夏威夷 Poke Bowl
材料：雞胸肉、紅蘿蔔、西蘭花、番薯、少少橄欖油（大約一茶匙）
做法：
- 將所有食材洗乾淨，切成約 0.5～1 cm 嘅細粒
- 放入電飯煲或者蒸鍋蒸熟
- 全部熟透之後，加橄欖油撈勻
- 攤凍之後就食得啦
狗狗鮮食食譜 2｜狗狗燕麥粥
材料：牛肉、南瓜、燕麥、菠菜
做法：
- 南瓜去皮切塊蒸熟，壓成蓉備用
- 牛肉同菠菜煮熟之後切碎
- 燕麥用水煮成軟綿綿嘅粥狀
- 將南瓜蓉、牛肉碎同菠菜一齊撈入燕麥粥入面
- 攤凍之後就可以餵狗狗食
狗狗鮮食食譜 3｜經典鮮食餐盒
如果擔心無時間或者無地方自己煮，都可以選擇專為狗狗設計嘅鮮食餐盒。
好似 HeroMama 3in 犬用經典鮮食餐盒 由寵物營養師設計，開盒之後就可以直接餵或者撈落狗糧度，方便又安心，特別推介畀啱啱開始接觸鮮食嘅新手主人！
狗狗鮮食可以擺幾耐？處理方式一次睇
鮮食建議煮完之後盡快食晒，以確保新鮮同營養。
如果煮完有食唔晒嘅鮮食，都可以跟住以下方式保存，維持食物質素：
- 冷藏保存（雪櫃下格）：自家製鮮食建議放雪櫃 2 日內食完。
- 冷凍保存（冰格）：可以延長保存期去到 3 個月，要放喺 -18°C 以下。
注意：解凍之後要全程冷藏，並且一次過食晒佢，避免反覆解凍或者沾到口水搞到滋生細菌呀！
點樣幫狗狗轉食鮮食？新舊糧比例一覽表
如果你決定畀狗狗轉食鮮食，喺飲食轉換期一定要循序漸進，畀腸胃有時間適應。以下係參考比例表：
| 階段 | 新食物比例 | 舊食物比例 | 說明 |
|---|---|---|---|
| 第一階段 | 20% | 80% | 開始階段，留意便便同胃口變化 |
| 第二階段 | 40% | 60% | 慢慢增加新鮮食物比例 |
| 第三階段 | 60% | 40% | 如果腸胃無唔舒服就可以繼續 |
| 第四階段 | 80% | 20% | 幾乎完成轉換 |
| 第五階段 | 100% | 0% | 完成轉糧 |
喺呢個過程入面要密切留意狗狗嘅便便形狀、精神狀態同體重變化，如果出現嘔吐、肚屙或者偏食，應該即刻暫停並問下獸醫。
狗狗鮮食常見問題 QA
Q1：狗狗可以食邊啲鮮食？
狗狗可以食新鮮嘅蛋白質（雞肉、牛肉、魚、蛋）、碳水化合物（番薯、燕麥、白飯）同蔬果（紅蘿蔔、藍莓、菠菜）。
Q2：狗鮮食同乾糧邊樣好啲？
如果想知邊種好啲，答案其實好簡單——要睇邊一種更適合你隻狗狗。
鮮食嘅優點係口感好、水份多；乾糧嘅好處係方便保存、價錢實惠。只要兩者都有經過寵物營養師調配，並且根據 AAFCO/NRC 國際營養標準設計，其實都可以提供完整營養。
換句話講，無話邊樣一定比較好，最緊要係根據狗狗嘅體質、年紀同埋主人嘅時間預算，去揀最合適嘅方式。
Q3：狗狗一日要食幾多鮮食？
餵食量會根據狗狗嘅體重、活動量同年紀而有所唔同，建議依專業寵物營養師計算嘅熱量需求，去決定狗狗一日要食幾多鮮食。
Q4：狗狗可以日日食鮮食嗎？
可以，但前提係鮮食要符合配方完整、營養均衡等條件。
如果係自家製鮮食，建議定期問吓寵物營養師調整配方，先好日日餵呀！